ဗဒိုပ်ဗၠာဲသၟိၚ်ၝောံဍုၚ်ပံၚ် သီုရုၚ်အုပ်ဓုပ် ဒးဒုၚ်ဗတိုက်လဝ်ကဵုဒရုမ်

ပံၚ် – အဝ်ဂေတ် (၂၉)

တွဵုရးဍုၚ်မန်၊ ပွိုၚ်ဍုၚ်ပံၚ် အရာပ်ပံၚ်ဂှ် ဗဒိုပ်ဗၠာဲသၟိၚ်ၝောံဍုၚ်ပံၚ်ကေုာံ ရုၚ်ပရေၚ်အုပ်ဓုပ် မၞုံသ္ကဲဂၠံၚ်ကွဳစက် လဂုၚ်-မတ်မလီုဂှ် ဒးဒုၚ်ဗတိုက်လဝ်ကဵုဒရုမ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုအဝ်ဂါတ် စၟတ်တ္ၚဲ (၂၇)တုဲကၠုၚ်ဏံ ဗ္ဒာဲကၟာၚ်ဒပ်ဗဒိုပ်ဗၠာဲသၟိၚ်ၝောံဍုၚ် ကေုာံ ဗ္ဒာဲစၚ်ဍာ် ရုၚ်ပရေၚ်အုပ်ဓုပ်ဂှ် ဗုမ်ဒရုမ်ပိမ ဒတုံစှ်ေ ပါ်ခတိုဟ်လဝ်ရ။

အခိၚ်ဗုမ်ဒရုမ်ဒတုံစှ်ေပါ်ခတိုဟ်လဝ်ဂှ် ဟိုတ်နူရမျာၚ်ပန်ပှ်ောလွဟ် တိတ်ကၠုၚ်နူဗဒိုပ်ဗၠာဲသၟိၚ်တုဲ ပရေၚ်ညးဒေသတအ်အာကၠုၚ် စဵုကဵုဟၟဲ က္တဵုဒှ်လဝ်ရဂှ် ဂွံတီကေတ်ရ။

“နူတနေံဗ္တံဏံ ဗုမ်စှ်ေလဝ် ကွေံရ။ ဇီုကပိုက်ဒးလဝ်မၞိဟ်ဂှ် ဟွံညာတ်ပုဟ်။ ယဝ်ဇီုကပိုက် ဒးချိုတ်လဝ်နွံတှ်ေ ကဵုကွဳစက်ဍေံတအ်ကဵုဒှ် ကွဳစက် ဂကောံဂိယဲချိုတ်ဂျိုၚ်ကဵုဒှ် ပ္ဍိုက်ပ္တိတ်ဏာတှ်ေ ဒးဆဵုဏောၚ် လၟုဟ်ဂှ် ပရေၚ်ချဳဒရာၚ်ဒၟံၚ်တၞဟ် ဟွံညာတ်လဝ်ပုဟ်” ညးဒေသမွဲတၠဂှ် ဟီုရ။

ပရေၚ်ဗတိုက်ပန်ပှော်ဏံဂှ် ခရိုၚ်သဓီု ဒပ်မဟာ -၁၊ တံဒပ် -၂၊ ဂကောံ KNLA/PDF၊ ဂကောံ ပ.က.ဖ ကေုာံ S.O.F တအ် ပံၚ်တောဲတုဲ ဂြာတ်ထောံဖျေံလဝ်ဗုမ်ကဵုဒရုမ် (၇)မရဂှ် ကရောၚ်ပၞာန်တပေန်ယှိုဲထဳ လလောၚ်တြးလဝ်ရ။

ပ္ဍဲပရေၚ်ပန်ဗတိုက်ဂှ် ပါလုပ်သီုသ္ကိုပ်ဗိုကျဝ်နိုၚ်ဥူ ညးလုပ်ဂကောံကံၚ်ဇြဳစဳမာန်အုပ်ဓုပ်ပွိုၚ်ဍုၚ် ဗိုလ်ဇၞော် (၁)တၠ၊ အကြာပ်ဒပ်(၂)တၠ ကေုာံကောန်ဒပ် (၁)တၠ အပံၚ်လၟိဟ်(၅)တၠ ဇီုကပိုက်ဒးလဝ်ရဂှ် ၜိုန်ဟီုကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ရ။

ပ္ဍဲတွဵုရးဍုၚ်မန် ဇြဟတ်ရပ်လွဟ်ပၠန်ဂတးဒစဵုဒစး ခိုဟ်ဒၟံၚ်ဂှ် ဒပ်ကံၚ်ဇြဳပၞာန်ကဵု ဂကောံဇြဟတ်ပရေၚ်ပၠန်ဂတးတအ် ပေါဲဗတိုက်ဆေၚ်မုက် က္တဵုဒှ်ဒၟံၚ်မွဲခနမွဲခနတုဲ လ္ပာ်ကံၚ်ဇြဳပၞာန်ဒးဂိဒၟံၚ်ရ။

သ္ကုတ်လကြဴနူ ဒပ်ပၞာန်သီအဝဵုကၟိန်ဍုၚ်ဗၟာတုဲ ဗဒိုပ်ဗၠာဲသၟိၚ်ၝောံဍုၚ်ပံၚ် ကေုာံ ရုပ်အုပ်ဓုပ်ဂှ် ဒးဒုၚ်ဗတိုက်ထောံဖျေံလဝ်ဗုမ် နကဵုဒရုမ် (၃)ဝါရဂှ် ညးဒေသတအ် ဟီုရ။

ပရိုၚ် – သြၚ်လောန်တိုၚ်(မ်)

ဗီုရုၚ် – ကရောၚ်ပၞာန်တပေန်ယှိုဲထဳ