သွက်ဂွံဒးဆဵုဂဗသဳကၠဳဟၟဲပုဟ် ကံၚ်ဇြဳပၞာန် ဟီု

နေပျဳဒဝ် ၊ အဝ်ဂေတ်(၂၃)

ကဵုဂကောံဒစဵုဒစးတအ်ဂှ် သွက်ဂွံကွာ်ဂါံအာ ဂၠံၚ်တရဴပရေၚ်ဆဵုဂဗသဳသဳကၠဳ အတိုၚ်ပရေၚ်ဍုၚ်ကွာန် ဟၟဲပုဟ်ဂှ် က္ဍိုပ်သ္ကိုပ်ဂကောံလလောၚ်ပရိုၚ်ဍာံကံၚ်ဇြဳပၞာန် ဂအုပ်ဗိုလ်ဇြဝ်မေန်ထောန် ဟီုသ္ဂးလဝ်ရ။

ပ္ဍဲပေါဲသောၚ်ကလးပရိုၚ်ကံၚ်ဇြဳပၞာန် မရနုက်ကဵု (၂၂) ဝါ ကၠောန်ဗဒှ်လဝ် ပ္ဍဲဂိတုအဝ်ဂေတ် စၟတ်တ္ၚဲ (၂၂) ဂှ် လ္တူတၚ်သၟာန် ကာလအနာဂတ်ဂတဏံ နကဵုကံၚ်ဇြဳပၞာန် သုၚ်စောဲကၠုၚ် ဂၠံၚ်တရဴပရေၚ်ဆဵုဂဗသဳကၠဳမာန်ဟာဂှ် ဂအုပ်ဗိုလ်ဇြဝ်မေန်ထောန် ဟီုသှ်လဝ် သာ်ဏံရ။

ဂအုပ်ဗိုလ်ဇြဝ်မေန်ထောန်ဂှ် နကဵုဒပ်ပၞာန် နူကၠာဟွံကေတ်လဝ်တာလျိုၚ်ကၟိန်ဍုၚ်ဏီဂှ် စပ်ကဵုမာဲဟွံဗဗွဲဓဝ်တုဲ သောၚ်ကလးလဝ်ကဵု မဳဒဳယာတအ် ဂတမုက်ကၟိန်ဍုၚ်နာနာ သီုသက်သဳသာဓကစုၚ်ၚ်လေၚ်ၚ် ဗွဲမကၠးဖ္ဍးတုဲ ပါလုပ် သီုသွက်ဂွံဆဵုဂဗသဳကၠဳ ညံၚ်ဂွံကလေၚ်စၟဳစၟတ်ကဵုစရၚ်မာဲ ဂၠံၚ်တရဴလၟေၚ်ကမၠောန်ဒးကၠောန်ရေၚ်တၠုၚ် သီုဖအိုတ်ဂှ် ၜိုန်ရရေၚ်တၠုၚ်လဝ်ကီုလေဝ် ဟွံအံၚ်ဇၞးကၠုၚ်လဝ်ရဂှ် ဟီုသ္ဂးလဝ်ရ။

ဟိုတ်ဂှ်ရ သွက်ဂွံဒးဆဵုဂဗသဳကၠဳကဵု ဂကောံရုဲစှ်ဏာလဝ် ဂၠံၚ်တရဴရပ်လွဟ်တအ်ဂှ် ဟၟဲတုဲ ယဝ်ရဒးသဳကၠဳမ္ဂး သွက်ဂွံဒေါံဒေၚ်ပရေၚ်ပ္ကီုပရာပ် ကေုာံ ဒဒှ်ရပျုတ်ဗ္ဒေက် ပွပ္ကီုပရာပ်တအ်ဂှ် ညံၚ်ညးဂၠးကဝ်တအ်ဂွံတီ ဒးလလောၚ်တြးရောၚ်ဂှ် ဟီုလဝ်ရ။

ညးသ္ၚဳဂၠိပ်ပရေၚ်ဍုၚ်ကွာန် ဥူတာန်သိုဝ်နိုၚ်ဂှ်မ္ဂး နကဵုကံၚ်ဇြဳပၞာန် လ္တူဒးဒုၚ်ကၟာတ်ဒၟံၚ်ပရေၚ်ဍုၚ်ကွာန်ဂှ် ဒှ်ပရေၚ်ဟီုသှ် ဆၜိုတ်အယာံမာတ်မုက်ဂွဂွံပြေဟေၚ်ဒှ်တုဲ လးဖျေံဒၟံၚ် ဂၠံၚ်တရဴပရေၚ်ဆဵုဂဗသဳကၠဳ မံက်ဂတဝ်ပြာကတ်ဒၟံၚ်ရဂှ် သ္ၚဳဂၠိပ်လဝ်ရ။

“လစွံစိုတ် ဍေံတအ်ဟီုလဝ်အခိၚ်ကၠာတေံဂှ် ဂတးတုဲ က္လေၚ်ဟီုထ္ၜးဒၟံၚ်ရ၊ အတိုၚ်ကၠာတေံရ ကဵုသၟာပ္ကီုပရာပ်တအ်ဂှ် ဆလအ်လေဝ် ဟွံသဳကၠဳပုဟ် အရေဝ်ဟီုလဝ်ဂှ်။ ဇေတ်တ်တေံ လ္တူပရေၚ်ဍုၚ်ကွာန် ဒးဒုၚ်ကၟာတ်ဂွံလဝ်ဂှ် သွက်ဂွံကၟာတ်ဒၞာ ညံၚ်မုက်ဂွဂွံပြေဂှ် တ္ၚဲဏံ ဟွံသဳကၠဳကဵု ဂကောံပ္ကီုပရာပ်တအ်ပုဟ် ဟီုဂးဒၟံၚ်ရ။ ဆ္ဂး သွက်ဂွံသဳကၠဳ ဍေံတအ်လးကဵုဒၟံၚ်ဂၠံၚ်ဂှ်တှ်ေ အတိုၚ်ဌာန်ပရိုၚ် ဆက်စပ်ဒၟံၚ်ကဵုကၟိန်ဍုၚ်နာနာတအ် ဟီုလဝ်ဂှ်တှ်ေ မံက်ကၠးဒၟံၚ်ရ။ ဍာံဍာံတေံဂှ် လစွံစိုတ်သွက်ဂွံသဳကၠဳဂှ် ဟွံဓမံက်ထ္ၜးဏီဂှ် ဒှ် NUG ရဂှ် အဲဂှ်တှ်ေ ညာတ်ကေတ်လဝ်ရ”ဂှ် ညးဟီုသ္ဂးလဝ်ရ။

အလဵုအသဳပရေၚ်ညဳသၟဟ်ကောန်ဂကူ (NUG)၊ ကဝ်မတဳသ္ပစၞးကၠတ်ထဝ်ကၟိန်ဍုၚ် (CRPH)၊ ကေုာံဒပ်ပၞာန်စဵုဒၞာညးဍုၚ်ကွာန် (PDF) ဒှ်ဂကောံဇြဟတ်ဒစဵုဒစးပၠန်ဂတးတအ်ဂှ် ကံၚ်ဇြဳပၞာန်လလောၚ်တြးလဝ် နဒဒှ်ဂကောံပ္ကီုပရာပ်ရ။

နကဵုကံၚ်ဇြဳပၞာန်ဂှ် သွက်ဂွံက္လိဂွံဓဝ်ၜိုဟ်လလံပ္ဍဲဍုၚ် ရေၚ်တၠုၚ်ဒၟံၚ်ကဵု ဂကောံ EAO တအ်ဂှ်ကီု သွက်သ္ဂောံက္လိဂွံ ပရေၚ်ဍုၚ်ကွာန်ညိၚ်ဝတ်တန်ကြန် ပရေၚ်ဆဵုဂဗသဳကၠဳဒၟံၚ်ကဵုဗော်ပရေၚ်ဍုၚ်ကွာန်တအ်ကီု လၟေၚ်ကမၠောန်ကၠောန်ရေၚ်တၠုၚ်ဒၟံၚ် သွက်ဂွံကၠောန်ဗဒှ်ပေါဲရုဲ ဆက်အာဂတတေံမာန်တအ်ဂှ် ဆက်ကၠောန်ရေၚ်တၠုၚ်အာ အသိၚ်ဟွံပိုတ်သ္ကုတ်ရောၚ်ဂှ် ဂအုပ်ဗိုလ်ဇၞော် ဇြဝ်မေန်ထောန် ဟီုလဝ်သ္ဂးလဝ်ရ။

ကြဴနူသီအဝဵုတုဲ သ္ကုတ်လကြဴ စဵုကဵုစိုပ်အခိၚ်တ္ၚဲဏံဂှ် မ္ၚးနူဒပ်ကံၚ်ဇြဳပၞာန် ဒးဆေၚ်ဒၟံၚ်မုက်ကဵု ပရေၚ်ဒစဵုဒစးပၠန်ဂတးရပ်လွဟ် ဒပ်စဵုဒၞာညးဍုၚ်ကွာန် (PDF) ယၟုဂၠိုၚ်ကဵုဂကူ မံက်တိတ်ကၠုၚ်ဒၟံၚ် အလုံမွဲကၟိန်ဍုၚ်ဂှ်တုဲ ကဵုဂကောံရပ်လွဟ်ကောန်ဍုၚ်အရၚ် လ္ၚဵုတအ်လေဝ် ဒှ်ဒၟံၚ်ပေါဲဗတိုက်ရ။

မွဲလ္ပာ်ပၠန်ဂှ် ပေါဲဗတိုက်ဆေၚ်မုက် ဒပ်ကံၚ်ဇြဳပၞာန်ကဵု ဒပ်ရပ်လွဟ်တအ်ဂှ်လေဝ် သ္ပတံနူသၞာံဏံမံက်တုဲ ပ္ဍဲပရေၚ်ချဳဒရာၚ်ပၞာန်ဗလးမုက်တိဂှ် လ္ပာ်ဒပ်ပၞာန် သၠဒ္ကေဝ်ဟွံသာတုဲ ဒးထပ်စုတ်အဇာ သုၚ်စောဲကၠုၚ်ဒၟံၚ် ပရေၚ်ပန်ဗတိုက်ကဵု က္ၜၚ်ကျာ ကေုာံလွဟ်ဇၞော်တအ်ရ။

ပ္ဍဲဂိတုဂျူလာၚ် တုဲကၠုၚ်တေံဂှ် သုၚ်စောဲယၟုဒဝ်အံၚ်သာန်သုကျဳ က္ဍိုပ်သ္ကိုပ်ညးဍုၚ်ကွာန်တုဲ ကြဴနူကံၚ်ဇြဳပၞာန် ပြံၚ်ပဆုဲကၠုၚ် ဂွန်ပရေၚ်ဍုၚ်ကွာန်တုဲဂှ် ဂကောံဇြဟတ်ပရေၚ်ပၠန်ဂတးတအ်ဂှ် ပၠန်ဂတး အပြံၚ်သၠာဲ ညးအုပ်ဓုပ်ဟွံသေၚ် အပြံၚ်သၠာဲ ပြံၚ်သၞောတ် ဒက်ပ္တန်ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳဟေၚ်ရဂှ် ဟီုပ္တိတ်လဝ်ညးသ္ကအ်အိုတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-Social Media