နယူဒေလဳ၊ အဝ်ဂါတ် (၂၀)
နကဵုအလဵုအသဳအိန္ဒိယ သွက်ဂွံသ္ကုတ်ဗပိုတ်ပရေၚ်ဗလးပ္တိတ်သၟုဟ်ဓာတ် နူယာဉ်ကွဳစက်တအ်ဂှ် ဓလိုက်အာတံရိုဟ် ပ္ဍဲသၞောတ်ပရေၚ်ပလံၚ်ဗစိုပ်အသုၚ်စောဲညးဍုၚ်ကွာန် သြန်ရူပဳ ၅၇၆.၁၃ ဗဳလျာန်ရောၚ်ဂှ် သ္ပလဝ်ဒ္တန်ရ။
ပရေၚ်ဓလိုက်တံရိုဟ်ဏံ သွက်ကွဳစက်ဓရိပ် ပ္ဍဲဍုၚ် လၟိဟ် ၁၀,၀၀၀ ဖ္ဍိုက်ပေၚ်ၚ် ဂွံဂြိပ်ဓရိပ်မာန် ဓလိုက်အာတံရိုဟ်ရောၚ်ဂှ် ဝန်ဇၞော်ပရေၚ်တၚ်ဂၞၚ်ပရိုၚ် ကေုာံပရေၚ်ဗလးပ္တိတ်ရုပ်ဒမျိုၚ် ဟီုသ္ဂးလဝ်ရ။
“ဗွဲတၟေၚ်တှ်ေ ပ္ဍဲဍုၚ်ဇၞော်အ်ဂှ် ပရေၚ်ပလံၚ်ဗစိုပ်ညးဍုၚ်ကွာန် ဗီုကဵုကွဳစက်ဗေတ်သကာဂှ် ပိုတ်သ္ကုတ်ဒၟံၚ် နွံရ။ တၚ်ကၠောန်ရေၚ်တၠုၚ်ဏံလေဝ် သၠုၚ်ပ္တိုန်ပရေၚ်သုၚ်စောဲဇြဟတ်ဓာတ်လလဳမာန်တိုန်ဏောၚ်”ဂှ် ညးဟီုလဝ်ရ။
နကဵုအလဵုအသဳဖေတ်ဒရေဝ်အိန္ဒိယဂှ် ညံၚ်တၠကမၠောန်ပုဂ္ဂလိကတအ် ဂွံပါလုပ်ကၠုၚ်မာန် ပြဟ်ဟ်ဏံ ဓလိုက်အာတံရိုဟ် ရူပဳ ၂၀၀ ဘဳလျာန်တုဲ သွက်ဍုၚ်ဇၞော် လၟိဟ်မၞိဟ်နွံ နူ ၃ ကိုတ် စဵုကဵု ၄ မဳလျာန်ဂှ် က္တဵုဗဒှ်ကဵုအထံက်အရီုမာန်ရောၚ်ဂှ် ဂွံတီကေတ်ရ။
တၚ်သ္ဂုတ်သွာတ်အလဵုအသဳအိန္ဒိယ ဖျေံလဝ်သ္ဂုတ်သွာတ်လၟုဟ်ဏံဂှ် အမာတ်ကလုတ်ဆေၚ်ကဵုဥတုရာသဳအမေရိကာန် ကေုာံ ဝန်ဇၞော်ကမၠောန်ကွတ်စက်အဇာဇၞော်အိန္ဒိယတအ် ဆဵုဂဗလဝ်တုဲ ပ္ဍဲကၟိန်ဍုၚ်အိန္ဒိယဂှ် သွက်ဂွံဖျေံကဵုအာ ကွဳစက်ဗေတ်သကာဓာတ်လလဳ လၟိဟ် ၁၀,၀၀၀ မာန် နူအမေရိကာန် ထ္ၜလဘာ်ကဵုရောၚ်သဳကၠဳလဝ်တုဲဂှ် မံက်တိတ်ကၠုၚ်လေဝ် ဒှ်ရ။
ပ္ဍဲသၞာံ ၂၀၂၂ ဂှ် ပ္ဍဲကၟိန်ဍုၚ်အိန္ဒိယ ဇြဟတ်သွံတြး ကွဳစက်ဓာတ်လလဳ လ္တူနူ ၁.၄ မဳလျာန် သၠုၚ်တိုန်လဝ်တုဲ ဇၟာပ်ပ်သၞာံ နကဵုဇြဟတ်သွံတြး သၞာံဏံအိုတ်မ္ဂး ညံၚ်ဂွံစိုပ် စဵုကဵု ၁၀ မဳလျာန်ဂှ် စၟဳပတှ်ေကေတ်လဝ်ရဂှ် သ္ကိုပ်ဝန်ဇၞော်အိန္ဒိယ ဟီုလဝ် ပ္ဍဲကောံဓရီု G20 ရ။
ကွဳစက်ဓာတ်လလဳတအ် ဟိုတ်နူဂုဏ်ဖဵုနွံဂၠိုၚ်မာန်ဒၟံၚ်ဂှ်ရ နကဵုအလဵုအသဳအိန္ဒိယ ညံၚ်ဇြဟတ်ပရေၚ်တၠုၚ်ကမၠောန် ဇြဟတ်ဂွံခိုဟ်တိုန်ကၠုၚ်မာန် ကဵုအာပရေၚ်ထံက်ပၚ်ရောၚ်ဂှ်လေဝ် ဂွံတီကေတ်ရ။
ပ္ဍဲသၞာံ ၂၀၁၉ ကၟိန်ဍုၚ်အိန္ဒိယ လၟိဟ်ကွဳစက်ဗေတ်သကာ ၁.၉ ဖ္ဍိုက်နွံဒၟံၚ်ဂှ် သွက်ဂွံဖ္ဍိုက်ဗပေၚ် တၚ်နွံပၟိက်ပရေၚ်ရေၚ်တၠုၚ်ပလံၚ်ဗစိုပ် အသုၚ်စောဲညးဍုၚ်ကွာန်ဂှ် ဒဒှ်ရဒးထပ်ဂလိုၚ်ပ္တိုန်ကွဳစက် လၟိဟ်ၜိုတ်ပိပြကောဋိက်ိုတ်ရောၚ်ဂှ်လေဝ် ပရေၚ်လ္ၚတ်သ္ၚဳဂၠိပ်မွဲ ထံက်ထ္ၜးလဝ်ရ။
Ref,BLOOMBERG
sanlontai