သၞေဟ်ကၚ်စၟဳစၟတ်ၜဳကလေၚ် ဒးဒုၚ်ဗတိုက်လဝ်တုဲ ပါလုပ်သီုကောန်ဒပ်ဗၠာဲသၟိၚ် (၂) တၠ ဒးလဝ်ဘဲဝပ် ၃ တၠ

ၜဳကလေၚ်၊ အဝ်ဂါတ် (၂၅)

တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ကွာန်ဒေါက်ယာတ်၊ သၞေဟ်ကၚ်စၟဳစၟတ်ကံၚ်ဇြဳပၞာန် နွံဗ္ဒာဲတိုဝ်ဂုက်တြေံ ယှိုဲတာန်လွေန် ဂၠံၚ်ကွဳစက် လဂုၚ် – မတ်မလီုဂှ် ဟိုတ်နူဒးဒုၚ်ဗတိုက်လဝ်တုဲ ပါလုပ်သီုကောန်ဒပ်ဗၠာဲသၟိၚ် (၂)တၠ ဒးလဝ်ဘဲဝပ် (၃)တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သၞေဟ်ကၚ်စၟဳစၟတ်ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၄)အခိၚ်နူဂယး ၜိုတ် (၇)နာဍဳကဝက်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ကေုာံ ဒပ်စဵုဒၞာညးဍုၚ်ကွာန် PDF တအ် ထောံဖျေံလဝ်ဗုမ် နကဵုဒရုမ် (၃) မတုဲ ဗတိုက်ပန်လဝ်ရ။

မဗုမ်ဒပ်ပံၚ်ကောံတအ် ပန်ပှော်ဏာလဝ်မွဲမဂှ် ဒတုံစှ်ေပါ်ခတိုဟ်လဝ် ပ္ဍဲသၞေဟ်ကၚ်စၟဳစၟတ်ကံၚ်ဇြဳပၞာန်ရ။

ဟိုတ်နူဗုမ်ဒရုန် ဒတုံစှ်ေပါ်ခတိုဟ်လဝ်တုဲ ကောန်ဒပ်ပဗၠာဲသၟိၚ် ဃောလ္ၚတ်ဂၠိုက်ဂၠာဲဒၟံၚ် ကဆံၚ်ဌာနန္တရ (၂)တၠ ကေုာံ ကောန်အရာပ် ညးတြုံမွဲတၠ ဒးလဝ်ဘဲဝပ်တုဲ ပလံၚ်ဗစိုပ်ဏာလဝ် ရုၚ်ဂဥုဲၜဳကလေၚ်ရဂှ် ဂွံတီကေတ်လဝ်ရ။

ကြဴနူဒးဒုၚ်ဗတိုက်လဝ်ကဵုဒရုမ်တုဲဂှ် နူလ္ပာ်ကံၚ်ဇြဳပၞာန် ပန်ပှော်လဝ်ကဵု လွဟ်ဇၞော် လွဟ်ဍောတ် ပ္ဍဲလ္ပာ်ဂၠံၚ်ဒရုမ်ကၠုၚ်ဂှ်ရ။

ပ္ဍဲကဵုပရေၚ်ဒဒှ်သၞေဟ်ကၚ်ကံၚ်ဇြဳပၞာန် ဒးဒုၚ်ဗတိုက်လဝ်ဏံ ကွဳစက်အာတရဴ ဂၠိုၚ်ကဵုကၠံ ကၟာတ်ဒၞာဆိုအ်ဗဒၟံၚ် ပ္ဍဲဂၠံၚ်ကွဳစက် မတ်မလီု – လဂုၚ် က္တဵုဒှ်လဝ်တုဲ အခိၚ်နူဂယး ၜိုတ် (၁၀)နာဍဳဂှ် က္လေၚ်အာကၠုၚ်ဂွံ အတိုၚ်ပကတိတြေံပၠန်ရဂှ် ညးအာတရဴတအ် ဟီုရ။

ပ္ဍဲလ္တူပရေၚ်ဒဒှ် ဗတိုက်ပန်လဝ်သၞေဟ်ကၚ်စၟဳစၟတ်ၜဳကလေၚ်ဂှ် ဗော်သွးကောန်ဂကူကရေၚ် KNU ကေုာံ ဒပ်ပံၚ်ကောံ ဂကောံဇြဟတ်ပၠန်ဂတးတအ်ဂှ် စဵုကဵုအခိၚ်လၟုဟ်ဏံ လလောၚ်တြးပ္တိတ်လဝ် မမိက်ကဵုမွဲမွဲဟၟဲဏီရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ