တၞၚ်သြဳ၊ အဝ်ဂေတ်(၂၀)
ရးဒေသဇၞော်တၞၚ်သြဳ၊ ပွိုၚ်ဍုၚ်တၞၚ်သြဳ၊ ပ္ဍဲကွာန်တမုတ်ချုံဂှ် ဟိုတ်ဟၟဲမွဲသာ် ဒပ်ကံၚ်ဇြဳပၞာန် ပန်ပှ်ောပြိုက်ဂစိုတ်ဏာလဝ် ကောန်အရာပ်ညးဍုၚ်ကွာန်မွဲတၠဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန်ကၠုၚ်အောပ်မၚ်ဒၟံၚ်ကၚ်ဂှ် ဟိုတ်ဟၟဲမွဲသာ် ပန်ဂစိုတ်လဝ် ကိုဝ်ထောန်ဝေန်နိုၚ် အာယုက်(၃၅)သၞာံ ကွာ်ကၠုၚ်ဒၟံၚ် အတိုၚ်ဂၠံၚ်ကွာန်ဂှ် ပ္ဍဲဂိတုအဝ်ဂေတ် စၟတ်တ္ၚဲ (၁၇)အခိၚ်ဗ္တံ ၜိုတ်(၈)နာဍဳရ။
ကြဴနူဂှ်တုဲ ဒပ်ကံၚ်ဇြဳပၞာန် ပ္ဍိုက်ကေတ်ဏာ ဇွကိုဝ်ထောန်ဝေန်နိုၚ်တုဲ ကလေၚ်ပ္အပ်ကဵုလဝ် ဂကောံသ္ၚိကၟိန်အိန်ထံၚ်ညးလေဝ် ဟၟဲရဂှ် ညးဒေသတအ် ဟီုသ္ဂးလဝ်ရ။
ဇွကိုဝ်ထောန်ဝေန်နိုၚ် ကၠေံဒၟံၚ် နူအခိၚ်ချိုတ်အာတုဲတေံဂှ် ၜိုန်ညးဍုၚ်ကွာန်တအ် ဗက်ဂၠိုက်ဂၠာဲဒၟံၚ်ကီုလေဝ် စဵုကဵုဂိတုအဝ်ဂေတ် စၟတ်တ္ၚဲ (၁၉)ဏံ ဟွံက္လေၚ်ဆဵုညာတ်လဝ်ဏီရဂှ် ဂွံတီကေတ်ရ။
ညးဒေသတအ်ဂှ် ဒပ်ကံၚ်ဇြဳပၞာန် တိုပ်စွံလဝ် ဇွကိုဝ်ထောန်ဝေန်နိုၚ် အကြာဗ္ဒာဲကွာန်ဂှ် ပ္ဍဲမွဲမွဲဒၞာဲ ဒှ်မာန်ရဂှ် တော်ချချိၚ်ခယျကေတ်ဒၟံၚ် နွံရ။
ဒပ်ကံၚ်ဇြဳပၞာန်ဂှ် သ္ပတံနူ ဂိတုအဝ်ဂေတ် စၟတ်တ္ၚဲ (၁၇) တုဲကၠုၚ်တေံတုဲ ပ္ဍဲတမုက်ချုံ၊ မဝ်တုံဗၟံက်၊ ထုံခါ ကေုာံ သ္ကုတ်ဂၠံၚ်မဝ်တုံကဵု ထုံခါ၊ လ္တူဍုၚ်တၞၚ်သြဳတအ်ဂှ် ကၠောန်ချဳဒရာၚ်ဒၟံၚ်ပရေၚ်ပၞာန်တုဲ ပွမမၚ်ကၚ်ကီု၊ ပွမထ္ပက်ကရောၚ်ပၞာန်ကီု ကၠောန်သ္ပကၠုၚ်ဒၟံၚ် အဆက်ဆက်ရ။
ဂိတုဂျူလာၚ် စၟတ်တ္ၚဲ (၃)တုဲကၠုၚ်တေံလေဝ် နူကဵုလ္ပာ်ဒပ် ခရလ ၅၆၁ မၞုံဗ္ဒာဲဒဒန်တၞၚ်သြဳ ဟိုတ်ဟၟဲမွဲသာ် ဟိုတ်နူပန်ဖျေံလဝ်ဏာလွဟ်ဇၞော် ပ္ဍဲလ္ပာ်ကွာန်ဗာန်လဝ် ကေုာံ ကွာန် ၆ မိုၚ် တုဲ ညးဒေသ (၂)တၠ ဒးလဝ်ဘဲဝပ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် -Social Media
sanlontai