ပ္ဍဲတယျေက်ချောၚ် ပေါဲဗတိုက် က္လေၚ်ဒှ်ကၠုၚ်ပၠန်

တယျေက်ချောၚ်၊ အဝ်ဂါတ်(၂၇)

ရးဒေသဇၞော်တၞၚ်သြဳ၊ ပ္ဍဲပွိုၚ်ဍုၚ်တၞၚ်သြဳဂှ် သ္ပတံနူ ဂိတုအဝ်ဂါတ် စၟတ်တ္ၚဲ (၂၄)တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်က္လေၚ်က္တဵုဒှ်ကၠုၚ်ပၠန်ရဂှ် ဒပ်စဵုဒၞာဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကရောၚ်ပၞာန်ကံၚ်ဇြဳပၞာန် ဇြဟတ်ဒပ်ပါလုပ် (၈၀) ပြၚ်ပြၚ်ဂှ် နူလ္ပာ်ကွာန်ဝေန်ဝ ဟိုတ်နူထ္ပက်လုပ်ကၠုၚ်ကရောၚ်ပၞာန် လ္ပာ်ကွာန်ယၚေဝ် ပ္ဍဲဂိတုအဝ်ဂါတ် စၟတ်တ္ၚဲ (၂၄)တေံဂှ်ရ ပေါဲဗတိုက်က္တဵုဒှ်လဝ် အကြာကွာန်ယျၚေဝ်ကဵု ကွာန်ကမျာၚ်ရ။

သ္အာၚ်နူဂှ်ပၠန် ပ္ဍဲဂိတုအဝ်ဂါတ် စၟတ်တ္ၚဲ (၂၅)ဂှ်လေဝ် ကရောၚ်ပၞာန်ကံၚ်ဇြဳပၞာန်ဂှ် ဟိုတ်နူထပ်လုပ်စိုပ်ကၠုၚ် ဗ္ဒာဲကွာန်ကတွောဲဂှ်ရ ပေါဲဗတိုက်ထပ်က္တဵုဒှ်လဝ်ကဵု ဒပ်ပံၚ်ကောံ ဒပ်စဵုဒၞာဒေသတအ်ပၠန်ရ။

ပ္ဍဲကဵုပေါဲဗတိုက် ပွိုၚ် (၂)တ္ၚဲဂှ် လ္ပာ်ဒပ်ကံၚ်ဇြဳပၞာန် ဒးချိုတ်လဝ် ဟွံအောန်နူ (၃)တၠနွံတုဲ လၟိဟ်ညးဒးလဝ်ဘဲဝပ်ဂမၠိုၚ် ဆက်လ္ၚတ်ဂၠိုက်ဂၠာဲဒၟံၚ်ရဂှ် ကောန်ဒပ် PDF ပွိုၚ်ဍုၚ်တယျေတ်ချောၚ်မွဲတၠ ဟီုရ။

ဒပ်ကံၚ်ဇြဳပၞာန် ဒးဂိလဝ် ပ္ဍဲကဵုပေါဲဗတိုက် က္တဵုဒှ်လဝ် ဗ္ဒာဲကွာန်ကတွောဲဂှ် လုပ်စိုပ်ကၠုၚ် ပ္ဍဲကွာန်တုဲ စံၚ်ပလီုဏာလဝ် သ္ၚိဒၟံၚ် ပံက်လဝ်ဆေၚ်ဖျာသကှ်မွဲမရဂှ် ဂွံတီကေတ် နူညးဒေသတအ်ရ။

ဟိုတ်နူပေါဲဗတိုက်တုဲ ညးဒေသ နူကွာန် (၆)ကွာန် ပါလုပ်သီုကွာန်ကတွောဲ၊ ဝေန်ဝ၊ ယျၚေဝ်၊ ကမျာၚ် (၁၀၀၀)တၠပြၚ်တအ်ဂှ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ် ဒၞာဲဌာန်ဗၠးဘဲရ။

ပ္ဍဲရးဒေသတၞၚ်သြဳဂှ် ပ္ဍဲဂိတုဂျူလာၚ်တုဲကၠုၚ်ဏံ ဟိုတ်နူပေါဲဗတိုက် ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ်တုဲ ညးဒေသ ၃၆,၀၀၀ ပြၚ်တအ် ဒးဂြိပ်ဒဴပါဲဓလေတ်ဒၟံၚ် ဒၞာဲဗၠးဘဲလမျီုရဂှ် ဂကောံသုတေသန ပ္ဍဲဒေသဂှ် လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media (ဗီုတြေံ)