ရပ်ဂွံလဝ် ပၞာန်ညးဍုၚ်ကွာန် စိုပ်ကၠုၚ် သွက်ဂွံယိုက်ဂၠေၚ်တာလျိုၚ် ပ္ဍဲကိုန်စဳမာန်ဗရိုတ်ဗ္ကေတ်ဥူပိုၚ် (၁၄) တၠ

သာလေန်ဂျဳ – အဝ်ဂါတ်(၂၆)

ရးဒေသသေတ်ဂါၚ်၊ ပ္ဍဲပွိုၚ်ဍုၚ်သာလေန်ဂျဳဂှ် ပၞာန်ညးဍုၚ်ကွာန် (၁၄)တၠ စိုပ်ကၠုၚ် သွက်ဂွံယိုက်ဂၠေၚ်တာလျိုၚ် ပ္ဍဲကိုန်စဳမာန်ဗရိုတ်ဗ္ကေတ်ဥူပိုၚ် ကေုာံ ကၟိန်ဍုၚ်ကြုက် ပံၚ်တောဲရေၚ်တၠုၚ်ဒၟံၚ် သၟဝ်တဲကံၚ်ဇြဳပၞာန်ဂှ် ဂကောံဒပ်ပံၚ်ကောံတအ် ရပ်ဂွံလဝ်ရဂှ် ULF (ဒပ်မဟာမိတ်ပံၚ်ကောံ) လလောၚ်တြးလဝ်ရ။

ပၞာန်ညးဍုၚ်ကွာန် စှ်ေလဝ်ဘာ ဌာန်ဂအုပ်ပၞာန်ရးပလိုတ်၊ ပွိုၚ်ဍုၚ်တာပေါၚ် ရးဨရာဝတဳ သၟဝ်တဲကံၚ်ဇြဳပၞာန် ကၠုၚ်စိုပ် သွက်ဂွံယိုက်ဂၠေၚ်တာလျိုၚ် ပ္ဍဲကိုန်စဳမာန်ဗရိုဗ္ကေတ် (၁၄)တၠတအ်ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂၄)တုဲကၠုၚ် အခိၚ်နူဂယးဂှ် သ္ဂံၚ် Alpha Column ဒပ်လ္ပာ် (၁) Alpha Special Force ကေုာံ ဒပ်လ္ပာ် (၃) Chindwin Galone Yarzar Guerrilla Defense Force လုပ်ဂကောံ ULF တအ် ရပ်ဂွံလဝ်ရ။

အခိၚ်လၟုဟ်ဏံမ္ဂး သွက်ဂွံဆက်ရေၚ်တၠုၚ် ကေတ်အာအရေဝ် ကုညးတအ် အတိုၚ်သၞောဝ်ဥပဒေမၞုံပၟိက်မာန်ဂှ် ပြံၚ်စၠောံပ္အပ်ပြာပ်ကဵုလဝ် ဇရေၚ် (ပ.လ.ဖ)ပွိုၚ်ဍုၚ်ရဂှ် ULF – ဒပ်မဟာမိတ်ပံၚ်ကောံ ကဵုလဝ်သမ္တီရ။

မၞိဟ်ဒပ်စဵုဒၞာညးဍုၚ်ကွာန်တအ် ရပ်ဂွံလဝ်ဂှ် ယဝ်စိုပ်ကုမ္ပဏဳမ္ဂး ဒးထပ်တိုန်ဘာပၠန်ရောၚ်ဂှ်လေဝ် တိတ်ဟီုလဝ် ပ္ဍဲစၟဳစၟတ်ထိၚ်ဒဝ်ရဂှ် ဂွံတီကေတ်ရ။

ကုမ္ပဏဳဗရိုတ်ဗ္ကေတ် ကၟိန်ဍုၚ်ကြုက်ကေုာံ ဥူပိုၚ်တအ်ဂှ် ပံၚ်ကဵုကံၚ်ဇြဳပၞာန်တုဲ ဟိုတ်နူသီကေတ်ဒၟံၚ် တိဗ္ၚညးဍုၚ်ကွာန်ပိုၚ် ဟွံဗဗွဲဓဝ်ဂှ်ရ ညးဍုၚ်ကွာန်တအ် ထ္ၜးဒၟံၚ်ဆန္ဒ ခြာဟွံလအ်ဟွံလအ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – ULF(ဒပ်မဟာမိတ်ပံၚ်ကောံ)