ကျာ်မြဟ်၊ အဝ်ဂါတ်(၂၂)
တွဵုရးဍုၚ်မန်၊ ပွိုၚ်ဍုၚ်ကျာ်မြဟ်၊ အကြာကွာန်ကအ်ခလုၚ်ကဵု ကွာန်ကျာအေန်ချံၚ်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၀) အခိၚ်သဝ်တ္ၚဲဂှ် သ္ကိုပ်အုပ်ဓုပ်ကွာန်မွဲတၠ ဒးဒၚ်ပန်လဝ်ကဵုသေနာတ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဥူဇြဝ်မေန် အာယုက် (၄၅)သၞာံ သ္ကိုပ်အုပ်ဓုပ်ကွာန်ကအ်ခလုၚ်ဂှ် အခိၚ်စဴကၠုၚ်နူကွာန်ကျာအေန်ချံၚ် နူကွာန်ကအ်ခလုၚ် နကဵုကွဳစက်ကာဂှ် သၟာသေနာတ်ဟွံတီယၟုတံ ပန်ပှော်လဝ် နူလ္ပာ်လက္ကရဴစးရ။
ဟိုတ်နူဒးဒုၚ်ပန်ပှော်လဝ်ကဵုသေနာတ်ဂှ်ရ သ္ကိုပ်အုပ်ဓုပ်ဥူဇြဝ်မေန်ဂှ် ပ္ဍဲကဵုပၞးပုၚ်ကဵု ဗ္ဒါဲတံလတက်တံဂှ် ဒးလဝ်မကမ် (၂)လစုတ်တုဲ ဒးဒုၚ်လွဳလွတ်မံၚ်ဂဥုဲ ပ္ဍဲရုၚ်ဂဥုဲမတ်မလီုရဂှ် ဂွံတီကေတ်ရ။
ဆ္ဂး ပ္ဍဲပရေၚ်ပန်ပှော်ဏံဂှ် ညးမဒှ်သမ္ဘာ ပါဗက်ကၠုၚ် ကရောံဥူဇြဝ်မေန်ဂှ် ပရေၚ်ဇီုကပိုက်ဒးမမိက်ကဵုမွဲမွဲ ဟွံမွဲရဂှ် ညးဒေသတံ ဟီုရ။
ဂကောံလဵု ပန်ပှော်လဝ် သ္ကိုပ်အုပ်ဓုပ်ကွာန်ကအ်ခလုၚ် ဥူဇြဝ်မေန်ဂှ်ရောဟီုဂှ် ဒဵုကဵုအခိၚ်လၟုဟ် လလောၚ်တြးလဝ်ဂှ် ဟွံဂွံဆဵုကေတ်ဏီရ။
ပ္ဍဲပွိုၚ်ဍုၚ်ကျာ်မြဟ်ဂှ် ပ္ဍဲကာလဒပ်ပၞာန်သီအဝဵုဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗ္တိုက်တံ က္တဵုဒှ်မံၚ်နွံတုဲ ပရေၚ်ဇီုကပိုက်ချိုတ်ဂျိုၚ်ၜါလ္ပာ်လေဝ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီု-Social Media
sanlontai