ပံၚ်၊ အဝ်ဂေတ်(၂၀)
တွဵုရးဍုၚ်မန်၊ ဍုၚ်ပံၚ်၊ အရာပ်ခဒုၚ်သှ်ေ၊ ဗ္ဒာဲသၞေဟ်ကၚ်ကံက်အခေါန်သၠာ ၚုဟ်လုပ်ဍုၚ်ဂှ် ပ္ဍဲဂိတုအဝ်ဂေတ် စၟတ်တ္ၚဲ (၁၈) အခိၚ်ဇိုၚ်သဝ်တ္ၚဲဂှ် ဟိုတ်နူဟွံဗဒေါံကဵုကွဳလိုန်ဓာတ်ဂးတုဲ ကောန်အရာပ်ညးဍုၚ်ကွာန် (၂)တၠ ဒးဒုၚ်ပန်ပှော်ရပ်ကေတ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် (၃)နာဍဳ ဃောကောန်ဒပ်ကံၚ်ဇြဳပၞာန် သီုကဵုဗၠာဲသၟိၚ်တအ် စၟဳစၟတ်ဒၟံၚ် ယာဉ်ကွဳစက်အာတရဴဂှ် ကွဳလိုန်ဓာတ် နူကွာန်ခရိုၚ်ပြေၚ် ဒဳလုပ်ကၠုၚ် လ္ပာ်ဍုၚ်ပံၚ်မွဲဖ္ဍိုက် ဟွံဒုၚ်စၟဳစၟတ်တုဲ ဒဳတိတ်အာလဝ်ဂးတုဲ ပန်ပှော် ရပ်ကေတ်လဝ်ရ။
ဟိုတ်နူဒးဒုၚ်ပန်ရပ်ကေတ်လဝ်တုဲ ကိုဝ်သာန်မေန် အယုက် (၃၇)သၞာံ ဒၟံၚ်ကွာန်ဥတ္တတာ ကေုာံ သဝ်ဘိုဝ်ဘိုဝ်ဟုၚ် အယုက် (၁၉)သၞာံ ဒၟံၚ်ကွာန်တာပ်မှူချောၚ်တအ် ညး (၂) တၠ ဒးလဝ်မကမ် ဂွံလဝ်ဘဲဝပ်တုဲ ကွဳလိုန်ဓာတ် ဗကပ်စှ်ေလဝ်ရ။
ဒးဒုၚ်ပန်ကဵုလွဟ်တုဲ ဃောကွဳလိုန်ဓာတ်ဗ္ကပ်စှ်ေအာဂှ် ပ္ဍဲကိုဝ်သာန်မေန်ဂှ် ဒးလဝ်ဘဲဝပ်မကမ် ပ္ဍဲဒဳပါဲ သီုဇကုထာတ်သံက်လဝ်ကီု၊ ပ္ဍဲဘိုဝ်ဘိုဝ်ဟုၚ်ဂှ် ဒးလဝ်လွဟ်မကမ် ပ္ဍဲဒဳပါဲ သီုပ္ဍဲဂဒအ်ဗြာတ် ဒးလဝ်ဘဲဝပ် သီုညးၜါရ။
ညးဒေသဒးဒုၚ်ပန်ရပ်ကေတ်လဝ် (၂)တၠဂှ် ကံၚ်ဇြဳပၞာန် လွဳလွတ်ကဵုလဝ် ပ္ဍဲရုၚ်ဂဥုဲညးဍုၚ်ကွာန်ပွိုၚ်ဍုၚ်ပံၚ်တုဲဂှ် ရပ်ထိၚ်ဒက်လဝ် ပ္ဍဲဗဒိုပ်ဗၠာဲသၟိၚ်ပံၚ်တုဲ ကၠောန်ဒၟံၚ်ပရေၚ်စၟဳစၟတ်ရဂှ် ဂွံတီကေတ်ရ။
ပ္ဍဲဗ္တံတ္ၚဲဂှ်လေဝ် မာံခေတ်ဥူဇျှာန် မဒှ်ကောန်ဗၠာဲ ဥူယျေဝ်ထောဋ် ဒၟံၚ်ကွာန်ကြုၚ်ကဒက်၊ ပွိုၚ်ဍုၚ်ဇြပ်ဗုဂှ် ဃောဝေၚ်ဒၟံၚ်အထောဋ်ဗုံအဳနာဂါဂှ် ဒှ်လဝ်ပရေၚ်ပါ်ခတိုဟ်တုဲ ဒးလဝ်ဘဲဝပ်ရ။
ကောန်ၚာ်ဒးလဝ်ဘဲဝပ် ဟိုတ်နူပရေၚ်ပါ်ခတိုဟ်ဂှ် ပလံၚ်ဗစိုပ်ဏာလဝ် ပ္ဍဲရုၚ်ဂဥုဲဇြပ်ဗုတုဲ မိမကောန်ၚာ်တအ်ဂှ် ဂကောံဒပ်ဗၠာဲသၟိၚ်တအ် ကော်စၟဳစၟတ်ဒၟံၚ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – SAC
sanlontai