နေပျဳဒဝ်၊ အဝ်ဂါတ် (၂၇)
ပ္ဍဲသၞာံ ၂၀၂၅ ကၠုၚ်စိုပ်ဂတဏံ ညံၚ်ဂွံစိုပ်ကဆံၚ် သွံပ္တိတ်ကဵုဍုၚ်မ္ၚး ကၠေၚ်စမာန် ရန်လဝ်တုဲ ရေၚ်တၠုၚ်ဒၟံၚ်ရဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ဟီုလဝ် ပ္ဍဲကောံဓရီုကဝ်မတဳကေၚ်ကာပရေၚ်ပိုန်ဒြပ် ကၠောန်ဗဒှ်လဝ် ပ္ဍဲနေပျဳဒဝ် ပ္ဍဲကဵုဂိတုအဝ်ဂါတ် စၟတ်တ္ၚဲ (၂၅)ဂှ်ရ။
ဟိုတ်နူတၚ်နွံပၟိက်ကၠေၚ်စပ္ဍဲဍုၚ်တုဲ ဇၟာပ်ပ်သၞာံ ဒးပၠုပ်နၚ်ဒၟံၚ် နူဍုၚ်သ္အာၚ် ကာလၚုဟ်မး ဒဝ်ဠာအမေရိကာန် (၆၀၀) ပြကောဋိကိုတ်ပြၚ်တုဲ ပရေၚ်သုၚ်စောဲသြန်ဍုၚ်သ္အာၚ် ပ္ဍဲကဏ္ဍကၠေၚ်စ ဂၠိုၚ်ဂၠေပ်ဒၟံၚ်ရဂှ် က္ဍိုပ်သ္ကိုပ်ပၞာန်ဂှ် ဟီုသ္ဂးလဝ်ရ။
အရာဏံဂှ် ညံၚ်ကၠေၚ်စပ္ဍဲဍုၚ်ဂွံရုမ်ဂပ် ၜိုန်ရရေၚ်တၠုၚ်ကၠောန်ကၠုၚ်လဝ် ခေတ်အဆက်က်မာန်ကီုလေဝ် ညံၚ်ဂွံစိုပ်တရဴ ရေၚ်တၠုၚ်ကဵုမာန်ကၠုၚ်လဝ် ဟၟဲဂှ်လေဝ် ဂွံဆဵုကေတ်ရဒၟံၚ်ဂးတုဲ က္ဍိုပ်သ္ကိုပ်ပၞာန် ဟီုပ္တိုန်လဝ်ဒုဟ် က္ဍိုပ်သ္ကိုပ်ကၟိန်ဍုၚ်အခိၚ်ကၠာတေံဏီရ။
နကဵုကံၚ်ဇြဳပၞန်ဂှ် ညံၚ်ပရေၚ်ကၠောန်ပ္တိတ်ကၠေၚ် စဂွံသၠုၚ်တိုန်ကၠုၚ်မာန် ပ္တိတ်ကဵုသြန်ဂအုမ်ပရေၚ်ပိုန်ဒြပ်ကၟိန်ဍုၚ်တုဲ သၠုၚ်ပ္တိုန် ပရေၚ်ကၠောန်ပ္တိတ်ကၠေၚ်စပ္ဍဲဍုၚ်တုဲ ပ္ဍဲသၞာံ ၂၀၂၅ ဏံမ္ဂး ကၠေၚ်စပ္ဍဲဍုၚ် ရုမ်ဂပ်သၟးဟွံက ညံၚ်ဂွံပလံၚ်ပ္တိတ်ဍုၚ်သ္အာၚ်မာန်ဂှ်လေဝ် ရေၚ်တၠုၚ်ဒၟံၚ်ရဂှ် ဟီုကြီုလဝ်ရ။
တၠကမၠောန်မွဲတၠဂှ်မ္ဂး ကၠေၚ်စပ္ဍဲဍုၚ်တအ်ဂှ် ဟိုတ်နူၚုဟ်က္ဍၚ်ဒၟံၚ် လ္တူနူကၠေၚ်ပၠုပ်နၚ်နူဍုၚ်သ္အာၚ်ဂှ်ရ ပရေၚ်က္ဍိုပ်သ္ကိုပ်ပၞာန်ဟီုလဝ်ဂှ် ဒှ်နတဲဟွံမာန်တုဲ လ္တူနူဂွံပလံၚ်ပ္တိတ်ဍုၚ်သ္အာၚ်ဂှ် ပ္ဍဲဍုၚ်ညံၚ်ဂွံရုမ်ဂပ် ထေက်ကဵုဒးကၠောန်ရေၚ်တၠုၚ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် သွက်ကၠေၚ်စသုၚ်ဂွံရုမ်ဂပ်ဂှ် ကၠောန်ရေၚ်တၠုၚ်သၞောတ်စှ်ေစှ်ေ အာဍာ်ဇမၠိၚ်မာန်ဟေၚ် ၜိုန်ရသ္ဂောံက္လိဂွံကၠေၚ်စရုမ်ဂပ်မာန်ကီုလေဝ် သ္ပတံနူဗၞိက်အပြောံ သတ်ဒကောၚ် ကၠေၚ်စတိတ်မာန်တအ်ဒှ်တံ ဟိုတ်နူတဵုလွဳ ဍိုက်က်ပေၚ်ၚ်ဟွံမာန်ဏီတုဲ ဒှ်ဟွံမာန်ဏီရဂှ် ညးဆက်ဟီုလဝ်ရ။
ကၠေၚ်စသတ်ဗြဴဂှ် ၜိုန်ရကံၚ်ဇြဳပၞာန် စၟတ်ပိုၚ်ခြာ ၚုဟ်ရန်လဝ် မွဲပသာမ္ဂး ၄၃၀၀ ဒ္ကေဝ်ကီုလေဝ် ပ္ဍဲဗွဝ်ဖျာမ္ၚးဂှ်မ္ဂး ကၠေၚ်စသတ်ဗြဴ မွဲပသာ စဵုကဵု ၁၁၀၀၀ ဒ္ကေဝ် ၚုဟ်နွံဒၟံၚ်ရ။
ပ္ဍဲကဵုကၟိန်ဍုၚ်ဗၟာဂှ်မ္ဂး ဒးပၠုပ်နၚ်ဒၟံၚ်ကၠေၚ်စသတ်ဗြဴ နူကဵုဍုၚ်မလေဝ်ယှာအဓိကတုဲ နူကဵုဍုၚ်သေံ ကေုာံ ဍုၚ်အေန်ဒေါနဳယှာတအ်ဂှ် ပရေၚ်ပၠုပ်သွံရာန် နွံဒၟံၚ်ညိညတုဲ ပ္ဍဲဍုၚ်လေဝ် ကၠေၚ်ၜဲ၊ ကၠေၚ်လ္ၚဴ၊ ကၠေၚ်ပ္ကဴသၟိၚ်တ္ၚဲ ကေုာံ ကၠေၚ်တိတ်နူ သတ်ဒကောၚ်တၞဟ်တအ်ဂှ် ပရေၚ်သွံရာန် နွံဒၟံၚ်ညိညရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – MOI
sanlontai