ရေဝ်၊ အဝ်ဂါတ် (၂၅)
တွဵုရးဍုၚ်မန်၊ ပွိုၚ်ဍုၚ်ရေဝ်၊ ကွာန်ကၠအ်လိမဴ(လိမ္မော်ခြံ)၊ ပ္ဍဲသ္ကုတ်ဂၠံၚ် ဇြပ်ဗု-ရေဝ်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၄)၊ အခိၚ်နူဂယး ၜိုတ် (၆)နာဍဳဂှ် ဟိုတ်နူကွဳစက်ညးအာတရဴမွဲဖ္ဍိုက် ဒးဒုၚ်ပန်ပှော်တုဲ ညးအာတရဴ ၜါတၠ ကလိဂွံလဝ်ဘဲဝပ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်(မ်)ရ။
ယာဉ်ဖ္ဍိုက်ညးအာတရဴ ယှိုဲပဠေဝ်တဳ ညးအာတရဴ (၃၃)တၠပါဗက်ကၠုၚ် နူလ္ဂုၚ် အာဍုၚ်ဗိက်ဂှ် ဒးဒုၚ်ပန်ပှော်လဝ်ကဵု လွဟ်သေနာတ် ဗ္ဒာဲကွာန်ကၠအ်လိမဴ (လိမ္မော်ခြံ)ဂှ်ရ။
ဟိုတ်နူဒးဒုၚ်ပန်ပှော်လဝ်ကဵု လွဟ်သေနာတ်ဂှ်ရ ဒ္ၚောဝ်ပါၚ်တြၚ်ကွဳစက်ဂှ် ဒးလွဟ်မကမ်တုဲ ကဝေက်ဒ္ၚောဝ် ထ္ကးတိတ်အာဂှ်ရ မဝါဝါဝေန် အာယုက် (၂၆)သၞာံ ကေုာံ ကိုဝ်တေန်ထိုဲ အာယုက် (၃၄)သၞာံ ပါဗက်ကၠုၚ် ပ္ဍဲကွဳစက်တံညးၜါတၠ ကလိဂွံလဝ်ဘဲဝပ် ဒးကဝေက်ဒ္ၚောဝ် ပ္ဍဲသၟန်ပါၚ်ကဵု တဲရ။
ညးအာတရဴ က္လိဂွံလဝ်ဘဲဝပ် ဒးလဝ်ကဝေက်ဒ္ၚောဝ်ၜါတၠတံဂှ် ဟွံဒးဒှ်ဓဝိၚ်တုဲ ကြဴနူကၠောန်သ္ပ ပရေၚ်လွဳလွတ်ကာမံက်တိုန်တုဲဂှ် ဆက်တိတ်အာတရဴ ဍုၚ်ဗိက်ရဂှ် ဂွံတီကေတ်ရ။
ပ္ဍဲပွဳူဗ္ဒာဲကွာန်ကၠအ်လိမဴ(လိမ္မော်ခြံ) ဒၞါဲကွဳစက်ညးအာတရဴ ဒးဒုၚ်ပန်ပှော်လဝ်ဂှ် မ္ၚးနူဒပ်ကံၚ်ဇြဳပၞာန်တုဲ ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပံၚ်ကောံ PDF တံလေဝ် ပရေၚ်ချဳဒရာၚ်ဒၟံၚ်ပရေၚ်ပၞာန် နွံရ။
တုဲကၠုၚ်ဂိတုဂျောန်၊ စၟတ်တ္ၚဲ (၂၈)တေံဂှ်လေဝ် ပွိုၚ်ဍုၚ်ရေဝ်၊ ပါၚ်ဂၠံၚ်လုပ်ကွာန်ကလအ်ဇၞော်၊ ပ္ဍဲသ္ကုတ်ဂၠံၚ် ဇြပ်ဗု-ရေဝ်ဂှ် အခိၚ် ဂကောံဒပ်ရပ်လွဟ်ကောန်ဍုၚ်အရၚ်မွဲဂကောံ ပန်ပှော်ကွဳစက်ပၞာန်ဂှ် ဒးအာလဝ် ကွဳစက်သ္ၚိအာတရဴဴမွဲဖ္ဍိုက်တုဲ ကလိဂွံလဝ်ဘဲဝပ် (၃)တၠဏီရ။
ပရိုၚ် – သြၚ်လောန်တိုၚ်မ်
ဗီု – SBM
sanlontai