ပ္ဍဲသဓီု ပေါဲဗတိုက်ဟွံမွဲမွဲသာ် ကံၚ်ဇြဳပၞာန်ဗ္တိုက်ဂြာတ်ထောံဖျေံဗုံ ကဵုက္ၜၚ်ကျာ

သဓီု၊ အဝ်ဂါတ်(၂၂)

တွဵုရးဍုၚ်မန်၊ ပွိုၚ်ဍုၚ်သဓီု၊ ပ္ဍဲဗ္ဒါဲပွဳူကွာန်ပယျေတ်ခိုဝ်ဂှ် ပေါဲဗတိုက်ဟွံမွဲမွဲသာ် ဒပ်ကံၚ်ဇြဳပၞာန် ကၠုၚ်စိုပ်ဗတိုက်ဂြာတ်ထောံဖျေံလဝ်ဗုံ နကဵုက္ၜၚ်ကျာရဂှ် ညးတာလျိုၚ် KNU ခရိုၚ်သဓီုမွဲတၠ သ္ပဒ္တန်လဝ်ကဵု သြၚ်လောန်တိုၚ်(မ်)ရ။

ဂိတုအဝ်ဂါတ်၊ စၟတ်တ္ၚဲ (၂၁) အခိၚ်လ္ဒေါဝ်တ္ၚဲ ၜိုတ် (၃) နာဍဳဂှ် နူဒပ်ကံၚ်ဇြဳပၞာန်တံ ဗ္တိုက်ဂြာတ်ဏာလဝ်ဗုံ ကဵုက္ၜၚ်ကျာဗ္တိုက် (၂) ဖ္ဍိုက်ရ။

ဒၞါဲ ဒပ်ကံၚ်ဇြဳပၞာန်ဗ္တိုက်ဂြာတ်ဏာလဝ်ဗုံတံဂှ် ဒှ်ဒၞါဲဂအုပ်ရုၚ်တြေံ ဒပ်မဟာ (၁) ဒပ်ပၞာန်ဗၠးၜးကောန်ဂကူကရေၚ် KNLA တုဲ မၞိဟ်မံၚ်စံၚ် ဟွံမွဲရပုဟ်ဂှ် ဂွံတီကေတ်ရ။

ၜိုန်ရဒးဒုၚ်ဗ္တိုက်ဂြာတ်လဝ်ဗုံကီုလေဝ် အကာဲအရာပြဟ်ဟ်ဏံဂှ် ဟိုတ်နူမၞိဟ်အာရံၚ်ကျောဝ် ဟွံမွဲဏီဂှ်ရ စမြိုၚ်ဂမၠိုၚ် ပရေၚ်ဇီုကပိုက်ဒးလဝ် နွံ ဟွံမွဲဂှ် ဟွံဂွံတီကေတ်ချိုတ်တ်ပၠိုတ်တ်ဏီရဂှ် သ္ဂးလဝ်ရ။

ပ္ဍဲပွိုၚ်ဍုၚ်သဓီု KNU ဂှ် သ္ပတံ နူဂိတုမံက်တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ ပရေၚ်ပၞာန်ကြံၚ်မ္ၚိုဟ်မံၚ်တုဲ အခိၚ်လၟုဟ်ဏံ ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ဗ္တိုက်ဂြာတ်လဝ်ဖျေံလဝ်ဗုံ ကဵုက္ၜၚ်ကျာရ။

ပ္ဍဲဂိတုမေ သၞာံတုဲကၠုၚ်တေံဂှ်လေဝ် ဟိုတ်နူဒပ်ကံၚ်ဇြဳပၞာန် ကၠုၚ်စိုပ်ပန်ပှော်လဝ် ကွာန်လေဝ်ကေ၊ ပွိုၚ်ဍုၚ်ၜဳကလေၚ်ဂှ်ရ သ္ၚိဒၟံၚ်ညးဒေသတံ ဟွံအောန်နူကဵု (၁၀) မ တူပၟတ်ဒးလီုလာ်အာလဝ်ရ။

ပရိုၚ် – သြၚ်လောန်တိုၚ်(မ်)

ဗီု – Social Media