ဒးဒုၚ်ပ္တိတ်နူကမၠောန်ပ္ဍဲ လက်ထက်ကံၚ်ဇြဳပၞာန်ဏံဂှ် အသိၚ်သၠုၚ်တိုန်

လ္ဂုၚ်၊ အဝ်ဂါတ် (၁၉)

သၟာကမၠောန် မဒးဒုၚ်ဍဵုဍိုက်ဒၟံၚ် ပ္ဍဲလက်ထက်ကံၚ်ဇြဳပၞာန်သီအဝဵုဏံဂမၠိုၚ်ဝွံ ဟွံဂွံပွစဵုဒၞါနူကဵုသၞောဝ်မွဲသာ် ထ္ၜးဟိုတ်နာနာသာ်တုဲ ဒးဒုၚ်ပ္တိတ်နူကမၠောန်တံ အသိၚ်သၠုၚ်တိုန်ကၠုၚ်ဂှ် ဂကောံသၟာကမၠောန်တံ ဟီုရ။

အတိုၚ်လိက်ကံက်ကပှ်လဝ်တၚ်နၚ် ဂကောံကေၚ်ကာသၟာကမၠောန်စပ်ကဵုဍုၚ်နာနာ (ILO) ဂှ်မ္ဂး ကြဴနူဒပ်ပၞာန်သီအဝဵု ပ္ဍဲကဵုသၞာံ ၂၀၂၁ ဂိတုဖေဖဝ်ဝါရဳ (၁) တေံတုဲ ဒမြိပ်ဒးဒုၚ်ပ္တိတ်နူကလောန်ဂှ် သၠုၚ်တိုန်ကၠုၚ် စဵုကဵု ၄၁ တၟံကၠံတုဲ ပွမဒေါအ်ဒေၚ်နူကမၠောန်ဂှ်လေဝ် သၠုၚ်တိုန်ကၠုၚ် စဵုကဵု ၂၃ ဒသမ ၅ တၟံကၠံဂှ် လလောၚ်ပ္တိတ်လဝ် ပ္ဍဲဂိတုအဝ်ဂါတ် (၁၂) တေံရ။

ပ္ဍဲကဵုဏံ သၟာကမၠောန် ဒးဒုၚ်ပ္တိတ်နူကမၠောန် ၂၉ ဒသမ ၅ တၟံကၠံဂှ်ဝွံ ကလိဂွံလဝ်သြန်လေဲ အတိုၚ်မစၞောန်ပျးလဝ်တံဂှ်တုဲ မၞိဟ်ကလိဂွံလဝ်သြန်လေဲတံဂှ်လေဝ် ဒှ်ဒၟံၚ်မၞိဟ်တြုံတံကဵု သၟာကမၠောန်ဝှ်ကြံၚ်တံသၟးရဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

ဥက္ကဌ ဌာန်ဂအုပ်သမဂ္ဂသၟာကမၠောန်နာနာဍုၚ်ဗၟာ (FGWM) ဒဝ်မိုဝ်စန္ဒာမျေတ်ဂှ် ပ္ဍဲလက်ထက်ကံၚ်ဇြဳပၞာန်ဏံ ပွမဒးဒုၚ်ဝးပ္ကဝ်အခေါၚ်အရာမၞိဟ်တံဂှ်ဝွံ စိုပ်ကၠုၚ်ဒၟံၚ် အကာဲအရာသၠုၚ်အိုတ်တုဲ ပရေံအိုတ်ဂှ်တှ်ေ ထ္ၜးဟိုတ်နာနာတုဲ ဒးဒုၚ်ပ္တိတ်ဒၟံၚ်ကမၠောန်တံရောၚ်ဂှ် ဟီုရ။

“ ကြဴနူသီအဝဵုတုဲဏံ ပ္ဍဲကဵုဒးဒုၚ်ဝးပ္ကဝ်အခေါၚ်အရာမၞိဟ်တံဂှ် ပရေၚ်ဒးဒုၚ်ပ္တိတ်နူကမၠောန်တံဂှ်လေဝ် ဒှ်ဒၟံၚ်ဂၠိုၚ်အိုတ်ဏောၚ်။ အေ ဂှ်တှ်ေ ပရေၚ်ဝးပ္ကဝ်အခေါၚ်အရာမၞိဟ်တံဂှ်တှ်ေ ဒဵုကဵုအခိၚ်လၟုဟ်မ္ဂး စိုပ်ဒၟံၚ်ကဆံၚ်သၠုၚ်အိုတ်ယျဏောၚ်။ နကဵုတၟံကၠံမ္ဂး ဒှ်ဒၟံၚ် ၁၀၀ တၟံကၠံယျ။ ကေတ်အခေါၚ်ဇူ အတိုၚ်သၞောဝ်ကၟာတ်ကလောန်တံရဂှ် စိုပ်ဒၟံၚ်ဍာ် ပ္တိတ်ဒၟံၚ်ကလောန်တံရဏောၚ်။ မွဲပၠန်ဂှ် အရာမကဵုသတိ ဟွံဗဗွဲကဵုသၞောဝ် ထပ်ကဵုထပ်တံတုဲမှ ပ္တိတ်နူကလောန်တံဂှ်လေဝ် နွံတုဲ ဟိုတ်သ္ဒးပ္တိတ်နူကလောန်တံဂှ် နကဵုဗီုပြၚ်နာနာ သၟာကမၠောန်တံ ဒးဒုၚ်စသိုၚ် ဒးဂဗဒၟံၚ်ရ“ ဂှ် ညးသ္ဂးရ။

အတိုၚ်ဂလာန် ဂကောံကေၚ်ကာသၟာကမၠောန်စပ်ကဵုဍုၚ်နာနာ (ILO) တံဂှ်မ္ဂး ကြဴနူဒပ်ပၞာန်သီအဝဵုတုဲ နူကဵုသွာၚ်ညးဍုၚ်ကွာန် ဒေါအ်ဇူကမၠောန်ဂှ် သၠုၚ်တိုန်ကၠုၚ် စဵုကဵု ၃၉.၂ တၟံကၠံတုဲ ပ္ဍဲကဵုသွာၚ်ပရေၚ်ပညာ ဒှ်ဒၟံၚ်ဂၠိုၚ်အိုတ်ရောၚ်ဂှ် သ္ဂးရ။

ဒးဒုၚ်ပ္တိတ်နူကမၠောန်တုဲ မၞိဟ်ကလေၚ်ကၠောန်ကမၠောန် (၇၀) တၟံကၠံဂှ်ဝွံ ဂၠါဲဂွံလဝ် ကမၠောန်စသြန်ဂိတုတံဂှ်တုဲ သှ်ေ (၃၀) တၟံကၠံဂှ်ဝွံ ကၠောန်ကၠုၚ်ကမၠောန်ဇကုဇကုတံအိုတ်ဂှ် ထ္မံက်ထ္ၜးလဝ် ပ္ဍဲကဵုလိက်ကံက်ကပှ်တၚ်နၚ်ဂှ်ရ။

သၟာကမၠောန်ဒးဒုၚ်ပ္တိတ်နူကမၠောန်မွဲတၠဂှ် ပ္ဍဲအရာကလေၚ်ဂၠါဲကမၠောန်တံဂှ် ဒှ်အာလဝ်အခက်အခုဲတၟာဂလိုၚ်တုဲ ဍာ်ဒ္ကေဝ်မၞုံပၟိက် မအာတ်ကၠုၚ်တံ သၠုၚ်ဒၟံၚ်ဂှ်လေဝ် ဒးဂဗဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကြဴနူဒပ်ပၞာန်သီအဝဵုတုဲ ပိုယ်သၟာကမၠောန်တံ ဒးဒုၚ်ပ္တိတ်နူကလောန်ယျဏောၚ်ဟီုတှ်ေ သွက်ဂွံကလေၚ်ဂၠါဲကလောန်တၟိမွဲပၠန်ဂှ် နအလဵုအဲမ္ဂး အာယုက်ဇၞော်အာ၊ ၃၀ ပြၚ်အာတုဲ ဟွံကော်ကလောန်တံဂှ်နွံရ။ အိုတ်ကၞောတ် ပိုယ်တံ ဟိုတ်နူဒှ်အခက်အခုဲ ကုပရေၚ်စသုၚ်မံၚ်စံၚ်တုဲ ကၠောန်ကလောန်သ္အးဇ္ၚးဏောၚ် ချပ်လဝ်ဂှ် ကလောန်သ္အးဇ္ၚးတံရဂှ် ၜက်အာ ၃၀ တုဲမ္ဂး ဟွံကေတ်ရပုဟ် နဗီုပြၚ်သာ်ဏံတံ ပိုယ်တံ ဒှ်ဒၟံၚ်အခက်အခုဲရ။ ရဲဇိၚ်စက်တံမ္ဂးလေဝ် ယဝ်ရအာယုက်ဇၞော်အာမ္ဂး ဍေံတံဂှ် တဲဍိုန် ဒးစိုန်သ္ကီုလဝ်စက် ၃ သာ်ရောၚ်ဂးတုဲ ကော်ဒၟံၚ်သာ်ဏံရ။ ညအ်ဂှ်မှ ကော်ကဵုဂိတုဟွံသေၚ်ပုဟ် ကဵုကဵုတ္ၚဲတုဲ ဒးစှ်ေကဵုဒၟံၚ် ၁ ဂိတု ၂ ဂိတုဏီရ “ သာ်ဝွံ ညးဟီုလဴထ္ၜးလဝ်ရ။

မွဲလ္ပာ်ပၠန်ဂှ် သၟာကမၠောန်ဂမၠိုၚ်ဝွံ ပ္ဍဲအရာဂၠါဲကလောန်သြန်ဂိတုတံဂှ် တဲဍိုန် စဵုကဵု (၅) ဂိတုအခိၚ်လအ်လေပ်တုဲ သၟာကမၠောန်လ္ၚဵုတံဂှ် တိတ်ကၠောန်ကမၠောန်ဍုၚ်သ္အာၚ် နူကဵုဂၠံၚ်ဟွံလုပ်သၞောဝ်တံဂှ် သာသၠုၚ်တိုန်ကၠုၚ်ဒၟံၚ်ရ။

သ္ကိုပ်ပ္ညဳပ္ညပ်ဆက်စၠောံဍုၚ်ဗၟာ ILO ဂှ် သၟာကမၠောန်ဍုၚ်ဗၟာတံဝွံ ဒးဆေၚ်ဒၟံၚ်မုက် ကုအကာဲအရာ မခက်ခုဲဒၟံၚ်တံ မွဲတဲဓဝ် တၟေၚ်ၚ်တၟဟ်ဟ်တုဲ သွက်ဂွံရှ်ေသှ်ေတဴ အခေါၚ်အရာသၟာကမၠောန်တံဂှ် ပၟိက်ဇၞော်ဒၟံၚ်ယျဂှ် သ္ဂးလဝ်ရ။

H & M ကမၠောန်သွံတြးဗွိုက်လ္တက် ဒုတိယဇၞော်အိုတ် လ္တူဂၠးတိဏံဂှ် ဟိုတ်နူဍဵုဍိုက်ဒၟံၚ် ကောန်ကမၠောန် ပ္ဍဲကဵုရုၚ်ဇိၚ်ဗွိုက်လ္တက် အပ္ဍဲဍုၚ်ဏံ သၠုၚ်တိုန်ဒၟံၚ်ဂှ်ရ တိတ်နူဍုၚ်ဗၟာရဏောၚ်ဂှ် ဌာန်ပရိုၚ်ဍုၚ်သ္အာၚ်လ္ၚဵုတံ ထ္မံက်ထ္ၜးကၠုၚ်ရ။

ပရိုၚ်−သြၚ်လောန်တိုၚ်(မ်)

ဗီု−NUB