ဂကောံဇြဟတ်ပၠန်ဂတးကျာ်ထဝ် ကၠောန်ရေၚ်တၠုၚ် ကမၠောန်ပရေၚ်ထိၚ်ဒဝ်တိဍာ် ကေုာံပရေၚ်စၟဳစၟတ်

ကျာ်ထဝ် – အဝ်ဂါတ်(၂၀)

ပ္ဍဲတိုဝ်ဂုက်၊ ကျာ်ဗကာံ၊ သဓုံသု၊ ကျောက်ကလာပ်၊ ပေယှေတ်ဇြေယ် ကေုာံ ဒၞာဲလုပ်ဍုၚ်တုၚ်ဇြယာတ် မၞုံဗ္ဒာဲဍုၚ်တုၚ်ဇြယာတ်ဂှ် ကၠောန်ရေၚ်တၠုၚ်လဝ် ကမၠောန်ပရေၚ်ထိၚ်ဒဝ်တိဍာ် ကေုာံ ပရေၚ်စၟဳစၟတ်ရဂှ် ဂကောံဇြဟတ်ပၠန်ဂတးကျာ်ထဝ် KRF လလောၚ်တြးလဝ်ရ။

သ္ပတံနူ ဂိတုအဝ်ဂါတ် စၟတ်တ္ၚဲ (၁၈) အခိၚ်နူပြဟ် တုဲကၠုၚ်တေံတုဲ KNU/KNLA၊ KRF၊ ABSDF၊ ဂကောံကရောၚ်ပၞာန်ဝန်ပလွေနေတ် ကေုာံ (ပကဖ)ကျာ်ထဝ်တအ် ပံၚ်တောဲတုဲ ကၠောန်ရေၚ်တၠုၚ်လဝ် ကမၠောန်စၟဳစၟတ်ရ။

အခိၚ်ကၠောန်ရေၚ်တၠုၚ်ဒၟံၚ် ကမၠောန်ပရေၚ်စၟဳစၟတ်ဂှ် ဒဒှ်ရတၚ်ဂုဏ် ကုညးဍုၚ်ကွာန် ပါလုပ်ပံၚ်တောဲလဝ် ဗွဲမမိပ်မြဟ်ကတိုက်ကၟဟ်တုဲ ထံက်ပၚ်ကဵုလဝ် သ္ဂံၚ်ပၠန်ဂတးတအ် ကပေါတ်စၞစသုၚ်တအ်ရဂှ် ဟီုသ္ဂးလဝ်ရ။

ကမၠောန်ပရေၚ်ထိၚ်ဒဝ်တိဍာ် ကေုာံ ကမၠောန်ပရေၚ်စၟဳစၟတ်တအ်ဂှ် ရုပ်သီလဝ်ရ ပ္ဍဲတ္ၚဲတုဲကၠုၚ်တေံ အခိၚ်နူဂယး (၁၁)နာဍဳဒေါဝ်တ္ၚဲရဂှ် KRF ကဵုလဝ်သမ္တီရ။

ဗီုရုပ် – KRF