ဟိုတ်နူပရေၚ်ၚုဟ်သြန်ၝာတ် ကလိုက်ကၟဵုတုဲ ဒးထပ်ဂဗကၠုၚ် အကြေပ်ဂြတ်မာန်

မတ်မလီု၊ အဝ်ဂါတ်(၂၀)

ဟိုတ်နူပရေၚ်ကလိုက်ကၟဵု ၚုဟ်သြန်ၝာတ်သေံ မွဲၝာတ် ၚုဟ်မၞုံကၠုၚ် စဵုကဵု ၁၁၀ ဒ္ကေဝ်ဂှ်ရ ညးဍုၚ်ကွာန်တံ ထပ်ဒးဒုၚ်ကၠုၚ် အကြေပ်ဂြတ် ပရေၚ်စသုၚ်မံၚ်စံၚ်တံ မာန်ဒၟံၚ်ရဂှ် တၠပညာပရေၚ်ပိုန်ဒြပ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲကာလဒပ်ပၞာန်သီအဝဵုဏံ ၚုဟ်သြန်ၝာတ်သေံ တိုန်မံၚ်သိုက်က်တံ ဟိုတ်နူတက်တြးပ္တိတ် သြန်တၞး ၂၀၀၀၀ ဒ္ကေဝ်ကံၚ်ဇြဳပၞာန်တုဲ လွာဲဂှ်ဟေၚ် မွဲၝာတ်ဂှ် ၚုဟ်သၠာ်တိုန်ကၠုၚ် စဵုကဵုပွဳူ ၉၀ ဒ္ကေဝ်ရ။ 

ရန်တၟအ် သွက်သ္ဂောံထိၚ်ၚုဟ်သြတ်ၝာတ်သေံသၠုၚ်တိုန်မံၚ်ဂှ် သီုသွက်သ္ဂောံဖအောန်ဖျေံ ညးသုၚ်စောဲဒဝ်ဠာတံတုဲ သြန်ၝာတ်သေံဂှ် နဒဒှ်သြန်ရေၚ်တၠုၚ် ပရေၚ်ကဵုကေတ်သြန်ဍုၚ်နာနာတံကဵု ပရေၚ်ပသောၚ်စရၚ်တံမာန်ရဂှ် တိုက်သြန်ဗဟဵုကံၚ်ဇြဳပၞာန် လလောၚ်ပ္တိတ်လဝ် ပ္ဍဲဂိတုအဝ်ဂါတ် စၟတ်တ္ၚဲ ၁၄ ရ။

ဗွဲကြဴဏံ ၚုဟ်သြန်  ၝာတ်သေံဂှ် မွဲၝာတ် စဵုကဵု ၁၁၀ ဒ္ကေဝ်ပြၚ် ၚုဟ်မၞုံကၠုၚ်တုဲ ဂိတုအဝ်ဂါတ် စၟတ်တ္ၚဲ (၁၉)ဂှ် မွဲၝာတ်မ္ဂး ၚုဟ်ထပ်သၠုၚ်တိုန် လဝ် စဵုကဵု ၁၁၅ ဒ္ကေဝ်ရ။ 

တၠပညာပရေၚ်ပိုန်ဒြပ်မွဲတၠဂှ်မ္ဂး ၜိုန်ရစၟတ်သမ္တီထောံ သြန်ၝာတ်သေံ နဒဒှ်သြန်သုၚ်စောဲဍုၚ်သ္အာၚ်ကီုလေဝ် ပရေၚ်စိုပ်တရဴ နွံဟွံမာန်တုဲ ဟိုတ်နူၚုဟ်သြန်ၝာတ်ဇၞော်သၠုၚ်မံၚ်ဂှ်တုဲ ပွကြေပ်ဂြတ်တံ ထပ်တုဲက္တဵုဒှ်ကၠုၚ်မာန်ရောၚ်ဂှ် သ္ၚဳဂၠိပ်လဝ်ရ။

“ဒးဟီုတှ်ေ ကဵုကေတ် နသြန်ၝာတ်ကဵုဒှ် မုဒှ်ဒှ် ဒးကဵု နသြန်ဍုၚ်သ္အာၚ်ရ။ နွံမွဲဂှ်တှ်ေ ဍေံဂှ် သွက်ရဲကၠောန်မံၚ် ပရေၚ်သွံရာန်ကဵုသြန်ၝာတ်ဂှ်တှ်ေ နူဒဝ်ဠာ ဟွံဒးပြံၚ်စၠောံသြန်ၝာတ်ရ။ ဆ္ဂး နဒဒှ်ဖဵုပရေံပရေံမွဲဂှ် ဥပမာဍေံ- ဇကုဂှ် ဗၞိက်ပလံၚ်သေံ ညံၚ်သ္ဂောံဂၠိုၚ်နူဗၞိက်ပၠောပ်ဇကုဂှ် ပလံၚ်မာန်တှ်ေ သွက်ဇကု သြန်ၝာတ်သှ်ေဂၠိုၚ်ရ။ ဗီုဂှ်ဟွံသေၚ် ဇကုဂှ် ဗၞိက်ပၠုပ်နူဍေံတံရ ဂၠိုၚ်မံၚ်တှ်ေ ၚုဟ်ဒးဂၠာဲသြန်ၝာတ်ဂှ် သာတုဲ သၠုၚ်ရ။ လ္ဂောံကဵုအကာဲအရာပြဟ်ဟ်ဏံမ္ဂး နူလ္ပာ်ဏံ ပလံၚ်ကဵုဒၟံၚ်သေံ ဂၠိုၚ် နဂအုံဗွဝ်မာန်မံၚ်ဂှ်တှ်ေ သၟုဟ်ဓါတ် (gas)ရနွံမံၚ်၊ အေဂှ်လေဝ် အလဵုအသဳကဏ္ဍဏံရ ပလံၚ်မံၚ်။ သွက်ကဏ္ဍညးဍုၚ်ကွာန်တံဂှ်တှ်ေ ဒးဟီုကဵုသြန်ၝာတ်တှ်ေ ထ္ၜးမံၚ် သြန်နွံပၟိက်ရ။ ဟီုတှ်ေ ဇြဟတ်ရာန်သြန်ၝာတ်ဂှ် သာတုဲဇၞော်ကၠုၚ်ရ။ အသုၚ်စောဲလ္ပာ်ဒဝ်ဠာဂှ် ယအ်စှ်ေအာရ။ ဆ္ဂး ၝာတ်ဂှ်လေဝ် သြန်ဍုၚ်သ္အာၚ်ရ ပ္လံၚ်ပ္တိုန်ဗၞိက်ပလံၚ်ခိုဟ်ဟ်ဟွံမာန်တှ်ေ ၚုဟ်သြန်ၝာတ်လေဝ် တိုန်ကီုရ” သာ်ဝွံ သ္ဂးရ။

ကံၚ်ဇြဳပၞာန်ဂှ် ပ္ဍဲအရာကဵုကေတ်သြန်ကုဍုၚ်နာနာတံကဵု ပသောၚ်စရၚ်တံဂှ် ကဵုထောံအခေါၚ်သုၚ်စောဲ သြန်ၝာတ်သေံဂှ်ရ သွက်ညးကၠောန်မံၚ် ပရေၚ်သၠာဲဂတးဗၞိက်ကုဍုၚ်သေံတံသၟးရ ပြေပြံၚ်မာန်တုဲ ညးဍုၚ်ကွာန်တံ ထပ်တုဲဒးဂဗကၠုၚ် ဘဲဒဏ်ၚုဟ်သြန်ၝာတ်သေံသၠုၚ်တိုန်ကၠုၚ်မာန်ဒၟံၚ်ရ။

ဟိုတ်နူလလောၚ်တြးလဝ် သြန်ၝာတ်သေံဂှ် ရေၚ်တၠုၚ်နဒဒှ်သြန်ကဵုကေတ်သြန်ဍုၚ်သ္အာၚ်ကေုာံ ပသောၚ်စရၚ်တံမာန်ဂှ်ရ ပ္ဍဲဗွဝ်ဖျာ ပွရာန်ပကောံပကေဝ်သြန်ၝာတ်တံ သာတုဲဂၠိုၚ်ကၠုၚ်ရဂှ် ဂွံတီကေတ် ဇရေၚ်သၟာဗၞိက်ပယျဵုတံရ။ 

ၜိုန်ရစၟတ်သမ္တီထောံသြန်ၝာတ်သေံ နဒဒှ်သြန်ကဵုကေတ်သြန်ဍုၚ်သ္အာၚ်ကီုလေဝ် ဟိုတ်နူဒှ်သြန်ဍုၚ်သ္အာၚ်ဂှ်ရ ပလံၚ်ပ္တိုန်ဗၞိက်ပလံၚ်တံဟွံမာန်မ္ဂး တၚ်နွံပၟိက်သြန်ၝာတ်တံ သၠုၚ်တိုန်ကၠုၚ်မာန်တုဲ ၚုဟ်သြန်ၝာတ်လေဝ် ၚုဟ်ထပ်သၠုၚ်တိုန်ကၠုၚ်မာန်ရဂှ် တၠပညာပရေၚ်ပိုန်ဒြပ်မွဲတၠဂှ် သ္ဂးရ။

“ပ္တိတ်မဏံဟီုဂှ်လေဝ် သက်သာညိဟာသ္ဂးတုဲ ပ္တိတ်မံၚ်ရ။ ဆ္ဂး ပ္တိတ်ကီုဒှ် ဟွံပ္တိတ်ကီုဒှ် ပရေၚ်ဇီုကပိုက်ဍေံဂှ် ကၠုၚ်မံၚ်လၟိုန်ရ။ ဇြဟတ်ဂရိုဟ်ဍုၚ်သ္အာၚ်ဂှ် ဗီုလဵုမှ နကဵုဍာ်ဒ္ကေဝ်ဍေံဂှ် ကလေၚ်ကၠောန်ကံၚ်တာပ္ဍဲဍုၚ်ဟွံမာန်ပုဟ်။ လၟုဟ် ညးဟီု ညံၚ်ရဴဒၞါဂဂဵုတးပန် ကဵုထိုၚ်တာကီုရ အရာကၠုၚ်နူတမ်တေံဇေတ်တ်ဂှ် သက်သာညိဟာသ္ဂးတုဲ ဒှ်အဓိပ္ပာယ်တာဒၞါမံၚ်ရနွံ။ သၠာဲဂတးမံၚ်ကဵုသေံတံဟွံသေၚ်မွဲသာ် ညးအာလွဳယဲလ္ပာ်သေံတံ၊ ညးအာတိုန်ဘာတံ၊ ကဵုပရေၚ်ပိုန်ဒြပ်ဏံဟွံသေၚ်မွဲသာ် သွက်ညးဆက်စၠောံမံၚ်ကုသေံတံဂှ်တှ်ေ သာတုဲဂဗကၠုၚ်အကြေပ်ဂြတ်ညိရ။ ပ္ဍဲဍာ်ဇမၠေံဂှ်တှ်ေ တိတ်ကၠုၚ်မွဲမွဲယျဟီုတှ်ေ ပရေၚ်ဇီုကပိုက်ဍာ်ဇမၠေံတံ နွံရ” သာ်ဝွံ သ္ဂးရ။

ပြဟ်ဟ်ဏံဂှ်တှ်ေ တၠကမၠောန်စုက်လုက်ကဵုကံၚ်ဇြဳပၞာန် မၞံပ္ဍဲပယျဵုတံဂှ် နူကဵုရုၚ်ဝေၚ်ၛၚ်ဟွံလုပ်သၞောဝ်တံဂှ်မွဲကဆံၚ် ရာန်ကေတ်သြန်ၝာတ်သေံတံဗွဲမဂၠိုၚ်ဂၠေၚ်တုဲ ဟိုတ်နူဝေၚ်မံၚ်ၚုဟ်ဗွဝ်ဖျာ အတိုၚ်နွံပၟိက်တံဂှ်ရ ၚုဟ်သြန်ၝာတ်သေံ သၠုၚ်တိုန်ကၠုၚ်လဝ်ရဂှ် သၟာဗၞိက်ပယျဵုတံ ဟီုသ္ဂးလဝ်အိုတ်ရ။

ဟိုတ်နူၚုဟ်သြန်ၝာတ်သၠုၚ်တိုန်ကၠုၚ်ဂှ်ရ ဗၞိက်စၞစသုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်အရပ်စပ်မၞိဟ်၊ ဗၞိက်အပြောမ် သုၚ်စောဲပရေၚ်သိုၚ်ခၞံတံမပါလုပ် ကပေါတ်ဗၞိက်သုၚ်စောဲနာနာသာ် ဒးပၠောပ်ပ္တိုန်မံၚ် နူဍုၚ်သေံမွဲကဆံၚ်တံဂှ် မွဲဂကူမ္ဂး နူ ၁၀ တၟံကၠံ စဵုကဵု ၃၀တၟံကၠံပြၚ် ၚုဟ်သၠုၚ်တိုန်ကၠုၚ်ရ။

ဂကောံသုတေသန ISP-Myanmar ဂှ် တုဲကၠုၚ် ပ္ဍဲသၞာံဘဏ္ဍာ ၂၀၂၂-၂၀၂၃ဂှ် ပရေၚ်သၠာဲဂတးဗၞိက် သေံ-ဗၟာ ၜါဍုၚ်ဂှ် ဒဝ်ဠာအမေရိကာန် စဵုကဵု ၈ ဗဳလဳယာန်ပြၚ်နွံလဝ်တုဲ ပ္ဍဲပရေၚ်သၠာဲဂတးဗၞိက်ပယျဵုဂှ်တှ်ေ ပရေၚ်သၠာဲဂတး ကုဍုၚ်သေံဂၠိုၚ်အိုတ်ရဂှ် ပ္ဍဲဂိတုအဝ်ဂါတ်လ္ပာ်မံက်တေံ လလောၚ်ပ္တိတ်လဝ်ရ။

ပရိုၚ်-သြၚ်လောန်တိုၚ်(မ်)

ဗီု-Getting Image