ပ္ဍဲကြုၚ်ဒဵု လွဟ်ဇၞော်ဒတုံစှ်ေတုဲ ကောန်အရာပ်မွဲတၠချိုတ်လဝ်

ကြုၚ်ဒဵု၊ အဝ်ဂါတ်(၂၃)

တွဵုရးကရေၚ်၊ ပွိုၚ်ဍုၚ်ကြုၚ်ဒဵု၊ ပ္ဍဲကွာန်ဒံၚ်ကျာအေန်ဂှ် ဟိုတ်နူပရေၚ်ကံၚ်ဇြဳပၞာန်ပန်ပှော်လွဟ်ဇၞော်တုဲ ညးဍုၚ်ကွာန်ကောန်အရာပ်မွဲတၠ ဒးချိုတ်လဝ်ရဂှ် KNU ခရိုၚ်ဒူပလာယာ လလောၚ်တြးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၂)ဂှ်ရ။

တုဲကၠုၚ် ဂိတုအဝ်ဂါတ်၊ စၟတ်တ္ၚဲ (၁၉) အခိၚ်လ္ဒေါဝ်တ္ၚဲၜိုတ် (၁၂)နာဍဳဂှ် ဒပ်ကံၚ်ဇြဳပၞာန်ဗပေၚ်ကၠုၚ်ဇြဟတ် ပ္ဍဲပွိုၚ်ဍုၚ်ကြုၚ်ဒဵု၊ ဗ္ဒါဲဂၠံၚ်က္ဍိုပ်ဒဒန် ဒံၚ်ကျာအေန်ဂှ် ဂကောံဒပ်ပံၚ်ကောံ KNDO တံ အာစိုပ်ဗ္တိုက်လဝ် နကဵုဒရုၚ်ရ။

ဒပ်ကံၚ်ဇြဳပၞာန် ဒးဂိအာလဝ် ပ္ဍဲပေါဲဗ္တိုက်ဏံဂှ် ပန်ပှော်လဝ်လွဟ်ဇၞော် ပ္ဍဲကွာန်ဒံၚ်ကျာအေန် ဟွံအောန်နူကဵု (၁၀)မရ။

ဟိုတ်နူဒပ်ကံၚ်ဇြဳပၞာန်ပန်ပှော်လွဟ်ဇၞော်တုဲ မာန်မျေတ်ကျဝ် အာယုက် (၅၀)သၞာံ ဒးလွဟ်မကမ်တုဲ ချိုတ်အာလဝ် ပ္ဍဲဒၞါဲဒှ်ပရောဂှ်တုဲ သ္ၚိဒၟံၚ်ညးဒေသ (၃) မလေဝ် ဇီုကပိုက်လီုလာ်လဝ်ရဂှ် KNU သ္ဂးရ။

ပ္ဍဲပရေၚ်ဗ္တိုက်ကဵုဒရုၚ်ဂှ် လ္ပာ်ကံၚ်ဇြဳပၞာန် ပါလုပ်သီုသၞာဲဒဴ (၁) တၠဂှ် (၂)တၠချိုတ်တုဲ ကလိဂွံလဝ်ဝပ် (၆)ရတၠ ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

တုဲကၠုၚ်ဂိတုအဝ်ဂါတ် စၟတ်တ္ၚဲ (၁၈)ဂှ်လေဝ် ဒပ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲဘာဗ္တောန်လိက်ဒံၚ်ကျာအေန်ဂှ် ဒးဒုၚ်ဗ္တိုက်လဝ်ကဵုဒရုၚ်တုဲ ဗိုလ်ဇၞော်အံၚ်ကံၚ်မာန် နူကဵုဒပ်ကံၚ်ဇြဳပၞာန် ချိုတ်တုဲ (၄) တၠ ဂွံလဝ်ဝပ်ရဂှ် ဂွံတီကေဝ် အတိုၚ်တၚ်လလောၚ်တြး KNUရ။

ဗွဲကြဴဏံ လွဟ်ဇၞော်ကံၚ်ဇြဳပၞာန် ပန်ပှော်လဝ်တံ ဒတုံဗ္တိုဟ်ထ္ကးလဝ် ပ္ဍဲကွာန်ဒံၚ်တလာ(တောၚ်တလာ)၊ ပွိုၚ်ဍုၚ်ကြုၚ်ဒဵုတုဲ ဂၠဴသ္ၚိဒဝ်မူထောတ်လှိုၚ် ဒၟံၚ်ကွာန်ဒံၚ်တလာ (၄) ဇီုကပိုက်ဒးလဝ်ဘဲဝပ်ရဂှ် KNU လလောၚ်ပ္တိတ်လဝ်ရ။

ပရိုၚ် – သြၚ်လောန်တိုၚ်(မ်)

ဗီု – ပရိုၚ်ကေုာံ ပရေၚ်လလောၚ်ပရိုၚ်-ခရိုၚ်ဒူပလာယာ