ပ္ဍဲပေါဲဗတိုက်ညံၚ်လေဝ်ပေန် သ္ၚိဒၟံၚ် ၁၀၀ ပြၚ် ဒးဒုၚ်စံၚ်ပလီုလဝ်

ညံၚ်လေဝ်ပေန်၊ အဝ်ဂါတ်(၂၅)

ပ္ဍဲခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဒပ်မဟာ (၃)ဂှ် ပ္ဍဲပေါဲဗတိုက်တုဲကၠုၚ် ပွိုၚ် (၃)သတ္တာဟတေံဂှ် ဒပ်ကံၚ်ဇြဳပၞာန် စံၚ်ပလီုလဝ် သ္ၚိဒၟံၚ်ညးဍုၚ်ကွာန် အပံၚ်လၟိဟ် (၁၀၀)မပြၚ်ရဂှ် ဗဟဵု KNU လလောၚ်တြးလဝ်ပရိုၚ်ရ။

ပ္ဍဲခရိုၚ်ညံၚ်လေဝ်ပေန် ပွိုၚ်ဍုၚ်ကျောက်ဂျဳကေုာံ ပွိုၚ်ဍုၚ်မုမ်တအ်ဂှ် သ္ပတံနူ ဂိတုဂျူလာၚ် တတိယသတ္တာဟတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်သ္ကာတ်မြဟ်လဝ်ရ။

ပ္ဍဲပေါဲဗတိုက်က္တဵုဒှ်လဝ် ပ္ဍဲဂိတုဂျူလာၚ် စၟတ်တ္ၚဲ (၁၈)တုဲကၠုၚ်တေံဂှ် ဒပ်ကံၚ်ဇြဳပၞာန် စံၚ်ပလီုပလာ်လဝ် သ္ၚိဒၟံၚ် ကွာန်နောက်ကုမ် ပွိုၚ်ဍုၚ်မုမ် KNU (၂၇)မ၊ ဟၚ်သြောံ ၁၆ မ၊ တာဲ (၁၁) မ ကေုာံ အရာတၞဟ်ဟ်တအ် နွံဏီရဂှ် KNU ဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် စၟတ်တ္ၚဲ (၁၉)ဂှ်လေဝ် ပ္ဍဲကဵုပေါဲဗတိုက် က္တဵုဒှ်လဝ် ဗ္ဒာဲကွာန်နာန်ဇြ ပွိုၚ်ဍုၚ်ကျောက်ဂျဳ KNU ဂှ်လေဝ် ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်နာန်ဇြတုဲ စံၚ်ပလီုဏာလဝ် သ္ၚိဒၟံၚ်ဗ္ဒာဲ (၂၀)မရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ဒပ်ကံၚ်ဇြဳပၞာန် ဖျေံလဝ်ဗဒိုပ် မံၚ်ဒၟံၚ် ပ္ဍဲကွာန်နာန်ဇြ ဆက်ဒှ်ဒၟံၚ်ပေါဲဗတိုက်ဂှ် ပ္ဍဲဂိတုအဝ်ဂေတ် သတ္တာဟပထမဂှ် ဟိုတ်နူစံၚ်ပလီုလဝ် သ္ၚိသှ်ေဒၟံၚ်ပ္ဍဲကွာန်ဂှ်တုဲ ပၞောဝ်ကဵုလၟိဟ်သ္ၚိ အပံၚ် (၁၂၆)မဂှ် ၜိုတ် (၆၈) မ ဒးတူပၟတ်လီုလာ်အာလဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲခရိုၚ်ညံၚ်လေဝ်ပေန် KNU ဂှ် ပ္တဝ်လဝ်ကဵုကောန်အရာပ် ညးဍုၚ်ကွာန်တုဲ ဟိုတ်နူဒပ်ကံၚ်ဇြဳပၞာန် ပန်ပှော်ပြိုက်ဂစိုတ်ဒၟံၚ်ဂှ်ရ ညးဒေသ ၈၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်တုဲ ကောန်အရာပ် ဒးဒုၚ်ရပ်လဝ်တအ်ဂှ်လေဝ် ဒပ်ကံၚ်ဇြဳပၞာန် ဖျေံထံၚ်ကၠောန် သ္ပဒၟံၚ်ရဂှ် ဟီုသ္ဂးလဝ်ရ။

အတိုၚ်တၚ်လလောၚ်တြး ကဝ်မတဳရီုဗၚ်ဟံၚ်ပြာ်ကာတၟေၚ်ကရေၚ် (ပွိုၚ်ဍုၚ်ကျောက်ဂျဳ) လလောၚ်တြးလဝ်မ္ဂး ပ္ဍဲပွိုၚ်ဍုၚ်ကျောက်ဂျဳ KNU ဂှ် နူကဵုဂိတုမေ သၞာံဏံ စဵုကဵုဂိတုအဝ်ဂေတ် စၟတ်တ္ၚဲ (၁၅)ဂှ် ဟိုတ်နူဒပ်ကံၚ်ဇြဳပၞာန် ဗတိုက်ပန်ကဵုလွဟ်ဇၞော်၊ ဒရုမ်၊ က္ၜၚ်ကျာတအ်တုဲ ကောန်အရာပ်ညးဍုၚ်ကွာန် (၆)တၠ ဒးချိုတ်လဝ်တုဲ ဒးလဝ်ဘဲဝပ်သ္ကာတ်မြဟ် (၁၃) တၠကီု ရပ်ဒက်ဖျေံလဝ်ထံၚ် ညးဍုၚ်ကွာန် (၁၈)တၠတုဲ ဒးဒုၚ်ပြိုက်ဂစိုတ်လဝ် (၅)တၠရဂှ် လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU