သ္ကဵုသာသနာအေဲဇြစှ်ေရောၚ်သ္ဂးတုဲ ပါလုပ်သီုကောန်ၚာ် အယုက် (၁၂)သၞာံ ဒးဒုၚ်ရပ်ပံက်လဝ်ဂဗုတ် (၁၄)တၠ

နေဗျဳဒဝ်၊ အဝ်ဂါတ်(၂၀)

လဝေၚ်ဇာတ်ဇမၠေံ နွံယၟု “မုလ္ပစၟဳစညိ”(ဘာမှမမျှော်လၚ့်နဲ့)ဂှ် ညံၚ်သာသနာကျာ် သ္ဂောံအေဲဇြကှ်စှ်ေ ဟိုတ်နူဖန်ဗဒှ်ထ္မံက်လဝ်ရုပ်ရဴ နကဵုတၚ်ရန်တၟအ်နွံနွံရဂးတုဲ ပါလုပ်သီုကောန်ၚာ်အာယုက် (၁၂)သၞာံ ဒပ်ကံၚ်ဇြဳပၞာန်တအ် ရပ်ကေတ်လဝ် မၞိဟ် (၁၄)တၠ နကဵုအမှု သ္ကဵုသာသနာအေဲဇြစှ်ေရဂှ် လလောၚ်ပ္တိတ်လဝ် ပရိုၚ်ရ။

တုဲကၠုၚ်ဂိတုအဝ်ဂါတ် စၟတ်တ္ၚဲ (၈)ဂှ် ပါလုပ်သီုဒါရိုက်တာကောန်ဍုၚ်သ္အာၚ် ကေုာံကောန်ၚာ်အာယုက် (၁၂)သၞာံ မပါလုပ်လဝ် ပ္ဍဲလဝေၚ်ဇာတ်ဇမၠေံတအ် မၞိဟ် (၁၄)တၠဂှ် ဒပ်ကံၚ်ဇြဳပၞာန် ရပ်ကေတ်ဏာလဝ်ရ။

ကံၚ်ဇြဳပၞာန်ဂှ်တှ်ေ လဝေၚ်ဇာတ်ဇမၠေံဏံ နကဵုပြဝချဳဒရာၚ်ထ္ၜးရုပ် ဇကုဇကောဝ်၊ ဒွါပိုၚ်တံဂှ် သ္အာၚ်နူသ္ပကဵုဂုဏ်သိက္ခာ၊ ဒ္ဂေတ်ဝတ် ခၟဳသၚ်တံသ္ဂောံစှ်ေ သ္ဂောံဇီုကပိုက်ဒးဂှ် သီုကဵုဇီုကပိုက်ကၠေံဒးဒၟံၚ် ဂၠံစိုတ်ကောန်တၟအ် ကောန်ဗုဒ္ဓဘာသာတံတုဲ ဟိုတ်နူပြဝပျုတ်ဗ္ဒေက် ပရေၚ်ရှ်ေသှ်ေ ဘာသာသနာဂှ်တုဲ ရပ်ဒက်လဝ်ရဂှ် ထမံက်ထ္ၜးလဝ်ရ။

တၠဂုဏ်မေန်သုည (ဗုဒ္ဓတက္ကသိုလ်) ညးမဒှ် တၠဂုဏ်အ္စာအာက္ဍိုပ်ပၠန်ဂတးကညၚ် ဇာနှိက်ဘာသာစုၚ်မွဲဇကုဂှ်တှ်ေ လဝေၚ်ဇာတ်ဇမၠေံ “မုလ္ပစၟဳစညိ”(ဘာမှမမျှော်လၚ့်နဲ့)ဂှ် ကၠောန်လဝ်ညံၚ်သာသနာသ္ဂောံအေဲဇြစှ်ေဟွံသေၚ်တုဲ ဒှ်လဝေၚ်ဇာတ်ကဵုပညာမွဲပိုဒ်ရဂှ် မြော်လဝ်ဂလာန်ကဵု သြၚ်လောန်တိုၚ်မ်ရ။

“လၟုဟ်ဏံဂှ် သ္ၚဳဂၠိပ်ပါ်ကရေက်လဝ် ဂၠံၚ်တရဴသာသနာဍာံဍာံဇေတ်တ်ဂှ်တုဲ တက်ထ္ၜးလဝ်ရ။ ကဵုပညာတက်ထ္ၜးလဝ် ပရေၚ်ပြုပြေၚ်ပြံၚ်သၠာဲရ။ ဣဏံဂှ် ရပ်ဏောၚ်ဟေံဟီုတှ်ေ သက်က်ရ ဟီုလဝ်နူကလၚ်ဂှ် လကျာ်ပလီုကောန်သမ္ဘာညးတံဂှ်ဟေၚ် သ္ကဵုဒှ် ပရေၚ်သာသနာအေဲဇြစှ်ေရ။ တက်လဝ်လၟုဟ်ဏံ မိက်သ္ဂောံကဵု သာသနာအးဇ္ၚးတုဲ ကဵုပညာ တက်လဝ်ရဂှ် တၠဂုဏ်တံ ညာတ်ကေတ်ရ” သာ်ဝွံ မြော်လဝ်ဂလာန်ရ။

သ္အာၚ်နူဏံပၠန် လကျာ်ပလီုပလာ်လဝ်ကောန်သမ္ဘာ ညးတံ ကလေၚ်ဗလးလဝ် နူကဵုအမှု၊ မ္ၚးနူထဍေၚ်ပ္တိတ်ခမဳသၚ်အာတေၚ်စိုပ် ပရေၚ်လကျာ်သွံစလဝ် တိဘာလကျာ်တံ နူဘာတံ ဗီုရုပ်ရမျာၚ် ဂွံဆဵုကေတ်မံၚ်လ္တူဇာနှိက်ပရေၚ်မၞိဟ်တံ မွဲဏှမွဲဏှ ကၠောန်သ္ပ မံၚ်စံၚ်ဒၟံၚ် ဟွံကိတ်ညဳကဵု ဝိနယ်ခမဳသၚ်တံကဵု ညးဗြဴတံဟေၚ် သ္ကဵုသာသနာအေဲဇြစှ်ေ ဍာံဍာံဇေတ်တ်ရဂှ် တၠဂုဏ်မေန်သုည ထပ်တုဲ မြော်လဝ်ဂလာန်ဏီရ။

ပ္ဍဲလက်ထက်ကံၚ်ဇြဳပၞာန်သီအဝဵု အကြာညးထံက်ဂလာန်ဒပ်ပၞာန်တံ ကော်ဂးဒၟံၚ်သၟိၚ်ပ္တန်သာသနာဂှ် မ္ၚးနူပွရပ်ဒက်ဂစိုတ်ဂယိုၚ် ကျာ်ဇၞော်ပ္တန်သာသနာတံတုဲ ရပ်ဒက်ဂစိုတ်ဂယိုၚ်ဒၟံၚ် ခမဳသၚ်ပါလုပ်ဒၟံၚ် ပ္ဍဲပၠန်ဂတးကညၚ်တံရ။

ဟိုတ်နူကၠောန်သ္ပမံၚ်ဗီုဏံဂှ်ရ သာသနာကျာ်ဂှ် သာတုဲဂြုဲဂြေဟ်လီုလာ်ကၠုၚ်ရဂှ် ခမဳသၚ်တၠဂုဏ်အ္စာတံ ထံက်ထ္ၜးလဝ်အိုတ်ရ။

တုဲကၠုၚ်ဂိတုဂျူလာၚ် စၟတ်တ္ၚဲ (၂၄)ဂှ် လဝေၚ်ဇာတ်ဇမၠေံ “မုလ္ပစၟဳစညိ” (ဘာမှမမျှော်လင့်နဲ့) (Don’t expect anything!)ဂှ် နူကဵု isi Dhamma Youtube Channel မွဲကဆံၚ် ဗလးလဝ်ရဂှ် ဂွံတီကေတ်ရ။

အ္စာကၞေဟ်၊ ဒါရိုက်တာDidier Nusbaumer ကောန်ဍုၚ်ဇြွေတ်သလာန် ညးအာက္ဍိုပ်တက်လဝ် လဝေၚ်ဇာတ်ဇမၠေံဂှ်ကဵု ညးထ္ၜးလဝ်ရုပ် သာန်ဝေန်(က)ဥူဇာနိန္ဒ၊ ယောန်အိခေန်(က)ယောန်န်၊ ဇြာနဳဥူ၊ ဝေန်မိုဝ်၊ ကျဝ်တေတ်ထို(က)ဖိုဝ်ထူ၊ ယျေဝ်လေန်ထောန်(က)ကိုယျေဝ်၊ ဆာန်န်မေ(က)ခေန်ရူပါရှေန်တ၊ ယှိယဳဝေန်(က)ကေဝ်ဝ်၊ ကံၚ်ဇြာန်ထောန်(က) ဂျေဝ်ဇြေန်၊ မိုဝ်ပျေအ်အ်တူ(က)ဂျူဂျူဇြာန်၊ ခါဒဝ်မဳ(က)ခါခါ၊ ဖျဵုမံၚ်ၚ်(က)ဂျဵုသေတ်ဒွေန်၊ ဉာဏ်လေန်ဖျဵု(က) ဘရိုၚ်ယာန်တံ ဒးဒုၚ်ရပ်လဝ်ရ။

ပရိုၚ် – သြၚ်လောန်တိုၚ်(မ်)

ဗီု – ကဏ္ဍလဝေၚ်ဇာတ် “မုလ္ပစၟဳစညိ”(ဘာမှမမျှော်လင့်နဲ့)မွဲကဏ္ဍ