ပ္ဍဲၜဳကလေၚ် ဒးမာၚ်တိုပ်တိတုဲ ညးဗြဴမွဲတၠ ကလိဂွံဝပ်

ၜဳကလေၚ်၊ အဝ်ဂါတ်(၂၅)

တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ပ္ဍဲကွာန်မယာန်ကုန်ဂှ် ပ္ဍဲဂိတုအဝ်ဂါတ် စၟတ်တ္ၚဲ ၂၃ အခိၚ်နူဂယးဂှ် ညးဗြဴမွဲတၠ လိုန်ဒးမာၚ်တိုပ်တိတုဲ ဂွံလဝ်ဘဲဝပ်သ္ကာတ်မြဟ်ရဂှ် ညးဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။

ဂိတုအဝ်ဂါတ် စၟတ်တ္ၚဲ(၂၃) အခိၚ်နူဂယး ၜိုတ် ၈ နာဍဳဂှ် ဒဝ်ဝါဝါနု အာယုက် (၅၀)သၞာံ ဒၟံၚ်ကွာန်မယာန်ကုန်ဂှ် အခိၚ်ကွာ်ကၠုၚ် ကၠအ်ညး မၞုံတၞုၚ်ကွာန်ဂှ် လိုန်ဒးလဝ်မာၚ်တိုပ်တိ ပ္ဍဲဗ္ဒါဲဗ္စပ်ကၠအ်ညးဂှ်ရ။

ဟိုတ်နူလိုန်ဒးမာၚ်တိုပ်တိတုဲ ဒဝ်ဝါဝါနုဂှ် ကတောဝ်ပါဲစာ်တုဲ ပ္ဍဲသပါတဲ ဒးလဝ်ကဝေက်မာၚ်တုဲ ပ္ဍဲထာၚ်ဂၞိၚ်ကဵု ဒဳတံဂှ် ဂွံလဝ်ဘဲဝပ် ကဝေက်မာၚ်လုပ်အာရဂှ် ဂွံတီကေတ်ရ။

ဒဝ်ဝါဝါနု ကလိဂွံလဝ်ဝပ်ဂှ် ဂကောံရီုဗၚ်ပရေၚ်မၞိဟ်တံ နူရုၚ်ဂဥုဲၜဳကလေၚ်မွဲကဆံၚ် ပလံၚ်ဗစိုပ်ဏာလဝ် ရုၚ်ဂဥုဲညးဍုၚ်ကွာန် ခရိုၚ်သဓီုရ။

ကွာန်မယာန်ကုန် ဒၞါဲဒဝ်ဝါဝါနု လိုန်ဒးလဝ်မာၚ်တိုပ်တိဂှ်မ္ဂး မ္ၚးနူဒပ်ကံၚ်ဇြဳပၞာန်တုဲ သီုကဵုဒှ်ဒေသ ဒပ်ပၞာန်ဗၠးၜးကောန်ဂကူကရေၚ် ဒပ်ပံၚ်ကောံ KNLA တံ ချဳဒရာၚ်ပရေၚ်ပၞာန် မွဲဒေသလေဝ်ဒှ်ရ။

တုဲကၠုၚ်ဂိတုဂျူလာၚ် သတ္တဟလက္ကရဴအိုတ်တေံဂှ်လေဝ် ဟိုတ်နူကရောၚ်ပၞာန်ကံၚ်ဇြဳပၞာန် လုပ်လ္ပာ်ကွာန်မယာန်ကုန်ဂှ်တုဲ အကြာဒပ်ပံၚ်ကောံ KNLA တံဂှ် ပေါဲဗ္တိုက်ၜါလ္ပာ် က္တဵုဒှ်လဝ်ဏီရ။

ပ္ဍဲတွဵုရးဍုၚ်မန်ဂှ် ကြဴနူဒပ်ပၞာန်သီအဝဵုတုဲ ဟိုတ်နူပရေၚ်မာၚ်တိုပ်တိဗ္တိုဟ် က္လေၚ်မွဲဝါပၠန်ဂှ်တုဲ ညးဍုၚ်ကွာန် ကောန်အရာပ် ဟွံအောန်နူ (၂၀)တၠ ဇီုကပိုက်ချိုတ်လဝ် နွံကၠုၚ်ဒၟံၚ်ရ။

ပရိုၚ်-သြၚ်လောန်တိုၚ်မ်

ဗီု-Social Media