ကရာချဳ – အဝ်ဂေတ်(၁၉)
ပ္ဍဲကၟိန်ဍုၚ်ပါကေဿတာန်သ္ကုတ်ဗၟံက်ဂှ် နကဵုတၚ်စောတ်စောဲ ညးလုပ်ဘာသာခရေတ်ယာန် ၜါတၠ ပျုတ်ဗ္ဒေက်က္ဍိုက်ဓရိုက်လဝ် ပြကိုဟ်ကိုဝ်ရအာမ် ဂကောံမၞိဟ်မောဿလေန် စံၚ်ပလီုလဝ် ဘာကျာ် ကေုာံသ္ၚိဒၟံၚ်တအ်တုဲ ညးက္ဍိုက်ဓရိုက်လဝ်ပရေၚ်ဘာသာ ၜါတၠဂှ်လေဝ် ဒပ်ဗၠာဲသၟိၚ်တအ်ရပ်ကေတ်လဝ်ရ။
ဂကောံမၞိဟ်ဒေါသတိတ်ဒၟံၚ်ဂှ် ပလီုပလာ်လဝ် ဘာကျာ်ခရေတ်ယာန် (၄)ဘာတုဲ သ္ၚိဒၟံၚ်ဗွဲမဂၠိုၚ်ဂှ်လေဝ် ဟိုတ်နူစံၚ်ပလီုလဝ်ဂှ်ရ ကောန်ဒပ်အရန်ပါကေဿတာန်တအ် ဒးမၚ်ရံၚ်ကျောဝ်ဒၟံၚ် ပ္ဍဲသ္ကုတ်ဗၟံက်ကၟိန်ဍုၚ်ရဂှ် ဂွံတီကေတ်ရ။
သ္အာၚ်နူဂှ်ပၠန် သုသာခရေတ်ယာန်မွဲဂှ်လေဝ် ပလီုပလာ်ဏာလဝ်ရဂှ် ညးဒေသကီု သီုက္ဍိုပ်သ္ကိုပ်ပ်ကွာန်တအ် ဟီုလဴလဝ်ရ။
ပ္ဍဲပါကေဿတာန်ဂှ် ဂဗုတ်ဂရိုဟ်ပျုတ်ဗ္ဒေက်က္ဍိုက်ဓရိုက်ဂှ် ဒးဒုၚ်ကဵုဒဏ်ဂစိုတ်ရောၚ် ပျးဌာန်လဝ်တုဲ စဵုကဵုအခိၚ်လၟုဟ် ညးမွဲတၠလေဝ် ၜိုန်ရဟွံဂွံဖျေံလဝ်ဒဏ်ဂစိုတ်ဏီလေဝ် ဒးဒုၚ်ၜုၚ်တက်လဝ်ကဵု ဂကောံမၞိဟ်ဒေါသတိတ်ဒၟံၚ် မာန်ရဂှ် ဂွံတီကေတ်ရ။
ဝန်ဇၞော်မၚ်သ္ၚိ အာန်ဝါအေဝ်ဟာတ်ကက္ကာဂှ် စရိတ်ဂကောံမၞိဟ်အောန် ခရေတ်ယာန်တအ် ဒးဒုၚ်ဆောံလေၚ်လဝ်ဖအိုတ်ဂှ် ဒးစဵုဒၞာကဵုရောၚ် ဟီုသ္ဂးလဝ်တုဲ ညးပါလုပ် ပ္ဍဲပရေၚ်ပ္ကီုပရာပ်သီုဖအိုတ်ဂှ်လေဝ် ကေတ်အာအရေဝ်ရောၚ်ဂှ် ကဵုလဝ်ကတိပါၚ် ဟီုလဝ် ပ္ဍဲဂိတုအဝ်ဂေတ် စၟတ်တ္ၚဲ (၁၈)ရ။
“သွက်ဂွံကဵုဖျုန်လေဝ် ဟၟဲတုဲ သွက်ဂွံဒးဖေက်လေဝ် ဟၟဲပုဟ်” ဂှ် ဝန်ဇၞော်ဗၠာဲသၟိၚ် ဟီုလဝ် ပ္ဍဲကောံဓရီုဂကောံဝန်ဇၞော်အလန်ပထမ ဗလးပ္တိတ်လဝ်တိုက်ရိုက်ဂှ်ရ။
စဵုကဵုအခိၚ်လၟုဟ် ညးပါလုပ် ပ္ဍဲပရေၚ်ဗတိုက်ပလီုခရေတ်ယာန်တအ် က္တဵုဒှ်လဝ် ပ္ဍဲဂကောံဂျာရာန်ဝါရာ (၁၂၈)တၠဂှ် ရပ်ဂွံလဝ်ရဂှ် ဒပ်ဗၠာဲသၟိၚ် ဟီုသ္ဂးလဝ်ရ။
အတိုၚ်က္ဍိုပ်သ္ကိုပ်ကွာန် ကေုာံ ညးဒေသတအ် ဟီုသ္ဂးလဝ်မ္ဂး အခိၚ်ဒှ်ပရေၚ်ပရောဂှ် ဟိုတ်နူဒပ်ဗၠာဲသၟိၚ် ဟွံလုပ်ထိၚ်ဒဝ်လဝ်တုဲ ဒးဒုၚ်ဗတိုက်ပလီုပလာ်လဝ် ပွိုၚ် (၁၀)နာဍဳပြၚ်ရဂှ် ဟီုလဝ်တုဲ ဒပ်ဗၠာဲသၟိၚ်ဂှ်မ္ဂး ဟီုတးပါဲလဝ်တုဲ ကောန်ဒပ်ပရေၚ်ဂီုကၠီုတအ် တာဒၞာလဝ် အကာဲအရာညံၚ်ဟွံဂွံပရေံကၠုၚ် လ္တူနူဏံရဂှ် က္လေၚ်ဟီုပလန်လဝ်တဲရ။
ပ္ဍဲပရေၚ်ဒဒှ်ပဋိပက္ခဂှ် မောဿလေန်ဂၠိုၚ်ကဵုလ္ၚီတအ် ရပ်ကေတ်လဝ် ပသဲတၞုၚ်၊ လေံဒုက်၊ မြ ကေုာံ ၜုန်တအ်ရဂှ် ညးဒေသတအ်ဟီုလဝ်တုဲ ညးလုပ်ဘာသာခရေတ်ယာန် ဂၠိုၚ်ကဵုကၠံတအ်ဂှ် ဒးဂြိပ်ဒဴတိတ် နူဒၞာဲဒၟံၚ်ညးတအ်တုဲ လုပ်ဇူဗ္ဒာဲဒၟံၚ် ပ္ဍဲခရိုၚ် နွံကရပ်ဂှ် မွဲခရိုၚ်ရဂှ် ဂွံတီကေတ်ရ။
ထောံသ္ၚိဌာန်တုဲ ညးဒးဂြိပ်ဒဴလဝ်တအ်ဂှ် အခိၚ်လၟုဟ်ဏံ က္လေၚ်စဴကၠုၚ်သ္ၚိဌာန်ညးတအ်ရဂှ် က္ဍိုပ်သ္ကိုပ်ကွာန်မွဲတၠ သ္ပလဝ်ဒ္တန်ကဵု ဌာန်ပရိုၚ်ရိုက်တာတုဲ ဂကောံအခေါၚ်အရာမၞိဟ်တအ်ကဵု ညးတာလျိုၚ်ကၟိန်ဍုၚ်နာနာအမေရိကာန်ဂှ်မ္ဂး သွက်ဂွံစဵုဒၞာကဵု မၞိဟ်ဂကောံဇြဟတ်အောန်တအ်ဂှ် အာတ်မိက်လဝ် ဂကောံညးပိုၚ်ပြဳအဏာတအ်ရ။
Ref,CNA
sanlontai