ဒဳမဝ်သဵု၊ အဝ်ဂါတ် (၂၂)
ကြဴနူကံၚ်ဇြဳပၞာန် တက်တြးပ္တိတ် သြန်တၞး ၂၀၀၀၀ ဒ္ကေဝ်တုဲဂှ် ၚုဟ်သြန်ၝာတ်သေံ သၠုၚ်တိုန်ကၠုၚ် ဂၠိုၚ်ကဵုချဂှ်ရ သွက်ဂွံရာန်ကေတ် လွဟ်လက်နက်မကမ် အခက်အခုဲ နွံကၠုၚ်ရဂှ် ဂကောံဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ရန်တၟအ်သွက်သ္ဂောံထိၚ် ၚုဟ်သြန်ၝာတ်သေံသၠုၚ်တိုန်ကီု သီုသွက်သ္ဂောံဖအောန်ဖျေံ ပရေၚ်သုၚ်စောဲဒဝ်ဠာတံတုဲ သြန်ၝာတ်သေံဂှ် နဒဒှ်သြန်ရေၚ်တၠုၚ် ပရေၚ်ကဵုကေတ်သြန်ဍုၚ်သ္အာၚ် ကေုာံ ပရေၚ်ပသောၚ်စရၚ်တံမာန်ရဂှ် တိုက်သြန်ဗဟဵုကံၚ်ဇြဳပၞာန် လလောၚ်တြးလဝ် ပ္ဍဲဂိတုအဝ်ဂါတ် စၟတ်တ္ၚဲ (၁၄)ဂှ်ရ။
ကြဴနူဂှ်တုဲ သြန်ၝာတ်သေံ မွဲၝာတ်ဂှ် ၚုဟ်သြန်ဗၟာ မၞုံကၠုၚ် စဵုကဵု (၁၁၀) ဒ္ကေဝ်ပြၚ်တုဲ ပ္ဍဲဂိတုအဝ်ဂါတ် စၟတ်တ္ၚဲ (၁၉) ဂှ် မွဲၝာတ်မ္ဂး စဵုကဵု (၁၁၅)ဒ္ကေဝ် ၚုဟ်ထပ်သၠုၚ်တိုန်ကၠုၚ်လဝ် လောန်နူသၞောတ်ဗ္ၜတ်ရ။
ပ္ဍဲအကာဲအရာဏံ သွက်ဂကောံဇြဟတ်ပၠန်ဂတး လုပ်မံၚ်ပေါဲဗ္တိုက်ပၠန်ဂတးကညၚ် ထပိုတ်ရိုဟ်ကၞက်သၞောတ်တၠအဝဵုပၞာန်ဂှ် သွက်ဂွံရာန်ကေတ် လွဟ်လက်နက်မကမ်၊ ဇွောံမစစၞ၊ ဂဥုဲဇဗတံဂှ် ဒးဂဗကၠုၚ်အခက်ခုဲရ။
ညးတာလျိုၚ် ဒပ်စဵုဒၞါညးဍုၚ်ကွာန်ဒဳမဝ်သဵု တွဵုရးကရေၚ်ဍာဲမွဲတၠဂှ်မ္ဂး ဟိုတ်နူၚုဟ်သြန်ၝာတ်သေံ သၠုၚ်တိုန်ကၠုၚ်ဂှ်ရ ၚုဟ်လွဟ်လက်နက်မကမ်တံ သၠုၚ်တိုန်ကၠုၚ်မာဟလိုၚ်တုဲ ပ္ဍဲလ္ပာ်ဇွောံမဂှ်လေဝ် အခက်အခုဲနွံမံၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“ပရေၚ်ဇီုကပိုက်ဂှ် နွံတၟာဂလိုၚ်ရ။ ကြဴနူပ္တိတ် သြန်တၞး ၂၀၀၀၀ တုဲ ၚုဟ်လွဟ်လက်နက်မကမ်တံလေဝ် သၠုၚ်တိုန်ကၠုၚ်တၟာဂလိုၚ်ရ။ ပိုဲဂှ် ဟိုတ်နူနွံမံၚ် ပ္ဍဲပယျဵုဂှ်ရ ဂၠံၚ်ဍာန်ဂှ်လေဝ် ဟွံပြေပြံၚ်တုဲ ၚုဟ်သြန်ဂှ်လေဝ် တိုန်မံၚ်မွဲအသိၚ်ဓဝ်တုဲ လ္ပာ်လွဟ်လက်နက်ကီု ဇွောံမကီု အခက်အခုဲ နွံကၠုၚ်သီုဖအိုတ်ရ” သာ်ဝွံ ညးသ္ဂးရ။
ဆ္ဂးအနှေန်ၚုဟ်မး လွဟ်လက်နက်မကမ် သုၚ်စောဲမံၚ် ပ္ဍဲပေါဲဗ္တိုက်ရပ်လွဟ် တၞဟ်ခြာသၠုၚ်တိုန်အာတံဂှ် ညးဟွံဂွံဟီုလဝ်ရ။
ဂကောံဇြဟတ်ပၠန်ဂတးရပ်လွဟ် ဖျေံသ္ဇိုၚ်ချဳဒရာၚ်မံၚ် ပ္ဍဲဒေသပယျဵု ပ္ဍဲဍုၚ်စုက်လုက်မံၚ်ကဵုသေံ ဗွဲမဂၠိုၚ်တံဂှ် ဒးဗ္ဒဗ္ဒါဲမံၚ် လွဟ်လက်နက်မကမ်၊ ဂဥုဲဇဗ၊ ဇွောံမစၞစ နူကဵုသေံတံရ။
ညးမၞုံအခေါၚ်ဟီုဂှ် ဒပ်ပၠန်ဂတးဍုၚ်မန် (MSRF) နာဲနဂါဂှ်လေဝ် တၚ်နွံပၟိက်လွဟ်လက်နက်မကမ် ဂကောံဒပ်ပၠန်ဂတး ချဳဒရာၚ်မံၚ် ပ္ဍဲမွဲဒမြိပ်ပယျဵု သေံ-ဗၟာ သီုဖအိုတ်ဂှ် ဒးရာန်သုၚ်စောဲမံၚ် နကဵုသြန်ၝာတ်သေံဂှ်ရ ပရေၚ်ဇီုကပိုက်ဒး နွံမံၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“ကြဴနူပရိုၚ် ကံၚ်ဇြဳပၞာန် တက်တြးပ္တိတ် သြန်တၞးတၟိ ၂၀၀၀၀ ဒ္ကေဝ်ဂှ်တုဲ လွာဲဂှ်ဟေၚ် ဒမြိပ်သၠာဲသြန် သေံ-ဗၟာဂှ် ပရေံတိုန်ကၠုၚ် ကွေံကွေံရ။ စိုပ်မံၚ်အကာဲအရာ သွက်ဒးဒှ်ဓဝိၚ်ရဂှ် အဲမိက်ဂွံဟီုရ။ ဂကောံဇြဟတ်ပၠန်ဂတး ချဳဒရာၚ်မံၚ် ပ္ဍဲဒေသပယျဵု သေံ-ဗၟာဏံသီုဖအိုတ်ဂှ် ဇွောံမစၞစ၊ လွဟ်လက်နက်မကမ်၊ ဂဥုဲဇဗ တၚ်နွံပၟိက်ပိုဲ သီုဖအိုတ်တံဂှ် ဒးဗ္ဒဗ္ဒါဲမံၚ်သေံရ။ ဒးရာန်သုၚ်စောဲမံၚ် ကဵုသြန်ၝာတ်သေံဂှ်ရ လ္တူၚုဟ်နှေန်ပြံၚ်သၠာဲအာ၊ ၚုဟ်သြန်ၝာတ်သေံ သၠုၚ်တိုန်အာဂၠိုၚ်ကဵုဆဂှ် ပိုဲတံ ပရေၚ်ဇီုကပိုက် ၜိုတ်ထေက်ကြိုက်နွံဒၟံၚ်ရဂှ်” ညးသ္ဂးရ။
ကံၚ်ဇြဳပၞာန်ဂှ် နဒဒှ်စၟတ်သမ္တီ ကျာ်ပဋိမာရုပ်မာရဝိဇယ အာစိုပ်ဒတုဲကဵု စိၚ်ဗ္တာၚ် ရဋ္ဌနန္ဒက ဆဵုလဝ် ပ္ဍဲဂိတုဂျူလာၚ် စၟတ်တ္ၚဲ (၂၃) သၞာံတုဲကၠုၚ်တေံ ပေၚ်မွဲသၞာံတုဲ တက်တြးပ္တိတ်အာ သြန်တၞးတၟိ ၂၀၀၀၀ ဒ္ကေဝ်ဂှ်ရောၚ် ပ္ဍဲဂိတုဂျူလာၚ် စၟတ်တ္ၚဲ (၂၃)ဂှ် လလောၚ်ပ္တိတ်လဝ်ရ။
ကြဴနူတၚ်လလောၚ်တြးဂှ်တုဲ လွာဲဂှ်ဟေၚ် ဗွဝ်ဖျာပ္ဍဲဍုၚ် ကလိုက်ကၟဵုတိုန် ပံက်ၚုဟ်ဗွဝ်ဖျာဟွံမာန်ရတုဲ ပ္ဍဲဗွဝ်ဖျာ သြန်ဍုၚ်သ္အာၚ်ဂှ်လေဝ် ၚုဟ်သၠာ်တိုန်အာလဝ် မွဲအသိၚ်ဓဝ်ရ။
ဟိုတ်နူပရေၚ်သြန်ဖောဝ်ဍုၚ်ဗၟာဂှ်တုဲ နကဵုသြန်ထံက်ပၚ် ညးဍုၚ်ကွာန်ကောန်အရာပ် မၞုံအပ္ဍဲဍုၚ်တံဂှ် ဒးရာန်ကေတ်မံၚ် လွဟ်လက်နက်မကမ် နကဵုသြန်ၝာတ်သေံဂှ်ရ ၜိုတ်ထေက်ကဵုဂွံဂှ် ဟွံဂွံတုဲ ယအ်စှ်ေအာ တၟာဂလိုၚ်ရဂှ် ဂကောံဒပ်ပၠန်ဂတးရပ်လွဟ်တံ ဟီုသ္ဂးအိုတ်ရ။
မွဲလ္ပာ်ပၠန်ဂှ်လေဝ် ကောန်ဍုၚ်ဗၟာစိုပ်ဍုၚ်သ္အာၚ်တံဂှ် လ္ပာ်သ္ပမာန် ဟိုတ်နူပရေၚ်ထံက်ပၚ်လဝ်သြန် ပ္ဍဲပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန် နွံမံၚ်ဂှ်ရ ပၠန်ဂတးကညၚ် ဆက်တုဲဂွံဂျိုၚ်အာဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီု-MOD
sanlontai