ဒပ်ပၞာန်ဗၟာ ဟွံပါ်ပါဲညးရပ်လွဟ်ကဵု ကောန်ညးအရာပ်တုဲ သာက္လိလောန်ကၠုၚ် ပရေၚ်ချဳဒရာၚ်ပၞာန်ဗတိုက်ပန်ကၠုၚ်

သေတ်ဂါၚ်၊ အဝ်ဂါတ် (၂၀)

ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ဒပ်ကံၚ်ဇြဳပၞာန် ဒးပံက်လဝ်မုက်ပၞာန် ကြပ်ဒှ်အလုံမွဲကၟိန်ဍုၚ်ဂှ် ပ္ဍဲအရာထ္ပက်ပၞာန် ဗတိုက်ကဵုဂကောံဇြဟတ်ပၠန်ဂတးတအ်ဂှ် ကၠောန်သ္ပကၠုၚ် ပရေၚ်ချဳဒရာၚ်ပၞာန် ဟွံပါ်ပါဲ ဌာန်ပ္တဝ်မုက်ပၞာန်ရဂှ် ISP-Myanmar လလောၚ်ပ္တိတ်လဝ် လိက်ဒုၚ်စဳရေၚ် ပ္ဍဲဂိတုအဝ်ဂါတ် စၟတ်တ္ၚဲ(၁၈)ဂှ်ရ။

အတိုၚ်လိက်ဒုၚ်စဳရေၚ်ဂှ် နကဵုဒပ်ပၞာန် မွဲကရောံကဵုပရေၚ်သ္ၚဳဂၠိပ် ဇြဟတ်ပၞာန်အောန်ကြဳစှ်ေကၠုၚ်ဒၟံၚ်ဂှ် မွဲလ္ပာ်တေံ အတိုၚ်ပရေၚ်ပၞာန် ဂွံပၞောန်လ္တူမာန် ပရေၚ်ဗတိုက်ကဵုက္ၜၚ်ကျာ၊ လွဟ်ဇၞော် သီုကဵုလွဟ်ကမ်လှောဝ်ပန်တောဲ၊ ပရေၚ်ချဳဒရာၚ်ပၞာန် စှ်ေကိုန်ဗျူဟာတအ် ဒုၚ်ဆေၚ်မုက်မာန်ဒၟံၚ် အလုံမွဲကၟိန်ဍုၚ် မာန်ဒၟံၚ်ဖိုဟ်ဏီရဂှ် ဟီုသ္ဂးလဝ်ရ။

ပ္ဍဲအကာဲအရာဏံ ဒပ်ကံၚ်ဇြဳပၞာန်ဂှ် ဟွံပါ်ပါဲ ညးရပ်လွဟ်ကေုာံ ကောန်အရာပ်ညးဍုၚ်ကွာန်တုဲ ဟိုတ်နူပရေၚ်ချဳဒရာၚ်ဗတိုက်ဒၟံၚ်ဂှ်ရ ကွာန်မၞိဟ်တအ် မံၚ်တန်တဴဒၟံၚ်ကီု သီုပ္ဍဲဍုၚ်တအ်ဂှ် ပရေၚ်လီုလာ်ဆောံလေၚ် သာဂၠိုၚ်ကၠုၚ်ဒၟံၚ်ဂှ် ဂွံညာတ်ကေတ်တုဲ လၟိဟ်ဂၞန်ကောန်အရာပ်တအ် ဒးချိုတ်ဒၟံၚ်ဂှ်လေဝ် ဂၠိုၚ်တိုန်ကၠုၚ်ဒၟံၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။

နကဵုဒပ်ပၞာန် ပ္ဍဲအရာဗတိုက်ကဵု ဂကောံဇြဟတ်ပၠန်ဂတးတအ်ဂှ် ကၠောန်သ္ပဒၟံၚ် ကောန်အရာပ်ညးဍုၚ်ကွာန်တအ် နဒဒှ်ဌာန်ပ္တဝ်က္ဍိုပ်ပၞာန်ဂှ် က္လိလောန်ကၠုၚ်ဒၟံၚ် အကာဲအရာပရေံပရေံ သာဂၠိုၚ်ကၠုၚ်ဒၟံၚ်ရဂှ် ကိုဝ်လွေန်ဒူ မၞုံဒေသသေတ်ဂါၚ် ပရေၚ်ဒစဵုဒစးပၠန်ဂတး ဇြဟတ်ခိုဟ်ဒၟံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

“ဌာန်ဂအုပ်ပၞာန်ဇၞော် ဗီုနမခကီု တုဲတှ်ေ နူကဵုဒၞာဲ ဂကောံပၞာန်ပ္ကီုပရာပ် ဖျေံလဝ်ဗဒိုပ်ဂှ် ပရေၚ်ပန်ဖျေံလွဟ်ဇၞော်ကြာန်န် နွံဒၟံၚ်ဗွဲမဂၠိုၚ်ရ။ တုဲပၠန် ညးဒးဒုၚ်ရပ်ဒက်သ္ပဂၞန်တအ်လေဝ် ဟွံဒးကဵုစိုတ်ဍေံတအ်တှ်ေ ဒၞာဲဟွံဒးကဵုစိုတ်ဂှ် ပြိုက်ဂစိုတ်ထောံရ။ ညးဒးဒုၚ်ရပ်လဝ် ဗွဲမဂၠိုၚ်ဂှ်လေဝ် ကောန်အရာပ်သာမည သၟးရ။ ဟီုတှ်ေ က္လိလောန်ဒၟံၚ်ဂဗုတ်ရာဇဝတ်ပၞာန် လောန်လောန်ၜက်က် တီတီရ။ တုဲပၠန် လွဟ်ဇၞော်ပန်ခရာဇမ္ၚောဲတအ်ဂှ် ဂၠိုၚ်ဂၠိုၚ်ကဵုအလန် မွဲမွဲတ္ၚဲ လၟိဟ်စဵုကဵု (၂၀) ဝါ ဗီုပြၚ်ပန်ပှော်ဒၟံၚ် ကၠောန်ကၠုၚ်ဒၟံၚ်ဗီုဏံ နွံဗွဲမဂၠိုၚ်ရ။ ပ္ဍဲကွာန်တှ်ေ သုၚ်စောဲက္ၜၚ်ကျာပၞာန်တုဲ စဵုကဵုကဆံၚ် ဂြာတ်ထောံဖျေံဗုမ် ကၠောန်ကၠုၚ်ရ။ ဗီုဏံ သွာၚ်ကျာကီု သွာၚ်ကုန်ကီု သီုကဵုလွဟ်လက်နက်ဇၞော် ပန်ခရာဇမ္ၚောဲတအ် ပရေၚ်က္လိလောန်ကၠုၚ်ဒၟံၚ် လ္တူကောန်အရာပ် ဒၞာဲပ္တဝ်က္ဍိုပ်ပၞာန်ဟွံသေၚ်ဂှ် သီုတၚ်ရန်တၟံနွံနွံ လောန်န်ၜက်က်ဂှ် သာနွံဂၠိုၚ်ကၠုၚ်ရ”ဂှ် ညးဟီုသ္ဂးလဝ်ရ။

ပရေၚ်ဒဒှ်ဒပ်ပၞာန်ဗတိုက်လဝ် ကွာန်ပဇြဳဂျဳ ကဵုက္ၜၚ်ကျာ ကောန်အရာပ်ညးဍုၚ်ကွာန် (၁၀၀)ပြၚ် ပါလုပ်သီုကောန်ၚာ်သၟတ် ဒးချိုတ်လဝ်ဂှ် ကုသမဂ္ဂကီု သီုကဵုကၟိန်ဍုၚ်ဇြဟတ်ဇၞော်ဂၠးကဝ်တအ် စဵုကဵုဒးပ္တိုန်ဒုဟ်ပျုတ်ဗ္ဒေက် က္တဵုုဒှ်လဝ် အကာဲအရာပရေံပရေံရ။

အတိုၚ်တၚ်ဂၞၚ် ISP-Myanmar မဒှ်ဂကောံသုတေသနဂှ်မ္ဂး ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ပြၚ်ဏံ မ္ၚးကောန်အရာပ်ဒးချိုတ်လဝ် ဗ္ဒာဲ ၉,၀၀၀ ပြၚ်တုဲ သ္ၚိဒၟံၚ်ကီု သီုစမြိုၚ်တအ် ဒးဒုၚ်စံၚ်ပလီုပလာ်လဝ်လေဝ် နလၟိဟ်ဒ္စာံလက်ပြၚ် နွံကၠုၚ်ရဂှ် ဟီုသ္ဂးလဝ်ရ။

ကိုဝ်ယျေဝ်တွေနဳ ညးတာလျိုၚ်ပရေၚ်ပၞာန် KRF ဂှ်မ္ဂး ပ္ဍဲအရာဒပ်ပၞာန် ဗတိုက်သရိုဟ်ဂကောံရပ်လွဟ်ပၠန်ဂတးတအ်ဂှ် ပရေၚ်ပန်ပှော်ဒၟံၚ်ပ္ဍဲကွာန် ဒၞာဲကောန်အရာပ်တအ် နွံဒၟံၚ်ကြာန်န် က္တဵုဒှ်ဒၟံၚ် ကြပ်အရိုဟ်တ္ၚဲရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

“အရိုဟ်ရိုဟ်တ္ၚဲ ပ္ဍဲတိဍာ်ဒပ်မဟာ (၁) တံဒပ်လၟိဟ် ၃ ပိုဲတှ်ေ စကစက ဒပ်ပၞာန်တအ်နွံဂေတ်ဗိုၚ်ဒၟံၚ် ပိုဲရ။ နူကဵုဒၞာဲဂှ် ပန်ဖျေံဒၟံၚ်လွဟ်ဇၞော် အရိုဟ်ရိုဟ်တ္ၚဲ နွံရ။ တ္ၚဲဏံလေဝ် ပန်လဝ်နွံ။ ပ္ဍဲကွာန်လေဝ် ပန်သ္ဍာံဒၟံၚ်ကြာန်န်ရ။ ဗီုဗီုဏံဂှ် နွံဒၟံၚ်တၟာဂလိုၚ်၊ နွံဒၟံၚ် ကြပ်အရိုဟ်ဟ်တ္ၚဲရ။ ပ္ဍဲဂိတုတုဲကၠုၚ်တေံ ဃောထ္ပက်လုပ်ကရောၚ်ပၞာန် လ္ပာ်ငှေက်ပျဝ်တဝ်ဂှ် ဍေံတအ်ပန်ဂစိုတ်ထောံလဝ် ကောန်ကွာန် ပိတၠရ”ရဂှ် ညးဟီုလဝ်ရ။

ပွိုၚ်ဍုၚ်ကျာ်ထဝ်၊ သဓီု ကေုာံ ၜဳကလေၚ် မၞုံပွိုၚ်ဍုၚ်မန်တအ်ဂှ် ဒှ်ဒေသပရေၚ်ချဳဒရာၚ်ပၞာန် ဒပ်ပၞာန်ဗၠးၜကောန်ဂကူကရေၚ် KNU ကေုာံ ဒပ်ပၞာန်စဵုဒၞာညးဍုၚ်ကွာန် (PDF) တအ် ဇြဟတ်ခိုဟ်ဒၟံၚ် မွဲဒေသရ။

မွဲလ္ပာ်ပၠန် အလဵုအသဳပရေၚ်ညဳသၟဟ်ကောန်ဂကူ (NUG) ဂှ် သၞာံ၂၀၂၃ ဏံ စၟတ်သမ္တီလဝ် နဒဒဒှ်သၞာံကဵုသ္ဂုတ်သွာတ် ပရေၚ်ပၠန်ဂတးတုဲ သွက်သၞာံဂွံအိုတ် အကာဲအရာသှ်ေဒၟံၚ် ၜိုတ်ပန်ဂိတုဏီဂှ် ဝန်ဇၞော်ပရေၚ်စဵုဒၞာ ဥူယျဳမန်ဂှ်မ္ဂး သၞာံမံက်ကၠုၚ်စိုပ်ဂတဏံ ဒုၚ်ပေါဲအၚ်ဇၞးပၠန်ရဂတးရဏောၚ်ဂှ် ဟီုပ္တိတ်လဝ်ရ။

ကိုဝ်ဇြေယျာလွေန် ညးတာလျိုၚ် 96 Soldiers – PDF ဂှ်မ္ဂး ပ္ဍဲပွိုၚ် ၆ ဂိတု ထပ်ဂလိုၚ်ပ္တိုန်လဝ်အယုက်ကာလကာတၟေၚ် ကံၚ်ဇြဳပၞာန်ဂှ် နဒပ်ပံၚ်ကောံကဵုဒှ် နဒဒှ်မဟာမိတ်ကဵုဒှ် ကဵုအခိၚ် မွဲအခိၚ်တုဲ သာဒးချဳဒရာၚ်ပေါဲဗတိုက်သီဗဒိုပ် နတၚ်ချဳဒရာၚ်ညဳညဳထေက်ရောၚ်ဂှ် ဟီုကဵု ဌာန်ပရိုၚ်သြၚန်လောန်တိုၚ်(မ်)ရ။

“ပွိုၚ်တြဴဂိတုဏံ ဒဒှ်ဗီုပြၚ်ပၞာန်ထ္ပက်ဂှ် လ္ပာ်ပိုဲ ပံၚ်တောဲရေၚ်တၠုၚ်လဝ်ကဵု ဇြဟတ်ပံၚ်ကောံတုဲ ဒးချဳဒရာၚ် ပေါဲဗတိုက်သီဗဒိုပ် ထေက်ဏောၚ် ညာတ်ရ။ အခိၚ်ကၠောန်ပေါဲဗတိုက်သီဗဒိုပ်ဂှ်တှ်ေ မွဲတၠ မွဲဂကောံဓဝ် ဟွံဂွံလးလးပုဟ်။ ဟိုတ်ဂှ်ရ ပိုဲတအ်ပံၚ်ကောံ ပံၚ်ဗစပ်တုဲတှ်ေ ပရေၚ်ပံၚ်တောဲရေၚ်တၠုၚ် ဇြဟတ်ခိုဟ်ဟ် ဇြဟတ်ညဳညဳ ဗဒိုပ်ဒပ်ပၞာန်တအ်၊ ကွာန်ပျူတအ်၊ ကုန်ဒပ်ပၞာန်တအ်ဂှ် နကဵုဗီုပြၚ်သဏ္ဌာန် ဒပ်ပံၚ်ကောံကဵုဒှ် ဗီုပြၚ်သဏ္ဌာန်မဟာမိတ်ကဵုဒှ် ကဵုအခိၚ်မွဲအခိၚ်တုဲ ပိုဲဒးကၠောန်ရေၚ်တၠုၚ်ထေက်ဏောၚ် အဲညာတ်ကေတ်ရ”ဂှ် ညးဟီုသ္ဂးလဝ်ရ။

နူကဵုထပ်က္လေၚ်သီအဝဵုမွဲဝါပၠန်တေံ စဵုကဵုဂိတုဂျူလာၚ်သၞာံဏံ အလုံမွဲကၟိန်ဍုၚ် အပံၚ်လၟိဟ်ပေါဲဗတိုက် (၁)လက်ပြၚ် နွံကၠုၚ်ဒၟံၚ်တုဲ ပ္ဍဲပွိုၚ်ဍုၚ်ဒှ်လဝ်ပေါဲဗတိုက်တအ်လေဝ် သၠဲတိုန်ကၠုၚ်ဒၟံၚ် မွဲမွဲပွိုၚ်ဍုၚ်တုဲ ပ္ဍဲသၞာံဏံ စဵုကဵု ၂၁၁ ပွိုၚ်ဍုၚ် က္တဵုဒှ်ကၠုၚ်ဒၟံၚ်ရ။

သ္အာၚ်နူဂှ်ပၠန် အကြာဒပ်ပၞာန်ကဵု ဒပ်စဵုဒၞာညးဍုၚ်ကွာန် နွံဒၟံၚ်ဂကောံစုၚ် (PDFs/LDFs) တအ်ဂှ် ပေါဲဗတိုက် ဂၠိုၚ်တိုန်ကၠုၚ်ဒၟံၚ်သိုက်က်တုဲ ပ္ဍဲသၞာံဏံ ပရေၚ်ချဳဒရာၚ်ပၞာန်ပံၚ်တောဲ EAOs တအ်ကဵု PDFs တအ်လေဝ် သာဂၠိုၚ်တိုန်ကၠုၚ်ဒၟံၚ်ရဂှ် ISP-Myanmar လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ