ကိစ္စဒက်ပ္တန် ဒပ်မဟာ (၈) အပ္ဍဲဒေသကၞောတ်ၜဳရေဝ်ဂှ် KNU ကယျာန်ပါဲ

ကၞောတ်ၜဳရေဝ်၊ အဝ်ဂါတ် (၁၈)

စပ်ကဵုကိစ္စ ဒပ်ပ္တန် ဒပ်မဟာ (၈) ပ္ဍဲဒေသကၞောတ်ၜဳရေဝ် သ္ကုတ်သၠုၚ်ကျာတွဵုရးဍုၚ်မန်ဂှ်တုဲ အပ္ဍဲဂကောံဂှ် သဳကၠဳလဝ်ဟွံမွဲပုဟ်ဂှ် ပဒိုဝ်သဝ်တဝ်နဳ ကေၚ်ကာဗဟဵု ဗော်သွးကောန်ဂကူကရေၚ် KNU သ္ပဒတန်ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

ကြဴနူဒပ်ပၞာန်သီအဝဵုကလေၚ်မွဲဝါတုဲဂှ် နကဵု KNU မဒှ်ဂကောံပၠန်ဂတးကောန်ဍုၚ်အရၚ်ဝှ်ကြံၚ် မပါလုပ်ဒၟံၚ် ပ္ဍဲကဵုပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ် ဒက်ပ္တန်အာ ဒပ်မဟာ (၈) ပ္ဍဲကဵုဒေသကၞောတ်ၜဳရေဝ်ဏောၚ်ဂှ် ပရိုၚ်ဂမၠိုၚ် မံက်တိတ်ဒၟံၚ်ရ။

တုဲကၠုၚ် ၜါဂိတုပြၚ်တေံဂှ်လေဝ် ပ္ဍဲကဵုဌာန်ပရိုၚ် မစုက်လုက်ကဵုဒပ်ပၞာန် လ္ၚဵုတံဂှ် KNU ဒက်လဝ်ဒပ်မဟာ ၈ အပ္ဍဲပွိုၚ်ဍုၚ်ရေဝ်တုဲ ဂအုပ်ဌာနဂှ် စွံအာ ပ္ဍဲကၞောတ်ၜဳရေတ်ရောၚ် ပရိုၚ်ဂမၠိုၚ် ထ္မံက်ထ္ၜးလဝ်အိုတ်ရ။

ပရိုၚ် KNU ဒက်ပ္တန်အာ ဒပ်မဟာတၟိ ဒပ်ပၞာန်ဗၠးၜးကောန်ဂကူကရေၚ် KNLA မွဲ ပြးထၞာန်ကၠုၚ် လ္တူသဵုယှေဝ်မဳဒဳယျာတံတုဲဂှ် ပဒိုဝ်သဝ်တဝ်နဳ ကလေၚ်ခၠေဝ်လဝ် သာ်ဏံရ။

“ဒက်ပ္တန် ဒပ်မဟာ ၈ ဏောၚ်ဟီုဂှ် ပိုယ်တံလေဝ် ဟွံတီပုဟ်။ မိၚ်လေဝ်ဟွံမိၚ်ပုဟ်။ ဆ္ဂး နူကဵုမ္ၚးမ္ၚးဏံ ဟီုဒၟံၚ်တၟာဂလိုၚ်ရ။ ရံၚ်ကဵုတၚ်နၚ်လလောၚ်ပ္တိတ်လဝ်ဗွဲမလုပ်သၞောဝ်ဂှ်မ္ဂး တုဲကၠုၚ်ပ္ဍဲဂိတုဂျောန် ၁၀ တေံ တမ်ဒပ် KNLA ၂၇ လလောၚ်ပ္တိတ်လဝ်ရ။ တမ်ဒပ် ၂၇ ဂှ် ဒပ်မဟာ ၈ ဟွံသေၚ်ပုဟ်လေဝ်။ ညအ်ဂှ် ဒှ်ဂကောံနူကဵု ဒပ်မဟာ ၆ ဏောၚ်။ ပ္ဍဲကဵုပိုယ်တံဂှ် ဒပ်မဟာ ၆ ကဵု ဒပ်မဟာ ၄ တံဂှ် တိဍာ်စုက်ဒၟံၚ်တုဲ ပ္ဍဲကဵုဒၞါဲမသၠးဒၟံၚ်အကြာဏံဂှ် ညးတံချဳဒရာၚ်ဂှ် နွံညိဏောၚ်။ လဆောဝ်လဆောဝ် တတ်အာတတ်ကၠုၚ်ဂှ် နွံဏောၚ်။ တုဲပၠန် ဂေတ်လန်ဒၟံၚ်ကၚ် လ္တူဂၠံၚ်ဇၞော်ပျဳထံၚ်သု စၟတ် ၈ ဂှ် ဒှ်အာကလောန်ကၠောန်ဒၟံၚ်လၟိုန်ယျ။ ဒက်ပ္တန်ဒပ်မဟာတၟိဟီုဂှ် ပ္ဍဲကဵုပိုယ်တံ မုမှဟွံမိၚ်ပုဟ် “ သာ်ဝွံ ညးသ္ဂးရ။

သ္အာၚ်နူဂှ်ပၠန် သွက်ဂကူကရေၚ်ကဵု ဂကူမန်တံဂှ် ပ္ဍဲအခိၚ်ကာလဏံ ဇၟာပ်သၞောတ်တၠအဝဵုပၞာန်နွံဒၟံၚ်ဂှ် သွက်ဂကောံလဵုမှ ဟွံခိုဟ်ဂှ်ရ ပံၚ်တောဲတုဲ ညံၚ်သၞောတ်တၠအဝဵုပၞာန်ဂွံသရိုဟ်စှ်ေအာဂှ် ဒးကၠောန်ဏောၚ်မဒှ်တုဲ မွဲဂကောံကဵုမွဲဂကောံ ညံၚ်ဂွိုအ်ကၠိုဟ်ဗၠေတ်အာ ၜိုတ်သ္ပမာန် ဒးဝေၚ်ပါဲဏောၚ်ဂှ် ပဒိုဝ်သဝ်တဝ်နဳ သ္ဂးရ။

KNU ဝွံ ပ္ဍဲသၞာံ ၂၀၁၅ လက်ထက်အလဵုအသဳ သမ္မတဥူတုၚ်ဇြုၚ် သ္ကိုပ်ဗိုလ်ဇၞော်တြေံတေံ ကရောံဂကောံရပ်လွဟ်ကောန်ဍုၚ်အရၚ် (၇) ဂကောံဂှ် ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်အလုံဍုၚ် (NCA) ရ။

သ္အာၚ်နူဂှ်ပၠန် ဟိုတ်နူပရေၚ်ပၞာန်သီအဝဵုတုဲ ကရဴကၠေံစး ကုလိက်ကသုက် NCA ဂှ်တုဲ ကဵုကၠုၚ်လဝ်တန်ဗ္တောန်ပၞာန် ကုညးသၟတ်နူကဵုလ္တူဍုၚ် ထောံလသာသ္ၚိဌာန်တုဲ မဒစဵုဒစးဒၟံၚ်တၠအဝဵုပၞာန်တံဂှ်တုဲ ပံၚ်တောဲပါလုပ်ဒၟံၚ် ပ္ဍဲကဵုပၠန်ဂတးက္ညၚ်ဏံရ။

မွဲလ္ပာ်ပၠန်ဂှ်လေဝ် စနူဂိတုဂျောန် (၁၈) တုဲကၠုၚ်တေံတုဲ ဂကောံဒပ် PDF တံကီု သီုကဵုကောန်ဂကောံဒပ် တမ်ဒပ် KNLA (၂၇) ပ္ဍဲကဵုဂၠံၚ်ဇၞော်ဗျဳထံၚ်သု စၟတ် (၈) မတ်မလီု−ရေဝ်−ထဝါဲ−ဗိက် ဒေသပၞာန်သၠုၚ်ကျာ ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG တံ စချဳဒရာၚ်ကၠုၚ် ပရေၚ်ထိၚ်ဒက်တိဍာ်တံရ။

ပ္ဍဲကဵုအကာဲအရာသာ်ဏံဂှ် နကဵု KNU ပ္ကောံကေတ် PDF မချဳဒရာၚ်ဒၟံၚ် အပ္ဍဲပွိုၚ်ဍုၚ်ရေဝ်တံဂှ်တုဲ သွက်ဂွံသၠဲပ္တိုန်တိဍာ်ဂှ် ဒက်ပ္တန်လဝ် ဒပ်မဟာ ၈ ဂးတုဲ ပရေၚ်ပါ်ပါဲဒုၚ်တဲဟွံမာန် အကြာညးဍုၚ်ကွာန်မန်တံဂှ်လေဝ် ပ္ဍဲအကြာတ္ၚဲတံဏံ ဂွံဆဵုကေတ်ဒၟံၚ် ပ္ဍဲမုက်လိက်ဇာဇၞိက်ပရေၚ်မၞိဟ်တံ စေအ်အ်ရ။

ညးလ္ၚတ်သ္ၚဳဂၠိပ်ပရေၚ်ကောန်ဍုၚ်အရၚ်မွဲတၠဂှ် ပရိုၚ်ဒက်ပ္တန် ဒပ်မဟာ ၈ ဏောၚ်ဂှ်ဝွံ ဒှ်တၚ်ရန်တၟံ ဒပ်ပၞာန်ဗၟာ မိက်ဂွံကဵုပဋိပက္ခဒှ် အကြာမန်ကဵု ကရေၚ်တုဲ ဖ္တိုက်ဖ္အောဝ်ဖ္ဍဟ်ဖ္ဍာဲဒၟံၚ်တုဲ ဒေသရေဝ်ဝွံ ဟိုတ်နူဂကူမန်မံၚ် ဂၠိုၚ်အိုတ်ဂှ်တုဲ နကဵု KNU သွက်ဂွံဒက်ပ္တန် စက်ယန္တယာအုပ်ဓုပ် ဒှ်ဟွံမာန်ပုဟ်ဂှ် သ္ၚဳဂၠိပ်လဝ်ရ။

“ပရိုၚ်ဒက်ပ္တန် ဒပ်မဟာ ၈ KNU ဏောၚ်ဟီုဂှ် ဌာနပရိုၚ် မစုက်ကဵုဒပ်ပၞာန်တံ၊ အလဵုဒပ်ပၞာန်တံ မတြးဒၟံၚ်ဝါဒဂှ် ဂွံဆဵုဂၠိုၚ်ကေတ်ဒၟံၚ် နူကဵုမ္ၚးဏံဏီဏောၚ်။ ညအ်ဂှ် ဒှ်ပွဒပ်ပၞာန်ဖ္ဍဟ်ဖ္ဍာဲ အကြာမန်ကဵုကရေၚ် တၚ်ရန်တၟံမိက်ဂွံကဵုဒှ်ပဋိပက္ခလေဝ် ပါရ။ ဒပ်မဟာ ၈ ဂှ် ဒက်ပ္တန်ဒၞါဲလဵုရော။ ယဝ်ရဒက်ပ္တန်အကြာမတ်မလီုကဵု ထဝါဲမ္ဂး ကွာန်ကရေၚ်ဂှ် ၅၂ ကွာန်နွံရ။ ဟီုမ္ဂး လ္ပာ်ဏံဂှ် ကရေၚ်ဂှ် ဒှ်ဒၟံၚ်လၟိဟ်မၞိဟ်အောန်ဏောၚ်။ ဒက်ပ္တန်စက်ယန္တယာအုပ်ဓုပ်မွဲမ္ဂး ဒးဒုၚ်သ္ဇိုၚ်ကဵု ညးဍုၚ်ကွာန်ဒေသတံဏောၚ်။ ဂကူမန်ဂှ် ဒှ်ဒၟံၚ်လၟိဟ်ဂၠိုၚ်ဏောၚ်။ ပ္ဍဲဒၞါဲမန်မံၚ်ဂၠိုၚ်ဂှ် ကၠုၚ်ဒက်ပ္တန်ယန္တယာအုပ်ဓုပ်ကရေၚ်ဂှ်တှ်ေ ဒှ်ဟွံမာန်ပုဟ်။ ဂွံဒှ်မာန်ဂှ်လေဝ် အောန်ကွေံကွေံဂှ် အဲညာတ်ရ“ သာ်ဝွံ ညးသ္ဂးရ။

ပ္ဍဲကဵုဗော်သွးကောန်ဂကူကရေၚ် KNU ဂှ် ဒက်ပ္တန်လဝ် ဒပ်မဟာ (၇) ဒပ်တုဲ ဒပ်မဟာ (၁) ဂှ် ခရိုၚ်သဓီု၊ ဒပ်မဟာ (၂) ဂှ် ခရိုၚ်တံၚ်ဥူ၊ ဒပ်မဟာ (၃) ခရိုၚ်ညံၚ်လေဝ်ပေန်၊ ဒပ်မဟာ (၄) ခရိုၚ်ထဝါဲ၊ ဒပ်မဟာ (၅) ခရိုၚ်ဘာပန်၊ ဒပ်မဟာ (၆) ခရိုၚ်ဒူပလာယာ ကေုာံ ဒပ်မဟာ (၇) ခရိုၚ်ဘာအၚ်တံ မဒှ်ရ။

အခိၚ်လၟုဟ်ဂှ် မွဲဒမြိပ်ဂၠံၚ်ဇၞော်ပျဳထံၚ်သု စၟတ် (၈) မတ်မလီု−ရေဝ်−ထဝါဲဂှ် ကရောၚ်ပၞာန်ပံၚ်တောဲပၠန်ဂတး PDF ၊ သီုကဵုဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပါ် ၃ ဒၞါဲတုဲ ဆက်ကၠောန်ဒၟံၚ် ပရေၚ်စၟဳတ်တံရ။

ဒေသကၞောတ်ၜဳရေဝ်သၠုၚ်ကျာ တွဵုရးဍုၚ်မန်ဂှ်ဝွံ သီုကဵုဒှ်ဒေသ ဒၞါဲဒတန်ဌာန်ဂအုပ်ဗဟဵု ဗော်ဍုၚ်မန်တၟိ (NMSP) ဂကောံရပ်လွဟ်ကောန်ဍုၚ်အရၚ်မန် ဖျေံသ္ဇိုၚ်မွဲလေဝ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−KNU