ဖနွောန်ပေန်၊ အဝ်ဂါတ်(၂၃)
ပ္ဍဲဂိတုအဝ်ဂါတ် စၟတ်တ္ၚဲ (၂၂)ဂှ် ညးမဒှ်ကောန်ဗၠာဲဟွောန်ဇြာန် ဇၞော်အိုတ်ဂှ် ပါလဳမာန်ကမ္ဘောဒဳယာ ရုဲစှ်လဝ် နဒဒှ်သ္ကိုပ်ဝန်ဇၞော်တုဲ အခိၚ်ပေါဲရုဲမာဲကၠောန်ဗဒှ်လဝ် ပ္ဍဲဂိတုတုဲကၠုၚ်တေံတုဲဂှ် ပြံၚ်စၠောံပ္အပ်ပြာပ်ကဵုလဝ် အဝဵုရ။
ပ္ဍဲကောံဓရီုပါလဳမာန်ဂှ် ထံက်လဝ်ဂလာန် ကုဟွောန်မနေတ် နဒဒှ်ဝန်ဇၞော်ညဳညဳသၟဟ်ဟ်ရဂှ်လေဝ် ဓမံက်လဝ် ပ္ဍဲပရိုၚ်ဂမၠိုၚ်ရ။
ဗော်ဟွောန်ဇြာန် CPP Cambodian People’s Party ဂှ် က္လိဂွံလဝ်ပရေၚ်အံၚ်ဇၞး ပ္ဍဲပေါဲရုဲမာဲတုဲ ဟွောန်မနေတ်ဂှ်လေဝ် ကြဴနူပေါဲရုဲမာဲတုဲဂှ်ဟေၚ် ဟီုလဝ်ကဵု ညးလုပ်ဂကောံပါလဳမာန်တအ် တ္ၚဲဏံဂှ် ဒှ်တ္ၚဲလုပ်ဝၚ် သွက်ကမ္ဘောဒဳယာရ။
ဟွောန်ဇြာန်ညးယိုက်ဂၠေၚ်လဝ်တာလျိုၚ်အယုက်ဂၠိၚ်အိုတ် ပ္ဍဲဂၠးကဝ်ဂှ်လေဝ် ကြဴနူဂွံဇၞးကေတ် ပေါဲရုဲမာဲတုဲ မွဲတ္ၚဲဂှ်ဟေၚ် ပြံၚ်စၠောံကဵုလဝ်အဝဵု ကုဟွောန်မနေတ်တုဲ စ္ဍးပါဲတိတ်ကဵု နူဌာနန္တရရောၚ်ဂှ် ဟီုသ္ဂးလဝ်ရ။
ပ္ဍဲအလဵုအသဳတၟိဟွောန်မနေတ်ဂှ် မဟာမိတ် ကေုာံ မသကလောကောဒေံ၊ ကောန်ဇာတ် ဟွောန်ဇြာန်တအ်ဂှ် သွက်ဂွံလုပ်ကၠောန်အာ ပ္ဍဲကဆံၚ်ဌာနန္တရသၠုၚ်အိုတ်တအ်လေဝ် နွံဒၟံၚ်ရ။
ကောန်ဗၠာဲဟွောန်ဇြာန်ဍောတ်အိုတ် ဟွောန်မနဳဂှ်မ္ဂး ဒှ်ကၠုၚ်ဝန်ဇၞော် ပေရၚ်ရေၚ်တၠုၚ်ညးဍုၚ်ကွာန်တုဲ ကောန်ကၟိန်ဟွောန်ဇြာန် ယိုက်ဂၠေၚ်ဒၟံၚ်တာလျိုၚ် သ္ကိုပ်သ္ကဒပ်ဗၠာဲအခိၚ်လၟုဟ်ဏံဂှ်မ္ဂး ဒးယိုက်ဂၠေၚ်အာ နဒဒှ်တာလျိုၚ် ဒုတိယသ္ကိုပ်ဝန်ဇၞော်ရောၚ်ဂှ်လေဝ် ဂွံတီကေတ်လဝ်ရ။
ကောန်ဗၠာဲဝန်ဇၞော် ပရေၚ်အပ္ဍဲဍုၚ် ကေုာံ ဝန်ဇၞော်ပရေၚ်ပစဵုဒၞာတအ်လေဝ် ဂွံဒုၚ်ပြံၚ်စၠောံကေတ် ဌာနန္တရအပါညးတအ်ရဂှ်လေဝ် ဒဒှ်ရဂွံတီကေတ် အတိုၚ်စရၚ်ဂကောံအလဵုအသဳတၟိဂှ် ဌာန်ပရိုၚ် AFP ဓမံက်ထ္ၜးလဝ်ရ။
ကၟိန်ဍုၚ်အမေရိကာန်၊ ကုလသမဂ္ဂ ကေုာံ ဥရောပသမဂ္ဂတအ်ဂှ်မ္ဂး ပေါဲရုဲမာဲကမ္ဘောဒဳယာဂှ် ပရေၚ်ဗၠးၜးကီု၊ ပရေၚ်ဗဗွဲဓဝ်ကီု ဒဒှ်ရဟၟဲဂှ် ဟီုသ္ဂးလဝ်ရ။
ပရေၚ်ဟွောန်ဇြာန်ပြံၚ်စၠောံကဵုလဝ်အဝဵုဂှ် ဝေၚ်ပါဲလဝ် ပရေၚ်ဆီပါ်ဍာ်ဇွောဝ်တုဲ သွက်ဂွံထိၚ်ဒဝ်ပရေၚ်ၜိုဟ်လလံ ဃောဟီုသ္ဂးဒၟံၚ်ဂှ် လ္ပာ်ကမ္ဘောဒဳယာ တးပါဲလဝ် တၚ်စောတ်စောဲတအ်ဂှ်ရ။
ဟွောန်မနေတ် ကတ်ဗ္တောန်လဝ်ပညာ ပ္ဍဲဗြိတိၚ် ကေုာံအမေရိကာန်ဂှ်မ္ဂး ဂွံညာတ်ကေတ်ဒၟံၚ် တၠုၚ်လအာဗီုပြၚ်ကွာ်ဗက်အာ လၟေၚ်ဂၠံၚ်တရဴ လေတ်ဗရဴ လက်ထက်အပါညးရဂှ်လေဝ် ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်တအ် ဟီုသ္ဂးလဝ်ရ။
ဟွောန်မနေတ် ဒှ်ကၠုၚ်ညးလုပ်ဂကောံဗော်ဂွံအဝဵုလၟိုန်မွဲတၠဂှ်မ္ဂး သ္ပတံနူ သၞာံ ၂၀၁၈ တေံဂှ် ညးစယိုက်ဂၠေၚ်လဝ်တာလျိုၚ် နဒဒှ်သ္ကိုပ်သ္က ဒပ်ပၞာန်ဝၚ်နန်ကမ္ဘောဒဳယာ မွဲတၠလေဝ်ဒှ်ရ။
Ref,AFP
sanlontai