ကောန်ဒပ် BGF နူဒပ်ရး စၟတ် (၂) မွဲတၠ လုပ်ကၠုၚ်ဖျေံလွဟ် သီုလွဟ်လက်နက်

ကအ်ကြိက် – အဝ်ဂါတ်(၂၅)

ဇရေၚ်ကရောၚ်ပၞာန်ကဝ်ဗရာ – P29907 ဒပ်ပၞာန်စဵုဒၞာညးဍုၚ်ကွာန် မၞုံဒေသပၞာန်လ္ပာ် စၟတ် (၃)၊ ဒေသပၞာန်သ္ကုတ်သၠုၚ်ကျာဂှ် ကောန်ဒပ်ဒပ်ပၞာန်မၚ်ပယျဵု (BGF) နူဒပ်ရးစၟတ် (၂)မွဲတၠ ကၠုၚ်စိုပ်ပံၚ်တောဲလဝ် သီုလွဟ်လက်နက်ရဂှ် NUG လလောၚ်တြးလဝ်ရ။

ပ္ဍဲဂိတုအဝ်ဂါတ် စၟတ်တ္ၚဲ (၁၇) တုဲကၠုၚ်တေံ လုပ်ကၠုၚ်ဖျေံလဝ်လွဟ်ဒှ်တုဲ နူလ္ပာ်ဒပ်စဵုဒၞာညးဍုၚ်ကွာန်တအ်ဂှ် ပ္တိုန်လဝ်ဂုဏ်စရာဲ အပ်ပြာပ်ကဵုလဝ် သြန် (၄၀)ကိုတ်ရဂှ် ဓမံက်ထ္ၜးလဝ်ရ။

ကောန်ဒပ်နွံယၟု အောၚ်ကိုဝ်ဥူဂှ် ဒှ်နူတံဒပ်ပရေၚ်ထံက်ပၚ် စၟတ် – (၉၃၀)၊ ပွိုၚ်ဍုၚ်တံၚ်ဥူ သၟဝ်တဲကကပတုဲ မွဲကရောံညးဂှ် ကေတ်နၚ်လဝ် လွဟ် M16-A1 (၁)ဒကိုအ်၊ ဖျေဲမကမ် M16-A1 (၅)ဖျေဲ ကေုာံ မကမ် ၅.၅၆ (၁၅၀)မရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ညးမိက်ဂွံပြံၚ်ကၠောံကၠုၚ် လ္ပာ်ညးဍုၚ်ကွာန်တအ်ကဵုဒှ် ကောန်ဒပ်ပၞာန် ညးမိက်ဂွံဒတူလာၚ် နဒဒှ်ညးကဵုပရိုၚ်ပ္ဍဲဒပ် (သတ်ပညောန်) တအ်ဂှ် ဆက်စၠောံကဵု တံဒပ်/ကရောၚ်ပၞာန် ဒပ်ပၞာန်စဵုဒၞာညးဍုၚ်ကွာန် (PDF) ကေုာံ ဂကောံစဵုဒၞာညးဍုၚ်ကွာန် (ပ.က.ဖ)တအ်မာန်တုဲ ပရေၚ်လုပ်ဇူဗ္ဒာဲ ဇရေၚ်ဂၠံသြိုဟ်ညးဍုၚ်ကွာန် ပ္ဍဲ Telegram Channel @MyanmarPeople ဂှ်လေဝ် ဆက်စၠောံမာန်ဒၟံၚ်ရဂှ် ကဵုလဝ်သမ္တီရ။

နကဵုဌာနဝန်ဇၞော်ပရေၚ်စဵုဒၞာ၊ အလဵုအသဳပရေၚ်ညဳသၟဟ်ကောန်ဂကူဂှ် ဒုၚ်ဒၟံၚ်တဲ မၚ်ဒုၚ်ဒၟံၚ်တၠုၚ် ညးလုပ်ကၠုၚ်ပံၚ်တောဲ ဒတူလာၚ်လ္ပာ်ညးဍုၚ်ကွာန်တအ်ရောၚ်ဂှ်လေဝ် လလောၚ်တြးလဝ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ သ္ကုတ်လကြဴဏံ ဗၠာဲသၟိၚ်ကေုာံ ကောန်ဒပ်ပၞာန် (၂)လက်ပြၚ် ပံၚ်တောဲကၠုၚ်လဝ်ကဵု ညးဍုၚ်ကွာန်တအ်တုဲ က္လေၚ်ဗတိုက်ပန်ဒၟံၚ်ကဵု ဒပ်ကံၚ်ဇြဳပၞာန်ရဂှ် ဂွံတီကေတ် အတိုၚ်တၚ်လလောၚ်တြး NUG ရ။

ပရိုၚ် – သြၚ်လောန်တိုၚ်(မ်)

ဗီုရုပ် – MOD