ထဝါဲ၊ အဝ်ဂါတ်(၂၄)
ရးဒေသတၞၚ်သဳ၊ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ထဝါဲ ဒေသ(အရှေ့တော)ကဵု ပွိုၚ်ဍုၚ်တယျေတ်ချံၚ် ပွိုၚ်တိုက်ဒံၚ်ပျံက်ဂှ် ရပ်ဒက်လဝ် ညးဒေသ (၂၀) တၠ နဒဒှ်ဒေၚ်ဒုၚ်ဒၞာမၞိဟ်ရဂှ် ဒပ်စဵုဒၞာဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ်ပါလုပ် ဗ္ဒါဲ (၁၀၀)ဂှ် သ္ပတံနူဂိတုအဝ်ဂါတ် စၟတ်တ္ၚဲ (၂၁) တေံတုဲ ပ္ဍဲပွိုၚ်တိုက်ဒံၚ်ပျံက်ဂှ် ဂေတ်လၟေၚ်ကွာန်တုဲ ထ္ပက်မံၚ်ကရောၚ်ပၞာန်ရ။
ကရောၚ်ပၞာန်ကံၚ်ဇြဳပၞာန်ဂှ် ညးဒေသ နူကွာန် မၞုံပ္ဍဲမွဲဒမြိပ်ဂၠံၚ်ဍေံတံဇက်တိုန်ကၠုၚ် (၂၀)တၠ ပြၚ်တံဂှ် ရပ်ဒက်လဝ် နဒဒှ်ဒေၚ်ဒုၚ်ဒၞါမၞိဟ်တုဲ ဖျေံဗဒိုပ်မံၚ်တန်တဴဒၟံၚ် ပ္ဍဲကွာန်ဝေန်ကဖဝ်ရ။
ကရောၚ်ပၞာန်ဏံ ပ္ဍဲစၟတ်တ္ၚဲ (၂၃) အခိၚ်နူဂယးဂှ် နူကဵုကွာန်ဝေန်ကဖဝ် ဆက်ကော်ဏာလဝ် ညးဒေသရပ်ဒက်လဝ် နဒဒှ်ဒေၚ်ဒုၚ်ဒၞါမၞိဟ်တံဂှ်တုဲ ဆက်စ္ဍးတိတ်အာ လ္ပာ်ကွာန် ဗျက်ဝိတာရဂှ် ကောန်ဒပ်စဵုဒၞါဒေသမွဲတၠဂှ် ဟီုရ။
ပ္ဍဲဒေသ(အရှေ့တော)ထဝါဲဂှ်လေဝ် တုဲကၠုၚ် ဂိတုအဝ်ဂါတ် စၟတ်တ္ၚဲ (၂၀)တေံဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တံ ရပ်ဒက်လဝ်ညးဒေသ ကွာန်ရမ္မဇူ၊ ဝကုန် ကဵု တယျေတ်ၚုက်တံ (၃)တၠတုဲ ကော်ဏာလဝ် နဒဒှ်ဒေၚ်ဒုၚ်ဒၞါမၞိဟ် အတိုၚ်မွဲဒမြိပ်ကရောၚ်ပၞာန်ရဂှ် ဂွံတီကေတ် နူဇရေၚ် ဒပ်စဵုဒၞါဒေသတံရ။
ညးဒေသ ဒပ်ကံၚ်ဇြဳပၞာန်တံ ရပ်ဒက်ဏာလဝ် နဒဒှ်ဒေၚ်ဒုၚ်ဒၞါမၞိဟ် (၂၀)တၠပြၚ်တံဂှ် လအ်စဵုကဵုပွိုၚ် (၃) တ္ၚဲ ကလေၚ်ဗၠးတိတ်ကၠုၚ်ဟွံမွဲဂှ်ရ ဂကောံသ္ၚိကၟိန်တံဂှ် ပွဒှ်ဓဝိၚ်သွက်အန္တရာယ်လမျီုညးတံ နွံမံၚ်ရဂှ် ညးဒေသတံ ဟီုဂးလဝ်ရ။
ဟိုတ်နူကံၚ်ဇြဳပၞာန် ထ္ပက်မံၚ်ကရောၚ်ပၞာန် ပ္ဍဲဒေသ (အရှေ့တော)ထဝါဲကဵု ပွိုၚ်တိုက်ဒံၚ်ပျံက်တံဂှ်ရ ညးဒေသ နူကဵုကွာန် (၁၀)ကွာန်ပြၚ်တံ ဂၠိုၚ်ကဵုလ္ၚီ ထောံလသာဌာန်ဒၟံၚ်တုဲ ဒးဂြိပ်ဒဴဒၟံၚ်တုဲ စဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ် အိုတ်ဏီရ။
ပ္ဍဲရးတၞၚ်သဳဂှ် ကြဴနူဒပ်ပၞာန်သီအဝဵုတုဲ ဒပ်ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန်ဂှ် ပ္ဍဲပေါဲဗ္တိုက်တံဂှ် ပွရပ်ဒက်ညးဒေသ နဒဒှ်ဒေၚ်ဒုၚ်ဒၞါမၞိဟ်ကီု၊ ပွပျဲပျာံဂစိုတ်ဂယိုၚ်တံကီု သီုပွစံၚ်ပလီုပလာ်သ္ၚိဒၟံၚ်တံ က္လိလောန်မံၚ် အဆက်က်ရဂှ် ဂကောံသုတေသန ပ္ဍဲဒေသတံ လလောၚ်ပ္တိတ်လဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai