နေပျဳဒဝ်၊ အဝ်ဂါတ်(၂၂)
သီုအခေါၚ်ဟၟဲမွဲသာ် ဟွံသေၚ်မ္ဂး လိုၚ်ဇြေန်ဟၟဲမွဲသာ် ယဝ်ရစၟဳစၟတ်ဂွံညာတ်ကေတ် ရပ်စပ်ဂိုၚ်လဝ်သြန်ဍုၚ်သ္အာၚ်ပ္ဍဲတဲမ္ဂး ကေတ်အာအရေဝ် အတိုၚ်သၞောဝ်ဥပဒေဖန်ဇန်စဳမာန် သြန်သုၚ်စောဲဍုၚ်သ္အာၚ်ရောၚ်ဂှ် တိုက်သြန်ဗဟဵုကံၚ်ဇြဳပၞာန် လလောၚ်တြးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၀)ဂှ်ရ။
တိုက်သြန်ဗဟဵုကံၚ်ဇြဳပၞာန်ဂှ် ညးမံၚ်တန်တဴဒၟံၚ်ပ္ဍဲဍုၚ် မွဲမွဲတၠ စဵုကဵုဒဝ်ဠာအမေရိကာန် ၁၀,၀၀၀ ဟွံသေၚ်မ္ဂး သြန်ဍုၚ်သ္အာၚ် ဟွံလောန်ၜက်နူသြန်ဗ္ၜတ်တုပ်သၟဟ်ကဵုမသြန်ဏံ က္လိဂွံလဝ် နနဲဂၠံၚ်တရဴလုပ်သၞောဝ်ဂှ် သ္ပတံနူ တ္ၚဲဂွံဒုၚ်ကေတ်လဝ်တဲတုဲ ပ္ဍဲပွိုၚ် (၆) ဂိတု အခေါၚ်ရပ်ဂိုၚ်လဝ် နွံဒၟံၚ်ရဂှ် ဟီုသ္ဂးလဝ်ရ။
စဵုကဵုပွိုၚ် (၆) ဂိတုပြၚ် ဟွံသုၚ်စောဲတုဲ သြန်ဍုၚ်သ္အာၚ်နွံဒၟံၚ်ဂှ် ပွမသွံဂတး ပ္ဍဲဇရေၚ်ညးလိုၚ်ဇြေန်ကမၠောန် အခေါၚ်ကၠောန်သြန်သုၚ်စောဲသြန်ဍုၚ်သ္အာန်နွံ အတိုၚ်ၚုဟ်မးဗွဝ်ဖျာကီု၊ ပၠုပ်စုတ် ပ္ဍဲစရၚ်တိုက်သြန်တအ်ကီု ဒးရေၚ်တၠုၚ်ရောၚ်ဂှ် လလောၚ်တြးလဝ်ရ။
နကဵုညးဂိုၚ်ရပ်လဝ်သြန်ဍုၚ်သ္အာၚ်တအ်ဂှ် ဟွံဒ္ဂေတ်ဗက် အတိုၚ်တၚ်လလောၚ်တြးတုဲ သြန်ဍုၚ်သ္အာၚ်ဂှ် လိုၚ်ဇြေန်အခေါၚ်ကဵုလဝ် ဟၟဲမွဲသာ် ယဝ်ရဂိုၚ်ရပ်လဝ်မ္ဂး ကေတ်အာအရေဝ် အတိုၚ်သၞောဝ်ဥပဒေ ပရေၚ်ဖန်ဇန်စဳမာန်သြန်ဍုၚ်သ္အာၚ်ရောၚ်ဂှ် တိုက်သြန်ဗဟဵုကံၚ်ဇြဳပၞာန် ကဵုလဝ်သတိရ။
တၠကမၠောန်ပရေၚ်ပိုန်ဒြပ်မွဲတၠဂှ်မ္ဂး တၚ်လလောၚ်တြးကံၚ်ဇြဳပၞာန်ဏံ ဓမံက်ထ္ၜးဒၟံၚ် ဒဒှ်ရဒးဆေၚ်ဒၟံၚ်မုက်ကဵု ပြဿနာသြန်ဍုၚ်သ္အာၚ်ဟွံရုမ်ဂပ်တုဲ ညးရာန်ပကောံသြန်ဒဝ်ဠာတအ် ဂဗဆဵုအခက်ခုဲမာန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“ပိုၚ်ခြာထောံ အခေါၚ်ရပ်လဝ်ဒဝ်ဠာဂှ် ကဵုပြဿနာဒဝ်ဠာအောန်ကြဳအာဂှ်လေဝ် ဆေၚ်စပ်ဒၟံၚ်ရ။ အဓိကဂှ် ဟွံဂၠာဲပရေၚ်ပိုန်ဒြပ် ခိုဟ်ဟ်ရပုဟ်။ ပြဟ်ဟ်ဏံ ဗၞိက်ပၠုပ်ဗၞိက်ပလံၚ်တအ်လေဝ် အခိၚ်ဒေါံဒေၚ်ဒၟံၚ်ဏံ မၞိဟ်နွံဒၟံၚ်တုဲတုဲတအ်ဂှ်လေဝ် ဝေၚ်မံၚ် နဒဒှ်ဗီုပြၚ်ဗွဝ်ဖျာရ။ လၟုဟ် မွဲဒဝ်ဠာဂှ် ဒှ်ကၠုၚ်ဗ္ဒာဲ (၄၀၀၀)ဂှ်တှ်ေ အလဵုအသဳလေဝ် နူလ္ပာ်ညးတအ်ကၠောန်မာန် နူသွာၚ်သၞောဝ် နဲကဲဥပဒေညးတအ် ဗီုပြၚ်ကောပ်ကာဲကၠုၚ်ဒၟံၚ်ရ။ ပိုဲဂှ် အရာဂေတ်ဒၟံၚ် ပ္ဍဲကမၠောန်တအ်ဏံ ပြဿနာဟၟဲပုဟ်။ ဟွံရပ်လဝ်ပုဟ်။ ပၠုပ်စုတ်လဝ် ပ္ဍဲအကံက်ဗာန်။ ယဝ်ရသြန်ဂွံနၚ် နူဗၞိက်ပလံၚ်တှ်ေ ပြဿနာဟၟဲပုဟ်။ လ္ၚဵုဂှ်တှ်ေ မိက်ဂွံဝေၚ်ၚုဟ်ဗွဝ်ဖျာဒဝ်ဠာတုဲ ၜိုတ်ဂွံမာန် ဗက်ဂၠာဲရာန်ဒၟံၚ် ဒဝ်ဠာရ၊ ရာန်တုဲ ဗီုကဵုဂိုၚ်စွံလဝ်ပ္ဍဲသ္ၚိဂှ်တှ်ေ လ္ပာ်ဏံ တၚ်နွံပၟိက်ဒဝ်ဠာ၊ ပရေၚ်အောန်ကြဳစှ်ေဂှ် ဒှ်ရလေဝ်။ ဗီုပြၚ်ဏံတှ်ေ ဍေံဟွံပြေပြံၚ်ပုဟ်။ ပြဟ်ဟ်ဏံ ၚုဟ်စှ်ေအာဏောၚ်။ ဘပဠထောံညိညရ။ ဒးထေၚ်ကေတ်ဗီုပြၚ်ဏံရ။ ဆ္ဂးဂှ်လေဝ် တၚ်နွံပၟိက်ဗွဝ်ဖျာ ဒၟာနူဇၞော်လောန်ဒၟံၚ်ဂှ်ရ ဟွံထေၚ်ပုဟ်” ဂှ် ဟီုသ္ဂးလဝ်ရ။
အခိၚ်လၟုဟ်ဏံ သွက်ဂွံထိၚ်သြန်ဒဝ်ဠာဂှ် ကမၠောန်ပရေၚ်သွံရာန်သြန်ဍုၚ်သ္အာၚ်တအ် ညးလိုက်ဇြေန်ကမၠောန်သွံသၠာဲဂတးနွံဟေၚ် ညံၚ်ဂွံကၠောန်အာကီု မသြန်ဍုၚ်သ္အာၚ် ကေုာံ စၟတ်တဲချေက်ညးအာတရဴတအ်ဟေၚ် အခေါၚ်သွံရာန် အတိုၚ်သၞောဝ်ဥပဒေဖန်ဇန်စဳမာန် သြန်သုၚ်စောဲဍုၚ်သ္အာၚ် အတိုၚ်ၝောံပိုဒ် (၉) မာန်ရဂှ် ကံၚ်ဇြဳပၞာန် လလောၚ်တြးလဝ်ရ။
ဥက္ကဋ္ဌတိုက်သြန်ဗဟဵုကံၚ်ဇြဳပၞာန် ဒဝ်တာန်တာန်သွေဂှ်မ္ဂး ၚုဟ်သြန်ဍုၚ်သ္အာၚ် ဒှ်ဒၟံၚ်လၟုဟ်ဏံဂှ် ဒှ်ၚုဟ် ဒးဒှ်ထေက်ဟွံသေၚ်တုဲ ဒှ်ပရေၚ်ဂြိုဟ်စာ ညးဝေၚ်ၚုဟ်ဗွဝ်ဖျာသြန်တအ်တုဲ ကေတ်အာအရေဝ် ပိုတ်တ်သ္ကုတ်တ်ရောၚ်ဂှ် ဟီုသ္ဂးလဝ် ပ္ဍဲကောံဓရီု ကၠောန်ဗဒှ်လဝ် ပ္ဍဲနေပျဳဒဝ် ပ္ဍဲဂိတုအဝ်ဂါတ် စၟတ်တ္ၚဲ(၁၉) ဂှ်ရ။
သ္အာၚ်နူဂှ်ပၠန် နကဵုကောန်ဍုၚ်တအ်လေဝ် သွက်ဂွံရပ်သြန်ဒ္ကေဝ်ကီု ယဝ်မိက်ဂွံရပ်သုၚ်စောဲ သြန်ဍုၚ်သ္အာၚ်မ္ဂး ဒဒှ်ရနွံဒၟံၚ် ပ္ဍဲတဲဇကု ဗွဲမလုပ်သၞောဝ်ဂှ် ဒးထ္ၜးသက်သဳသာဓကတုဲ ယဝ်ထ္ၜးဟွံမာန်မ္ဂး ဒးဒုၚ်ကေတ်အရေဝ် ပိုတ်တ်သ္ကုတ်တ်ရောၚ်တုဲ နဒဒှ်ဗ္ၜတ်ရပ်စွံလဝ် ဗွဲမလုပ်သၞောဝ်ဂှ် စဵုကဵုသြန်ဒဝ်ဠာ ၁၀၀၀ ဟေၚ်ရပ်မာန်ရဂှ် ညးဟီုသ္ဂးလဝ်ရ။
ကံၚ်ဇြဳပၞာန်ဂှ် သွက်ဂွံထိၚ်သြန်သုၚ်စောဲဍုၚ်သ္အာၚ်မာန် ပ္ဍဲဂိတုဂျူလာၚ်မံက် တုဲကၠုၚ်တေံလေဝ် ၜိုန်ရပလေဝ်ပလေတ် ပံက်လဝ်ကဝ်မတဳကောပ်ကာဲ သြန်သုၚ်စောဲဍုၚ်သ္အာၚ်ကီုလေဝ် စဵုကဵုအခိၚ်လၟုဟ်ဏံ ထိၚ်ဒဝ်ပြဿနာသြန်ဍုၚ်သ္အာၚ်သၠုၚ်တိုန်ဒၟံၚ်ဂှ် ဟွံမာန်ဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai