ကသာ၊ အဝ်ဂါတ် (၂၇)
လၟိဟ်မၞိဟ်ဗၞတ်မွဲကိုဋ် နူကဵုကွာန် ဍာ်ဇၞော်ဍာ်ကလိုပ်အာ အပ္ဍဲခရိုၚ်ဒေသန္တရ ပေါန်ဂျာပ် ဍုၚ်ပါကေဿတာန်ဂှ် ဒဒှ်ရဆုဲပြံၚ်ကဵုလဝ် ဒၞါဲဗၠးဘဲတုဲယျဂှ် ဌာနရေၚ်တၠုၚ်ကာမံက်တိုန် အလဵုအသဳ ဟီုဂးလဝ်ရ။
အခိၚ်ဍာ်ၜဳသွေတ်လာပ် သၠုၚ်တိုန်ကၠုၚ်ဂှ် ကွာန်ဂၠိုၚ်ကဵုကၠံ၊ တိဗ္ၚတဵုလွဳ ဂၠိုၚ်ကဵုလ္ၚီ နူကဵုအပ္ဍဲခရိုၚ်ဒေသန္တရဗဟဵုဂှ် ဗၠိုက်အာလဝ်ဍာ်ရ။
အတိုၚ်ဂလာန် ဇၞော်သ္ကိုပ်အလဵုအသဳဒေသပေါန်ဂျာပ်ဂှ်မ္ဂး ဟိုတ်နူဗြဲမုဟ်သုန်ဂူတုဲ သၟိၚ်တၠအဝဵု အိန္ဒိယဂမၠိုၚ်ဝွံ ဍာ်ပဵုတိုန်ကၠုၚ်တံဂှ် ဟိုတ်နူဖံက်ပြိုဟ်ဏာ အပ္ဍဲၜဳတေံဂှ်တုဲ ပ္ဍဲကဵုပယျဵုပါကေဿတာန် သ္ကုတ်သၟဝ်ဂှ် ဍာ်ဇၞော်ဍာ်ကလိုပ်က္တဵုဒှ်အာလဝ်ရောၚ်ဂှ် ဂွံတီကေတ်ရ။
“အပ္ဍဲအကြာတ္ၚဲ တုဲကၠုၚ်ဏံ ဍာ်ကလိုပ်က္တဵုဒှ်လဝ်တုဲ သ္ၚိပိုယ်တံ ဗၠိုက်အာလဝ်ရ” သာ်ဝွံ ညးဒေသမွဲတၠ ဟီုဂးလဝ်ရ။
လၟေၚ်သၞာံ အကြာဂိတုဂျောန်ကဵု ဂိတုသေပ်တေမ်ဗာ အခိၚ်ကာလမုဟ်သုန်တမ်က္ညၚ်တံဂှ် ပ္ဍဲအာယှသၠုၚ်ကျာတေံ လၟေၚ်သၞာံ ဗြဲဂူလေပ်ဂှ် ဂွံတီကေတ်ရ။
အပ္ဍဲကၟိန်ဍုၚ် လၟိဟ်မၞိဟ်ၜိုတ် ၂၀ ဗဳလျာန်မံၚ်ဒၟံၚ်ဂှ် သွက်သၟာဗ္ၚ ကေုာံ သွက်ဂီုကၠီုစၞစတံဂှ် ပရေၚ်တဵုလွဳဝွံ ပၟိက်ဇၞော်ကီုလေဝ် ဟိုတ်နူတိလာ်တံကဵု ဍာ်ဇၞော်တံတုဲ မွဲဏှမွဲဏှ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ် မဒှ်ရ။
ညးတာလျိုၚ်ပရေၚ်ဟံၚ်ပြာ် ဒေသပေါန်ဂျာပ် ပါကေဿတာန်ဂှ် “နကဵုပိုယ်တံ ရီုပ္တိတ်ဂွံလဝ် အပံၚ်မၞိဟ်မွဲကိုဋ်တုဲ ဆုဲပြံၚ်ကဵုလဝ် ဒၞါဲဗၠးဘဲတံယျ” ဂှ် ဟီုဂးလဝ်ရ။
ပ္ဍဲကဵုတၚ်ကဵုသတိ အေဂျေန်ဇြဳကောပ်ကာဲဘဲအန္တရာယ်ပေါန်ဂျာပ်ဂှ် အပ္ဍဲတ္ၚဲကၠုၚ်စိုပ်ဂတဏံ ဗြဲမုဟ်သုန် ဆက်ဂူဂၠိုၚ်မာန်ဏောၚ် သာ်ဝွံ ပါလုပ်ရ။
ပါကေဿတာန်ဝွံ ပ္ဍဲသၞာံ ၂၀၂၂ ဂှ် ဗ္ဒါဲပိဂအုံမွဲဂအုံကၟိန်ဍုၚ်ဂှ် ဒးဂဗလဝ် ဍာ်ဇၞော်ဍာ်ကလိုပ်ပရေံပရေံတုဲ အပံၚ်မၞိဟ် ၃၃ ပြကောဋိကိုဋ်ပြၚ် ဇီုကပိုက်ဒးလဝ်ရ။
ဍုၚ်ပါကေဿတာန် မဒှ်ဍုၚ်လၟိဟ်မၞိဟ်ဂၠိုၚ်အိုတ် မရနုက်ကဵုပဉ္စမ လ္တူဂၠးတိဏံဂှ်ဝွံ ဗလးပ္တိတ်ဒၟံၚ်သၟုဟ်ဓာတ် မက္တဵုဗဒှ်ကဵုရာသဳပြံၚ်လှာဲ စပ်ကဵုဂၠးတိတံ သၟဝ် ၁ တၟံကၠံဓဝ် မဒှ်ရ။
Ref: AFP
sanlontai