သွက်ဂွံရီုဗၚ်ကဵု ညးပါဲဘဲပၞာန်ဒေသယာဒိုဝ် ပရေၚ်စသုၚ်မံၚ်စံၚ်ကြေပ်ဂြတ်ဒၟံၚ်ဂှ် ဒုၚ်ဂုဏ်အာတ်မိက်လဝ်

သာန်တောၚ်ဂျဳ၊ အဝ်ဂါတ်(၂၉)

တိဍာ် KNU ဒပ်မဟာ(၂) ပ္ဍဲဒေသယာဒိုဝ်ဂှ် ဟိုတ်နူပေါဲဗတိုက်တုဲ ညးဍုၚ်ကွာန်ပါဲဘဲပၞာန် ဒးဂြိပ်ဒဴဓလေတ်ဒၟံၚ် ပွိုၚ်မွဲဂိတုပြၚ်တအ်ဂှ် အခိၚ်လၟုဟ်ဏံ ဟိုတ်နူပရေၚ်စသုၚ်မံၚ်စံၚ် သာကြေပ်ဂြတ်ကၠုၚ်ဒၟံၚ်ဂှ် သွက်ဂွံရီုဗၚ်ညးသ္ကအ်ဂှ် ဂကောံရီုဗၚ်ကဵုဒၟံၚ်ညးပါဲဒဴဘဲပၞာန်တအ် ဒုၚ်ဂုဏ်အာတ်မိက်လဝ်ရ။

ခရိုၚ်တံၚ်ဥူ KNU၊ တိဍာ်ဒပ်မဟာ (၂)ပွိုၚ်ဍုၚ်သာန်တောၚ်ဂျဳ၊ ပ္ဍဲဒေသယာဒိုဝ်ဂှ် သ္ပတံနူ ဂိတုဂျူလာၚ် တုဲကၠုၚ် စၟတ်တ္ၚဲ (၁၁)တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်သ္ကာတ်မြဟ်လဝ်တုဲ ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ဟွံအောန်နူ (၃၀) ဝါကၠောန်သ္ပလဝ်ရ။

ဟိုတ်နူပေါဲဗတိုက်တအ်တုဲ ညးဒေသ နူကွာန်မပ္တံကဵု ဒါယျိုဝ်၊ ကလေတ၊ ဝါဗာန်ခိုဝ်၊ ဗရေဝ်သဝ်၊ ဝါသဝ်ခိုဝ် မၞုံဒေသယာဒိုဝ် ၜါလ္ၚီပြၚ်တအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဂြိုပ်ဒဵု ကေုာံ ဒၞာဲဗၠးဘဲ ကြပ်ညောန်တအ်တုဲ စဵုကဵုအခိၚ်လၟုဟ် ဟွံဂံၚ်ကလေၚ်စဴ ဌာန်ဒၟံၚ်ဏီရ။

ညးဍုၚ်ကွာန်ပါဲဒဴဘဲပၞာန် ဒးဂြိပ်ဒဴပါဲဓလေတ်ဒၟံၚ်တအ်ဂှ် အခိၚ်ဒးပါဲဒဴဘဲပၞာန်ကာလဂၠိၚ်သ္ၚောဲတိုန်ကၠုၚ်မွဲဒမြိပ်ဏံ ပရေၚ်စသုၚ်မံၚ်စံၚ် ဂကောံသ္ၚိကၟိန်အိန်ထံၚ်တအ် သာကြေပ်ဂြတ်ကၠုၚ်တုဲ နွံဒၟံၚ်ပၟိက်ကဵု အရီုဗၚ်ဇွောံမစၞစသ္ဇိုၚ်တအ်ရ။

ဂကောံ Tun Myanmar Donation ရီုဗၚ်ကဵုဒၟံၚ် ပရေၚ်ညးပါဲဘဲပၞာန်တအ်ဂှ်မ္ဂး ယဝ်ရဂွံ သ္ၚု ကၠေၚ် ၜဵု ခရံက် ထၞိက်ထၞာတ် သွက်ညးဍုၚ်ကွာန်ပါဲဘဲပၞာန်တအ်မ္ဂး ဒဒှ်ရပြေဒၟံၚ်စိုတ်ကီု ဒှ်မာန်မ္ဂး ညးတာလျိုၚ်တအ်ကီု သီုကဵုတၠဒါန်တအ် သွက်ဂွံရီုဗၚ်ထံက်ပၚ်ကဵုဂှ် အာတ်မိက်လဝ်ရ။

ညးပါဲဘဲပၞာန်ဒေသယာဒိုဝ် ပရေၚ်စသုၚ်မံၚ်စံၚ် ဝါတ်ဂါတ်ခက်ခုဲဒၟံၚ်တအ်ဂှ် အခိၚ်လၟုဟ်ဏံ ဟိုတ်နူဒှ်ဒၟံၚ်အခိၚ်သတ်ဒၞၚ်တိတ်ဂှ်ရ က္လေၚ်စဴဌာန်ဒၟံၚ်တုဲ ၜိုန်မိက်ဂွံၜှ်ပလှ်သတ်ဆုတအ်ကီုလေဝ် ဟိုတ်နူဂွိၚ်ဖေက် ဒပ်ကံၚ်ဇြဳပၞာန်ရပ်တုဲ စၟဳဒၟံၚ်သွက်ဂွံကဵုကၠုၚ်ပရေၚ်ဂီုကၠီုရဂှ် ဂွံတီကေတ် နူညးရီုဗၚ်ကဵုဒၟံၚ် ညးပါဲဘဲပၞာန်တအ်ရ။

ဂကောံသၟတ်တၞောဝ်တၟိဂကူကရေၚ်ဍာဲ (KNGY)ဂှ်လေဝ် ဟိုတ်နူပေါဲဗတိုက်တုဲ ညးဍုၚ်ကွာန် ကောန်ဒေသယာဒိုဝ်တအ်ဂှ် မိက်ဂွံက္လေၚ်စဴဒၟံၚ် ဌာန်ဒၟံၚ်ညးတအ်ပြဟ်ဟ်တုဲ နူအခိၚ်ဒးဂြိပ်တိတ်တေံ မပ္တံကဵုဗွိုက်လတက်၊ ဇွောံမစၞစ၊ ကပေါတ်ရပ်စပ်တအ် မုလေဝ်ဟွံဂွံနၚ်လဝ်ဂှ်ရ ပြဟ်ဟ်ဏံ နွံဒၟံၚ်ပၟိက်သီုဖအိုတ်ရဂှ် လလောၚ်တြးလဝ်ရ။

ပ္ဍဲပေါဲဗတိုက်ယာဒိုဝ်ဂှ် ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ်တုဲ ပါလုပ်သီုစမြိုၚ် ပရေၚ်ဘာသာခရေတ်ယာန် သ္ၚိဒၟံၚ် (၂၀)မပြၚ် ဇီုကပိုက်ဒးခရိုဟ်လီုလာ်လဝ်တုဲ ညးဍုၚ်ကွာန်ကောန်ဒေသယာဒိုဝ် ၂၀၀၀ ပြၚ် ဒးပါဲဓလေတ်ဒၟံၚ်ဘဲပၞာန်ရဂှ် KNU ခရိုၚ်တံၚ်ဥူ လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Tun Myanmar Donation