ကျာ်ထဝ်၊ အဝ်ဂါတ် (၂၅)
တွဵုရးဍုၚ်မန်၊ ပ္ဍဲပွိုၚ်ဍုၚ်ကျာ်ထဝ်ဂှ် ပန်ပှော်ပသောၚ်လဝ် ဗိုလ်ဝေန်သဵု နူကဵုဒပ်မံၚ်ပယျဵု BGF သၟဝ်တဲကံၚ်ဇြဳပၞာန် ဒယှ်မံၚ်နကဵုယၟုပရေံပရေံဂှ် ပ္ဍဲဂိတုအဝ်ဂါတ်၊ စၟတ်တ္ၚဲ (၂၄) အခိၚ်နူဂယး ၜိုတ်(၇)နာဍဳဂှ်ရဂှ် ဂကောံဇြဟတ်ပၠန်ဂတးကျာ်ထဝ် KRF ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကွဳစက်မာတ်တူအရံၚ်ဗု ဗိုလ်ဝေန်သဵု စဴကၠုၚ်နူရာန်ဖျာ နူဍုၚ်ကျာ်ထဝ်ဂှ် ဂကောံဇြဟတ်ပၠန်ဂတးကျာ်ထဝ် ကေုာံ ဒပ်ပံၚ်ကောံပကဖ ဝဝ်တံ ဗ္တိုက်ပန်ပှော်လဝ် အကြာကွာန်ကအ်ထေန်ကဵု ကွာန်ဘိုဝ်ယျာကျဳ ဗ္ဒါဲဒဒန်တာဗံၚ်(တာဘောၚ်)ဂှ်ရ။
ဟိုတ်နူဒးဒုၚ်ဗ္တိုက်တုဲ ဗိုလ်ဝေန်သဵု ကေုာံ ညးမဒှ်သမ္ဘာတံ ညးၜါတၠဂှ် ချိုတ်အာလဝ် ပ္ဍဲဒၞါဲဒှ်ပရေၚ်ပရောဂှ်တုဲ ကွဳစက်ဂှ် ဇီုကပိုက် ဒးလီုလာ်အာလဝ်ရ။
ဗိုလ်ဝေန်သဵု BGF ဂှ် ကြဴနူဒပ်ပၞာန်သီအဝဵုတုဲ ပံၚ်တောဲကုကံၚ်ဇြဳပၞာန်တံတုဲ ဟိုတ်နူဍဵုဍိုက်သ္ပမာန်မံၚ်ညးဍုၚ်ကွာန်တံဂှ်ရ ကေတ်အခိၚ်တုဲ ပသောၚ်ထောံလဝ်ရဂှ် ညးတာလျိုၚ်လလောၚ်ပရိုၚ် ဂကောံဇြဟတ်ပၠန်ဂတးကျာ်ထဝ် KRFဂှ် ဟီုရ။
အတိုၚ်တၚ်လလောၚ်တြး KRF ဂှ်မ္ဂး ဗိုလ်ဝေန်သဵု BGF ဂှ် သ္ကိုပ်သ္ကတုဲ ကၠောန်ဝိုၚ်ဝေၚ်လံၚ်ၛၚ် အပ္ဍဲဍုၚ်ကျာ်ထဝ်ကီု၊ ကဵုပရိုၚ်ကုဒပ်ကံၚ်ဇြဳပၞာန် ကေုာံဗၠာဲသၟိၚ်ကီု၊ ကၠောန်ကမၠောန်သွံရာန်ကွဳစက်ကာဟွံလုပ်သၞောဝ်ကီု၊ ဘပဠပတ်ၚုဟ်တုဲ ရာန်ကေတ် တိဝါဗ္ၚ မၞုံပ္ဍဲကွာန်ဂမၠိုၚ် ကၠောန်သ္ပဒၟံၚ်ရဂှ် သ္ဂးရ။
သ္အာၚ်နူဂှ်ပၠန် ရပ်ဒက်ဒၟံၚ်ညးချဳဒရာၚ်ကတိုၚ်ကၟဟ် ပရေၚ်ဍုၚ်ကွာန်၊ ပတှ်ေဇြဟတ်လွဟ်တုဲ ဘပဠမံၚ်ညးဍုၚ်ကွာန်၊ ပန်ဂစိုတ်လဝ် သၟတ်ညးဒေသမွဲတၠတုဲ ဒှ်ညးက္လိလောန်လဝ် ပရေၚ်ပကီုပရာပ်ရပ်ဒက် မွဲတၠရဂှ် ပါလုပ် ပ္ဍဲတၚ်လလောၚ်တြး KRF ရ။
ဗိုလ်ဝေန်သဵု ကေုာံ ညးမဒှ်သမ္ဘာညး ချိုတ်အာတံဂှ် ကြဴနူဒပ်ကံၚ်ဇြဳပၞာန်တံကဵု ဂကောံဒပ်ဗၠာဲသၟိၚ်တံ ကၠုၚ်စိုပ်ကၠောန်သ္ပ ပရေၚ်စၟဳတ်တုဲ ဇွတံဂှ် ပလံၚ်ဗစိုပ်ဏာလဝ် ရုၚ်ဂဥုဲညးဍုၚ်ကွာန်ကျာ်ထဝ်ရဂှ် ဂွံတီကေတ်ရ။
ပ္ဍဲဂိတုဂျောန် စၟတ်တ္ၚဲ (၂၂)တုဲကၠုၚ်တေံလေဝ် ပ္ဍဲဂတမုက်ဘာလကျာ်ကွာန်ကျာ်ပိ ပွိုၚ်ဍုၚ်ကျာ်ထဝ်ဂှ် ဥူယျေဝ်နာၚ် ညးလုပ်ဂကောံ ကံၚ်ဇြဳပရေၚ်အုပ်ဓုပ် ပွိုၚ်ဍုၚ်ကျာ်ထဝ် ကံၚ်ဇြဳပၞာန်ဂှ် ဒးဒုၚ်ပန်ပှော်တုဲ ချိုတ်အာလဝ်ရ။
ပရိုၚ် – သြၚ်လောန်တိုၚ်မ်
ဗီု – KRF
sanlontai