ဗဒိုပ်သၞေဟ်ကၚ် ဗ္ဒာဲဒပ်ပ္ကတ်ပ္ကေၚ်တပုက်ကျေန် ဒးဒုၚ်ဗတိုက်လဝ် ဗၠာဲသၟိၚ်မွဲတၠဒးချိုတ်လဝ်

တပုက်ကျေန် – အဝ်ဂါတ်(၂၉)

ရးဒေသအဝ်ဝ၊ ဗ္ဒာဲကွာန်တွောန်ၚေဝ် ပွိုၚ်တပုက်ကျေန် ဗဒိုပ်သၞေဟ်ကၚ် ဗ္ဒာဲဒပ်ပ္ကတ်ပ္ကေၚ်ပၞာန် စၟတ်(၂) ဖျေံသ္ဇိုၚ်တပုက်ကျေန် ကံၚ်ဇြဳပၞာန်ဂှ် ဟိုတ်နူ PDF တအ် လုပ်စိုပ်ဗတိုက်လဝ်တုဲ ဗၠာဲသၟိၚ်မၚ် သၞေဟ် (၁)တၠ ဒးချိုတ်တုဲ ဒးလဝ်ဘဲဝပ်မွဲတၠရဂှ် ပ.က.ဖ ခရိုၚ်ပျေန်ဥူလွေန် လလောၚ်တြးလဝ် နကဵုစၟတ်တ္ၚဲ တ္ၚဲဏံရ။

ပ္ဍဲဂိတုအဝ်ဂါတ် တုဲကၠုၚ် စၟတ်တ္ၚဲ(၂၆)အခိၚ်ဒေါဝ်တ္ၚဲဂှ် ပ.က.ဖ ပွိုၚ်ဍုၚ်တပုက်ကျေန်၊ သ္ဂံၚ်ဒပ်ဒမၠုက်တဝ်ဇြေန်ယိုၚ် TBK တအ် လုပ်ဗတိုက်လဝ်ရ။

ပ္ဍဲပရေၚ်ပန်ပှော်ဂှ် လအ်လဝ် ပွိုၚ် (၅)မိနေတ်ဓဝ်ဟေၚ်တုဲ လ္ပာ်ဒပ်စဵုဒၞာညးဍုၚ်ကွာန်တအ် ပရေၚ်ဇီုကပိုက်ဒးလဝ်ဟၟဲတုဲ လ္ပာ်ကံၚ်ဇြဳပၞာန်ဂှ် ဗၠာဲသၟိၚ်ဒးချိုတ်လဝ်မွဲတၠ ဒးလဝ်ဘဲဝပ်မွဲတၠတုဲ သီဂွံလဝ် လွဟ် G-3 မွဲဒကိုအ်ရဂှ် ဂွံတီကေတ်ရ။

သ္ကုတ်လကြဴနူ ဒပ်ပၞာန်သီအဝဵုကၟိန်ဍုၚ်ဗၟာတုဲ ပ္ဍဲရးဒေသအၚ်ဝ ပေါဲဗတိုက်ဆေၚ်မုက် ဒပ်စဵုဒၞာညးဍုၚ်ကွာန်တအ်ကဵု ဒပ်ကံၚ်ဇြဳပၞာန်တအ် က္တဵုဒှ်ဒၟံၚ် မွဲခနမွဲခနတုဲ ဟိုတ်နူလ္ပာ်ကံၚ်ဇြဳပၞာန် ဒးဂိဒၟံၚ်တုဲ က္လိလောန်ဒၟံၚ် ပရေၚ်စံၚ်ပလီုသ္ၚိဌာန် ညးဍုၚ်ကွာန် ကေုာံ ပရေၚ်ဖံက်ပ္ကဝ် အခေါၚ်အရာမၞိဟ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – TBK