ဗ္ဒိုပ်ဗၠာဲသၟိၚ်အခၠဵု တဂေါန်ဒေၚ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် (၄) တၠ ချိုတ်အာ

လှာဒကှ်၊ အဝ်ဂါတ် (၁၉)

ဗ္ဒိုပ်ဗၠာဲသၟိၚ် ဖျေံသ္ဇိုၚ် ကွာန်အခၠဵုတဂေါန်ဒေၚ် ပွိုၚ်ဍုၚ်လှာဒကှ်၊ တွဵုရးကရေၚ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် (၄) တၠ ချိုတ်အာလဝ်ဂှ် ဗော်သွးကောန်ဂကူကရေၚ် KNU ဗဟဵုတေံ လလောၚ်ပ္တိတ်လဝ် ပ္ဍဲဂိတုအဝ်ဂါတ် (၁၈) တေံရ။

တုဲကၠုၚ် ပ္ဍဲဂိတုအဝ်ဂါတ် (၁၅) အခိၚ်နူဂယး (၁၁) နာဍဳဂှ် ဂကောံဒပ်ပံၚ်ကောံ KNLA အာစိုပ်ဗ္တိုက်လဝ် ကုဗ္ဒိုပ်ဗၠာဲသၟိၚ်ကံၚ်ဇြဳပၞာန် ကောန်ဂကောံဒပ်ဗၠာဲသၟိၚ် သီုကဵုဒပ်ကံၚ်ဇြဳပၞာန်တံ ဇြဟတ် ၄၀ ပြၚ် မဖျေံသ္ဇိုၚ် မ္ဒးမံၚ်ဒၟံၚ်ဂှ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ်ရ။

အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ၄ တၠ ချိုတ်အာလဝ်တုဲ ပရေၚ်ဂွံဝပ်ဇီုကပိုက်ဒးတံဂှ် ဂၠိုက်ဂၠါဲဒၟံၚ်ဖိုဟ်တုဲ လ္ပာ်ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဂှ် ဇီုကပိုက်ပြဟ်လလုဲအာတံ ဟွံမွဲပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဗ္ဒိုပ်ဗၠာဲသၟိၚ်အခၠဵုတဂေါန်ဒေၚ်ဂှ်ဝွံ နွံတန်တဴဒၟံၚ် ပ္ဍဲပွိုၚ်ဍုၚ်ဝေန်ယျေ၊ ဒပ်မဟာ (၆) ခရိုၚ်ဒူပလာယာ တိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ်တံဂှ်တုဲ အပ္ဍဲအခိၚ်သီအဝဵုဏံဂှ် မ္ၚးနူကောန်ဒပ်ဗၠာဲသၟိၚ်တံဂှ် လ္ပာ်ဒပ်ကံၚ်ဇြဳပၞာန်တံလေဝ် ကၠုၚ်ကေတ်လဝ်ဂီုကၠီုရ။

လ္ပာ်ဂကောံဒပ်ပံၚ်ကောံ KNLA ဂှ် မွဲဏှမွဲဏှ ကၠောန်သ္ပဗ္တိုက်ဒၟံၚ် ကုဗ္ဒိုပ်ဗၠာဲသၟိၚ်အခၠဵုတဂေါန်ဒေၚ် နကဵုလွဟ်ဇၞော်၊ လွဟ်ဍောတ်တံသၟးဟွံက သီုကဵုသနာ်ပါတံဂှ်ရ လ္ပာ်ကံၚ်ဇြဳပၞာန်တံ ဇီုကပိုက်ပြဟ်လလုဲဂၠိုၚ်ဒၟံၚ်ရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−KNU