ပ္ဍဲညံၚ်လေဝ်ပေန် ဒးလွဟ်ဇၞော်ဒပ်ပၞာန်ဗၟာတုဲ ကောန်အရာပ် ၆ တၠ ချိုတ်တုဲ ၇ တၠ ကလိဂွံဝပ်

ညံၚ်လေဝ်ပေန်၊ အဝ်ဂါတ် (၁၈)

အပ္ဍဲကဵု ၄ တ္ၚဲတုဲကၠုၚ်တေံ ဟိုတ်နူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် အပ္ဍဲကဵုဒပ်မဟာ (၃) ခရိုၚ်ညံၚ်လေဝ်ပေန် တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ်တုဲ ညးဍုၚ်ကွာန်ကောန်အရာပ် ၆ တၠ ပါလုပ်သီုကဵုကွးဘာ ၂ တၠ ချိုတ်အာလဝ်တုဲ ၇ တၠ ကလိဂွံလဝ်ဝပ်ဂှ် KNU ဗဟဵု လလောၚ်ပ္တိတ်လဝ် ပ္ဍဲဂိတုအဝ်ဂါတ် (၁၇) တေံရ။

တမ်ဒပ်ကံၚ်ဇြဳပၞာန် ဖျေံသ္ဇိုၚ် ခရိုၚ်ညံၚ်လေဝ်ပေန်ဂှ်ဝွံ တုဲကၠုၚ် နူကဵုဂိတုအဝ်ဂါတ် ၁၃ စဵုကဵု ၁၆ အပ္ဍဲပွိုၚ် ၄ တ္ၚဲဂှ် ပန်ပှော်ဗ္တိုက်လဝ် လွဟ်ဇၞော် လ္တူညးဍုၚ်ကွာန်ကောန်အရာပ်တံ ဗ္ဒါဲ ၁၀၀ လစုတ်ရ။

တုဲကၠုၚ် ပ္ဍဲဂိတုအဝ်ဂါတ် (၁၃) တေံ ဟိုတ်နူပရေၚ်ပန်ပှော်လွဟ်ဇၞော်ဒပ်ကံၚ်ဇြဳပၞာန်တံဂှ်တုဲ ကွးဘာနူကဵုကွာန်ပေဝ်တံၚ် ပွိုၚ်ဍုၚ်ကျံက်ကျဳ သဝ်အေတ်ကလူထူ အာယုက် ၁၃ သၞာံဂှ်ကဵု သဝ်ဗိုဝ်လိုဝ်တဳ အာယုက် ၁၆ သၞာံတံ ဒးချိုတ်အာလဝ်တုဲ သဝ်ခွါသဳ အာယုက် ၁၁ သၞာံကဵု နဝ်ဗျေဝ်ဝ် အာယုက် ၁၅ သၞာံတံ ကလိဂွံလဝ်ဝပ်သ္ကာတ်မြဟ်ရ။

သ္အာၚ်နူဂှ်ပၠန် တုဲကၠုၚ်ပ္ဍဲဂိတုအဝ်ဂါတ် ၁၄ တေံဂှ်လေဝ် နူကဵုဒပ်ကံၚ်ဇြဳပၞာန် ဖျေံသ္ဇိုၚ်ယှိုဲကျေန် ပန်ပှော်လဝ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် အပ္ဍဲဘာဗ္တောန်လိက်ဂှ်ရ အ္စာၝောံဗ္တောန်လိက် ၁ တၠကဵု ကွးဘာ ၂ တၠ ဇီုကပိုက်ကလိဂွံလဝ်ဝပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲဂိတုအဝ်ဂါတ် ၁၆ တေံဂှ်လေဝ် နူကဵုဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ် ဟိုတ်နူပန်ပှော်စုတ်လဝ် လွဟ်ဇၞော်တံတုဲ ဒတုံဗ္တိုဟ်ထ္ကးအာလဝ် အပ္ဍဲကွာန် (ဇလုပ်ကြီး) ဂှ်ရ ကိုဝ်မာၚ်ထိုဲ အာယုက် ၆၀ သၞာံကဵု ကိုဝ်တဇြဝ် အာယုက် ၃၅ သၞာံတံ ဒးကဝေက်မကမ် ချိုတ်အာလဝ်ရ။

အပ္ဍဲဂိတုဂျူလာၚ်ကဵု ဂိတုအဝ်ဂါတ်ဏံဂှ် ပေါဲဗ္တိုက်အကြာဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်တံ ဆက်က္တဵုဒှ်ဒၟံၚ်တုဲ လ္ပာ်ကံၚ်ဇြဳပၞာန် ထပ်ကၠောန်ကၠုၚ် ပရေၚ်ဗ္တိုက်တရဴကျာတံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU တံဂှ်ရ။

အပ္ဍဲကဵုပေါဲဗ္တိုက်ဂမၠိုၚ်ဂှ် ဒပ်ကံၚ်ဇြဳပၞာန် ဟိုတ်နူစံၚ်ပလီုပလာ်လဝ် ကွာန်နာန်သဂှ်တုဲ သ္ၚိဒၟံၚ်ညးဍုၚ်ကွာန် ဗ္ဒါဲ ၂၀ ပၟတ်တူလီုလာ်အာလဝ်တုဲ သ္ၚိဒၟံၚ်ဟွံဂွံကံက်စရၚ်တံလေဝ် နွံဒၟံၚ်ဏီတုဲ ကွာန်နာန်သဂှ်ဝွံ ဒှ်ကွာန်သ္ၚိမၞုံ ၂၀၀ မပြၚ်မွဲဂှ် KNU လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU