မတ်မလီု၊ အဝ်ဂါတ် (၂၄)
ၚုဟ်ဗၞိက်စၞစသုၚ်သ္ဇိုၚ် ပါလုပ်သီုကဵုသ္ၚုတံ က္ဍၚ်တိုန်မံၚ်ဂၠိုၚ်ကဵုဆဂှ် ဟိုတ်နူတၠကမၠောန် ပရေၚ်ပိုန်ဒြပ်တံ ကေုာံညးဝေၚ်ၚုဟ်လှုဲတံရဂှ် လ္ပာ်ကံၚ်ဇြဳပၞာန် ပ္တိုန်လဝ်ဒုဟ်ရ။
ပ္ဍဲပေါဲသောၚ်ကလးလိက်ပရိုၚ် ကၠောန်ဗဒှ်လဝ် ပ္ဍဲဂိတုအဝ်ဂါတ် စၟတ်တ္ၚဲ (၂၂)တုဲကၠုၚ်တေံဂှ် လ္တူပွမဒးဒုၚ်ပ္တိတ်ကၠုၚ်တၚ်သၟာန် သွက်ပြဿနာ ၚုဟ်ကပေါတ်ဗၞိက်သၠုၚ်တိုန်ကၠုၚ် ဂၠိုၚ်ၚ်ကဵုဝါဂှ် လ္ပာ်ကံၚ်ဇြဳပၞာန် ပ္တိုန်လဝ်ဒုဟ် တၠကမၠောန်တံရ။
ကံၚ်ဇြဳပၞာန်ဂှ်တှ်ေ ပရေၚ်ၚုဟ်ကပေါတ်ဗၞိက် က္ဍၚ်တိုန်ကၠုၚ်ဂၠိုၚ်ကဵုဆ ပ္ဍဲလက်ထက်ဍေံတံဂှ် ၜိုန်ရဒုၚ်လဝ်ဝန်ကီုလေဝ် ဟိုတ်ဍေံဂှ် ဒၟာနူ ပရေၚ်ကၟာတ်လဒဵုဍုၚ်နာနာတံ၊ ညးဝေၚ်ၚုဟ်လှုဲတံ သီုတၠကမၠောန်ပရေၚ်ပိုန်ဒြပ်တံရဂှ် ပ္တိုန်ဒုဟ်ဟီုဂးကၠုၚ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်မ္ဂး ၚုဟ်ကပေါတ်ဗၞိက်က္ဍၚ်တိုန်ကၠုၚ်ဂှ် ဆေၚ်စပ်မံၚ်ကဵု လ္တူကံၚ်ဇြဳပၞာန် ထိၚ်ဒဝ် ပရေၚ်ၚုဟ်မးလှုဲဍုၚ်ဗၟာ စှ်ေမံၚ်အဆက်က်ဟွံမာန်ဂှ်ကဵု အခက်အခုဲပရေၚ်ကူသာန်သွံရာန်တံရဂှ် ထံက်ထ္ၜးလဝ်ရ။
“တၠကမၠောန်ပရေၚ်ပိုန်ဒြပ်တံဟီုဂှ် ၚုဟ်ဒဝ်ဠာ၊ ၚုဟ်သြန်ၝာတ်ဂှ် ညးတံသ္ပကေတ်ဂွံ ဟွံသေၚ်ပုဟ်လေဝ်။ ဥပမာ ပိုဲဂှ် ရာန်ကဵုၝာတ် (၁၁၀)တှ်ေ ကပေါတ်ပိုဲရာန်မွဲမွဲဏံဂှ် ညးဂှ်မွဲယှအ်ၚုဟ်ဂွံရော။ အဓိကဂှ်တှ်ေ ဍေံတံဂှ် ကၠောန်ညံၚ်ၚုဟ်လှုဲသ္ဂောံညိၚ်ဝတ်တုဲ ညံၚ်နှေန်သၠာဲလှုဲဂွံညိၚ်ဂှ်လေဝ် ဒးကၠောန်ကဵုရ။ အလဵုသဳ ဒးကၠောန်ကဵုအဓိကဂှ် ဣဏံရလေဝ်။ ညံၚ်ၚုဟ်မးသြန်ဍုၚ်ဗၟာသ္ဂောံတိုန် ကၠောန်ကဵုမာန်ဂှ် ဍေံတံရနွံ။ ပိုဲဂှ် ဗီုလဵုဂွံကၠောန်ကဵု ဂွံရော။ အဓိကဂှ်တှ်ေ ဟိုတ်နူၚုဟ်လှုဲတိုန်မံၚ်တုဲ ၚုဟ်ကပေါတ်ဗၞိက် တိုန်မံၚ်ရ။ ညံၚ်ၚုဟ်နှေန်သ္ဂောံညိၚ် ကၠောန်မာန်တှ်ေ ပိုဲဂှ် ညိၚ်မံၚ်ဖအိုတ်ရ။ မပတံကဵု ကၠေၚ်စက်တံ သီုဖအိုတ်ဂှ် ဒးအာမံၚ်ကဵုဒဝ်ဠာရလေဝ်။ သြန်ဍုၚ်သ္အာၚ် ဒဝ်ဠာဂှ်တိုန်မ္ဂး ၝာတ်တံမုတံလေဝ် ဗက်တိုန်ကီု အဓိပ္ပာယ်ဂှ်ရ။ ဟိုတ်နူပေါဲသောၚ်ကလးလိက်ပရိုၚ် နူကနေံဏံဂှ်တုဲ တ္ၚဲဏံ ၚုဟ်တံ တိုန်အိုတ်ရ၊ နူကနေံတေံ အခိၚ်ကၠောန် ပေါဲသောၚ်ကလးလိက်ပရိုၚ်ဂှ် ရပ်ဏောၚ်မုဏောၚ်ဟာဟီုတှ်ေ ၚုဟ်တံဂှ် စှ်ေအိုတ်ရ၊ တ္ၚဲဏံဂှ်တှ်ေ နူကနေံတေံဍေံတံ ပ္တိုန်ထောံဒုဟ် ကုသၟာကူသာန်သွံရာန်တံတှ်ေ တ္ၚဲဏံဂှ် လွာဲဂှ်ဟေၚ် ၚုဟ်တိုန်ကၠုၚ်ရူရူရ” ဟီုသ္ဂးလဝ် သာ်ဏံရ။
ပ္ဍဲလက်ထက်ကံၚ်ဇြဳပၞာန်ဂှ် ၚုဟ်ကပေါတ်ဗၞိက်စၞစသ္ဇိုၚ်တံ ပါလုပ်သီုကဵုသ္ၚုဂှ် ကပေါတ်မွဲဂကူမ္ဂး အောန်အိုတ် နူ (၃)ဆ စဵုကဵုဗ္ဒါဲ (၄) ဆဂှ် ၚုဟ်နှေန် သၠာ်တိုန်ကၠုၚ်တုဲ သ္ၚုယှိုဲဗိုဝ်(ပေါ်ဆန်မွှေး)မွဲရိုက်ဓဝ်ဂှ် ၚုဟ်သၠုၚ်တိုန်ကၠုၚ်မံၚ် စဵုကဵု ၁၅၀၀၀၀ပြၚ်ရ။
သွက်ဂွံပသောၚ်ပြဿနာ ၚုဟ်ကပေါတ်ဗၞိက်က္ဍၚ်တိုန်ဒၟံၚ်ဂှ်ကဵု ၚုဟ်သြန်ဍုၚ်သ္အာၚ်သၠုၚ်တိုန် မက္တဵုဒှ်မံၚ်လၟုဟ်ဏံဂှ် ဒက်ပ္တန်ကဝ်မတဳဂမၠိုၚ်တုဲ ရေၚ်တၠုၚ်မံၚ်ရဂှ် လ္ပာ်ကံၚ်ဇြဳပၞာန် ဟီုဂးလဝ်ရ။
ဥူတေအ်လွေန် ကောန်ဂကောံကဝ်မတဳ (CRYU) ညးစၞးကၠတ်ထဝ်ရးလ္ဂုၚ် သီုမဒှ်ညးသ္ၚဳဂၠိပ်သြန်လှုဲမွဲတၠဂှ် ညံၚ်ၚုဟ်ကပေါတ်ဗၞိက်သ္ဂောံစှ်ေဂှ် ၜိုန်ရ ကံၚ်ဇြဳပၞာန် ဖအောန်ဖျေံဗၞိက်ပၠုပ်ကဵု ဗက်ထိၚ်ဒဝ်မံၚ် သြန်သၟာဗၞိက်ပ္လံၚ်တံ ဂွံနၚ် နူဗၞိက်ပလံၚ်ပ္တိုန်တံဂှ်ကီုလေဝ် ဒှ်ကလောန်ဟွံမာန်ပုဟ်ဂှ် သ္ၚဳဂၠိပ်လဝ်ရ။
“အကာဲအရာဍုၚ်ပိုဲဂှ် နူတမ်ဝါဒိတေံရ ပ္ဍဲတၚ်နွံပၟိက်လၟေၚ်တ္ၚဲတံဂှ်လေဝ် ပိုဲဂှ် ဒှ်ဍုၚ်ဒးဗ္ဒဗ္ဒါဲဒၟံၚ်ဗၞိက်ပၠုပ်ရလေဝ်။ ပ္ဍဲတၚ်နွံပၟိက်လၟေၚ်တ္ၚဲပိုဲတံဂှ် မပ္တံကဵုကၠေၚ်စက်တံ၊ ဗၞိက်စစၞသုၚ်သ္ဇိုၚ်တံ သီုဖအိုတ်ဂှ် တၚ်နွံပၟိက်ဗၞိက်ပၠုပ်နွံဒၟံၚ်ရ။ သွက်ဂွံဗၠအ်ပၠေတ် အကာဲအရာဏံတုဲ ကၠောန်သ္ပ သွက်ဂွံဖအောန်ဖျေံ ဗၞိက်ပၠုပ်ရ။ ပ္တိတ်တၚ်အပိုၚ်ခြာသၞောတ်ဗ္ၜတ်တံရ။ မွဲအလန်ပၠန်တှ်ေ ကၠောန်မံၚ်ဗီုတံဏံသၟးဟွံတုဲဏီပုဟ်။ မွဲအလန်ဂှ် သၟာဗၞိက်ပ္လံၚ်တံဏး ညံၚ်ၚုဟ်ဒဝ်ဠာ သွက်သၟာဗၞိက်ပၠုပ်တံ ဟွံဂွံတိုန်ဂှ် အလဵုအသဳဂှ်လေဝ် ညံၚ်သ္ဂောံဂွံဒဝ်လာဂွံနၚ်တံဂှ်တုဲ သြန်ဂွံနၚ်နူကဵုဗၞိက်ပ္လံၚ် (၆၅)တၟံကၠံဂှ် ဒးပၠုပ်ကဵုအလဵုသဳ နကဵုၚုဟ်စၟတ်လဝ်ရဂှ် စွံထောံတၚ်သၞောတ်ဗ္ၜတ်ရ။ ဣဏံဂှ် ဟွံဒှ်ကလောန်ကွေံကွေံတုဲ သၟာဗၞိက်ပလံၚ်ဗွဲမဂၠိုၚ်တံ ကၠောန်ကမၠောန်ဟွံမာန်ပုဟ်။ ကၠောန်ဟွံမာန်တှ်ေ ယှအ်ဖျေံထောံ (၅၀) (၅၀)ရ။ ဆ္ဂး မူရေၚ်တၠုၚ် ဗွဲကြဴဏံဂှ်လေဝ် ယှုက်ထုဲကွေံကွေံတုဲ သွက်ဂွံဒ္ဂေတ်ဗက်ဂှ် ဝါတ်မံၚ်တုဲ သၟာဗၞိက်တံ၊ ဗၞိက်ပလံၚ်ကီု၊ ဗၞိက်ပၠုပ်ကီု သီုဖအိုတ်ဂှ် ဒှ်မံၚ်ဒဒိုက်တုဲ အလုံမွဲယန္တယာဏံမွဲဂှ် လဇုဲလဇတုဲ ဟွံဒှ်ကလောန်ရ။ ဒှ်ဒၟံၚ်အကာဲအရာဏံရ” သာ်ဝွံ ညးသ္ဂးရ။
ကံၚ်ဇြဳပၞာန်ဂှ် သုၚ်စောဲနဲကဲစုၚ်တုဲ ရေၚ်တၠုၚ်အာ ပရေၚ်ဗွဝ်ဖျာ က္ဍၚ်တိုန်ရောၚ်ဂှ် ဟီုဂးလဝ် ပ္ဍဲပေါဲသောၚ်ကလးလိက်ပရိုၚ်ဂှ်တုဲဗက် ပ္ဍဲတ္ၚဲဂတ အဝ်ဂါတ် စၟတ်တ္ၚဲ (၂၃)ဂှ် ပါလုပ်သီု ထဝ်၊ ဒဝ်ဠာ၊ ၝာတ်တံဂှ် ၚုဟ်ဗၞိက်စၞစသုၚ်သ္ဇိုၚ်တံ ထပ်တိုန်ကၠုၚ်လွာဲဂှ်ရဂှ် သၟာဗၞိက်တံဟီုရ။
ၚုဟ်ကပေါတ်ဗၞိက်က္ဍၚ်တိုန်ကၠုၚ် ဂၠိုၚ်ကဵုဆဂှ် ဟိုတ်နူဆေၚ်စပ်မံၚ်ကဵု မူဝါဒပရေၚ်ကောပ်ကာဲကံၚ်ဇြဳပၞာန်ဗၠေတ်တ်ကီု၊ ပရေၚ်တက်တြးပ္တိတ် သြန်တၞးတၟိကီု သီုၚုဟ်မးသြန်ဍုၚ်ဗၟာစှ်ေမံၚ်တံဂှ်ရ ဆၜိုတ် ကံၚ်ဇြဳပၞာန်ပ္တိုန်ဒုဟ် တၠကမၠောန်ပရေၚ်ပိုန်ဒြပ်တအ်ဓဝ်ဂှ် ၚုဟ်ကပေါတ်ဗၞိက် စှ်ေကၠုၚ်ဟွံသေၚ်ပုဟ်ဂှ် တၠကမၠောန်တံ ပါ်ပါဲလဝ်ရ။
ဟိုတ်နူၚုဟ်ကပေါတ်ဗၞိက်က္ဍၚ်တိုန်ဂၠိုၚ်ကဵုဆတုဲ ညးဍုၚ်ကွာန်ကဆံၚ်သ္ဇိုၚ်တံဂှ် အကြာပြဿနာ သြန်လုပ်သြန်တိတ် ဟွံညဳသၟဟ်ဂှ် ဒးဒုၚ်စသိုၚ်မံၚ် ပ္ဍဲပေါဲဗ္တိုက်ဗုၚ်ဂၞဴမွဲက္ဍ ဇၞော်ကဵုဇြဟတ်တုဲ စှ်ေမံၚ်ကိုန် ဒးဂဗဆဵုကဵုဘဲဒဏ်ကၞောဝ်ကၠောဝ်ဗျဵုရ။
ပရိုၚ် -သြၚ်လောန်တိုၚ်မ်
ဗီု -MOI
sanlontai