မတ်မလီု၊ အဝ်ဂါတ်(၂၅)
ညးလိၚ်ဒဳကွဳစက် အပ္ဍဲတွဵုရးဍုၚ်မန်တံဂှ် မွဲကရောံကဵု ၚုဟ်ကၠေၚ်စက် က္ဍၚ်တိုန်ကၠုၚ်ဂၠိုၚ်ကဵုဆဂှ် ဟိုတ်နူညးအာတရဴတံ အောန်စှ်ေကၠုၚ်တီတီဒှ်ဒှ်ဂှ်ရ သွက်ဂွံဒတူလိုၚ်ဂှ် သာတုဲ ခက်ခုဲကၠုၚ်ရဂှ် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ညးလိၚ်ဒဳကွဳစက်တံဂှ် ပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ဟိုတ်နူၚုဟ်ကၠေၚ်စက် က္ဍၚ်တိုန်ကၠုၚ် ဗ္ဒါဲ (၄)ဆကီု၊ ညးအာတရဴဗီုအခိၚ်ကၠာတေံ အောန်စှ်ေကၠုၚ် စဵုကဵုဟွံမွဲဂှ်ရ သွက်ဂွံဆက်ဒတူလိုၚ်ဂှ် ဒးဂဗမံၚ်တၚ်အခက်ခုဲရ။
ၚုဟ်ကၠေၚ်စက် ဒးသုၚ်စောဲမံၚ် ပ္ဍဲကမၠောန်ဒဳကွဳစက်အဓိကဂှ် ကၠေၚ်ဓါတ် ၉၅ မွဲလဳတာဂှ် ၂၄၅၀ ဒ္ကေဝ်ပြၚ်၊ ကၠေၚ်ဓါတ် ၉၂ ဂှ်လေဝ် ၂၃၀၀ ဒ္ကေဝ်ပြၚ် ဆက်နွံဒၟံၚ် ပ္ဍဲၚုဟ်သၠုၚ်ၚ်ဂှ်ရ။
ၜိုန်ရၚုဟ်ကၠေၚ်စက် က္ဍၚ်ဒၟံၚ်ကီုလေဝ် ဟိုတ်နူကံက်ဗပဵုပ္တိုန် ၚုဟ်လိၚ် နူညးအာတရဴတံ ဟွံဂွံဂှ်ရ သွက်ဂွံဆက်ဒတူလိုၚ်အာ ခက်ခုဲကၠုၚ်ရဂှ် ညးလိၚ်ဒဳကွဳစက်မွဲတၠဂှ် ဟီုရ။
“သာတုဲကြေပ်ဂြတ်ကၠုၚ်ရ။ ပကတိ ဒဳမံၚ် (၂၀၀၀၀)ဂှ်တှ်ေ စုတ်ကၠေၚ် ၜိုတ် (၁၀၀၀၀)တှ်ေ ၜိုတ်(၁၀၀၀၀)ဂှ် သှ်ေရ။ လၟုဟ်ဂှ် (၁၀၀၀၀) ဟွံဂွံဒဳပုဟ်၊ မွဲတ္ၚဲမှ (၈၀၀၀) (၁၀၀၀၀)တှ်ေ ၚုဟ်ကၠေၚ်ဂှ်တိုန်တုဲ ကဵုဒးကလေၚ်စုတ်မံၚ်ကၠေၚ်ဏီဂှ်တှ်ေ သွက်သ္ၚိ၊ သွက်ဂွံစ၊ သွက်ကောန်ၚာ်ဂှ် သှ်ေစဴပ္ဍဲတဲ ၜိုတ် ၃၀၀၀၊ ၄၀၀၀ ရတှ်ေ သာတုဲ ဒတူလိုၚ်ဝါတ်ကၠုၚ်ရ။ ဆ္ဂး ညးအာတရဴတံဂှ်တှ်ေ လၟေၚ်တရဴ (၁၀၀၀)ဏံဂှ် ဂၠိုၚ်အိုတ်ရ။ လၟေၚ်တရဴမွဲမ္ဂး ပ္တိုန်ဂွံဂၠိုၚ်အိုတ်တှ်ေ (၅၀၀)ရ၊ တရဴ တာန် (၁၀၀၀)ဂှ် ၚုဟ်ကၠေၚ်တိုန်တုဲ ကေတ်(၁၅၀၀)ရ။ ၜိုတ် (၃၀၀၀)လေဝ် ညးမွဲဟွံဍိုက်ရပုဟ်၊ တၞဟ်ခြာအာ တၟာဂလိုၚ်ရ။ ၚုဟ်ကၠေၚ်တိုန်တှ်ေ သာတုဲ ကြေပ်ဂြတ်ရ၊ ဒၞါဲဒးစသွစာၚ်ကၠာတေံဂှ် ခၟာဲကဒါဂှ် ဒှ်မံၚ်ဆၜိုတ်မာန်ရဂှ်” သ္ဂးရ။
ညးလိၚ်ဒဳကွဳစက် ဒးဆေၚ်မံၚ်မုက် ကုပရေၚ် ညးအာတရဴဍိုက်ကွဳစက်အောန်တံဂှ် ဟိုတ်နူၚုဟ်ကၠေၚ်ဇၞော်သၠုၚ်ဂှ်တုဲ စဵုကဵုဓရိပ်မွဲလတုန်တုဲဂှ် သွက်ဂွံကလေၚ်စုတ်ကၠေၚ်ပၠန်ဂှ် အခက်အခုဲနွံကၠုၚ်ရဂှ် ညးဆက်ဟီုရ။
ညးလိၚ်ဒဳကွဳစက်မွဲတၠပၠန်ဂှ်လေဝ် ဟိုတ်နူၚုဟ်ကၠေၚ်စက်သၠုၚ်တိုန်မံၚ်ဂှ်ရ ပ္ညဳကုညးအာတရဴတံတုဲ ဒးအာကၠုၚ်မံၚ်တုဲ ၚုဟ်ကၠေၚ်စက်ထပ်သၠုၚ်တိုန်ကၠုၚ်ပၠန်မ္ဂး ဒးဒေါံဇူကမၠောန်ရဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပြဟ်ဟ်ဏံဂှ်တှ်ေ ၚုဟ်ကၠေၚ်ဂှ်လေဝ် တိုန်၊ ညးအာတရဴတံလေဝ် ဍိုက်ဟွံမာန်ရလေဝ်။ ပိုဲဂှ်လေဝ် ညံၚ်ၚုဟ်သ္ဂောံပြေပြံၚ်ဂှ် ပ္ညဳတုဲ အာရ။ လ္ၚဵုဂှ် ဟွံအာတှ်ေ လၟုဟ်ဏံဂှ် ဒဳသိၚ်အာရ။ ကဵုၚုဟ်ကၠေၚ်ဂှ်တှ်ေ ဒးဒဳဂၠိုၚ်နူကဵု အရိုဟ်တွဵုတေံဏီရ။ ဟွံဒဳလေဝ် ဟွံဂွံပုဟ်လေဝ်။ ညးဍိုက်ဂှ် အောန်အာယျ။ တရဴညိညိရတှ်ေ ဟွံဍိုက်ရပုဟ်။ ကၠေၚ်ဂှ် ၚုဟ်တိုန်မံၚ် မွဲတ္ၚဲမွဲအလန်။ ဇကုဂှ် ဟွံကၠောန်ညအ်တှ်ေ သွက်ဂွံကၠောန်ကမၠောန်ဂှ် အခက်ခုဲ နွံမံၚ်ညိညိရ။ ဒှ်အာကဆံၚ် ဒးဒေါံဇူရ၊ ၚုဟ်ကၠေၚ်က္ဍၚ်တိုန်အာကွေံကွေံတှ်ေလေဝ် သွက်ပရေၚ်မံၚ်စံၚ်စသုၚ်ဂှ် ဒှ်ကၠုၚ်အခက်အခုဲရဂှ်” သ္ဂးရ။
ပြဟ်ဟ်ဏံ ညးလိၚ်ဒဳကွဳစက်လ္ၚဵုတံဂှ် ဟိုတ်နူၚုဟ်ကၠေၚ်စက်သၠုၚ်တိုန်မံၚ်ဂှ်ရ သြန်လုပ်ကဵု သြန်တိတ် ဟွံညဳသၟဟ်ဂှ်ရ ဒေါံဇူကၠုၚ် ကမၠောန်နွံကၠုၚ်တုဲ လ္ၚဵုဂှ်လေဝ် ပြံၚ်သၠာဲကၠောန်ကၠုၚ်ကမၠောန် နွံကၠုၚ်ဒၟံၚ်ရဂှ် ဂွံတီကေတ်ရ။
မွဲလ္ပာ်ပၠန်ဂှ်တှ်ေ ကံၚ်ဇြဳပၞာန်တံ မဳနဳအိုဝဵု ယာဉ်သၠာပိလိၚ်စတံဂှ် နူကဵုလာၚ်ဇြေန်ဗ္စံက်ဂှ် သ္ကဵုပြံၚ်လာၚ်ဇြေန်ဗ္ကေတ် သုၚ်စောဲ ပ္ဍဲကမၠောန်တံ ဗွဲအဓမ္မတုဲ ဟွံပြံၚ်သၠာဲမ္ဂး စၟဳတ်ရပ်ဒက် ပ္ဍဲဂၠံၚ်တုဲ ပွတပ်ဒဏ်သြန်တံ နွံမံၚ်ရဂှ် ညးလိၚ်ဒဳကွဳစက်တံ သ္ဂးအိုတ်ရ။
သွက်ဂွံပြံၚ်သၠာဲ လာၚ်ဇြေန်ဗ္ကေတ် သုၚ်စောဲပ္ဍဲကမၠောန်ဂှ် အောန်အိုတ် နူ (၃)ကိုဋ်ဒ္ကေဝ် စဵုကဵုဗွိုၚ် (၄)ကိုဋ်ဒ္ကေဝ် အိုတ်မံၚ်တုဲ ဟိုတ်နူအကြေပ်ဂြတ် ပရေၚ်စသုၚ်မံၚ်စံၚ်ကဵု ကၠေၚ်စက်တံဂှ်တုဲလေဝ် ညးလိၚ်ဒဳကွဳစက်တံ သာတုဲ ခက်ခုဲကၠုၚ်ရဂှ် ဂွံတီကေတ်ရ။
ညးလိၚ်ဒဳကွဳစက်တံဂှ် ပ္ဍဲကာလသီအဝဵုဏံ ဒးဆေၚ်မံၚ်မုက် ပြဿနာသၞောဝ်ဥပဒေအုပ်ဓလီုဟွံမွဲတံကဵု ပြဿနာဟွံဂီုကၠီုတံတုဲ ဒးဒုၚ်ပၠံၚ်ၜးမံၚ်ကပေါတ်တံ၊ ဒးဒုၚ်ၜုၚ်တက်ပျဲပျာဒၟံၚ် မွဲခနမွဲခနရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai