သွက်အလဵုအသဳကၟိန်ဍုၚ်နာနာ ဂွံဒတူလာၚ်ကဵု လ္ပာ်ညးဍုၚ်ကွာန်ဗၟာ ညံၚ်အလဵုအသဳတဳမဝ်ဂှ် NUG အာတ်မိက်

မတ်မလီု၊ အဝ်ဂါတ်(၂၉)

နကဵုအလဵုအသဳတွဳဗွိုၚ်ကၟိန်ဍုၚ်နာနာတအ် ဒတူလာၚ်ကဵု မွဲကရောံမွဲစွံကဵု ညးဍုၚ်ကွာန်ဗၟာ ညံၚ်ကၟိန်ဍုၚ်တဳမဝ်လေတ်စတေတုဲ သွက်ကၟိန်ဍုၚ်ဗၟာ ဂွံက္လေၚ်စိုပ် လ္တူဂၠံၚ်ဒဵုမဝ်ကရေဇြဳပၠန်ဂှ် ကၠောန်သ္ပကဵု ပရေၚ်ရီုဗၚ်ထ္ၜလဘာ်ညိဂှ် အလဵုအသဳ NUG အာတ်မိက်ဒုၚ်လဝ်ဂုဏ်ရ။

နကဵုအလဵုအသဳ ရှ်ေသှ်ေစွံၚုဟ်မး မူသ္ဇိုၚ်ဒဳမဝ်ကရေဇြဳ သၞောတ်ဗ္ၜတ်အခေါၚ်အရာမၞိဟ် ပရေံၚ်ထံက်ရံၚ်ဗ္စာရဏာပရေၚ်မၞိဟ်တအ်ဂှ် သွက်ဂွံဒတူလာၚ်အာ မွဲကရောံကဵု ညးဍုၚ်ကွာန်ဗၟာတအ် မွဲစွံဂှ် NUG အာတ်မိက်လဝ် နကဵုစၟတ်တ္ၚဲ တ္ၚဲဏံရ။

ကံၚ်ဇြဳပၞာန်သီအဝဵုဂှ် ဂိတုသေပ်တေမ်ဘာ စၟတ်တ္ၚဲ (၁)ကၠုၚ်စိုပ်ဂတဏံ စွံတ္ၚဲလကြဴအိုတ်တုဲ ညံၚ်ကလုတ်ကၟိန်ဍုၚ်တဳမဝ်လေတ်စတေ ဂွံစ္ဍးတိတ်အာ နူကၟိန်ဍုၚ်ဗၟာဂှ် ဟိုတ်နူထ္ဍေၚ်ပ္တိတ်လဝ်ဂှ်ရ ဒးဆေၚ်ဒၟံၚ်မုက်ကဵု ပရေၚ်ဟီုဂးပါ်ပါဲရ။

သ္အာၚ်နူဂှ်ပၠန် နကဵုဂကောံဟွံလုပ်သၞောဝ် ပတှ်ေဇြဟတ်လွဟ်တုဲ ကေတ်လဝ်အဝဵုကၟိန်ဍုၚ် ဗွဲအဓမ္မမ္ၚးသၞောဝ်ဂှ် လ္တူကိစ္စပရေၚ်ဆက်ဆောံကလုတ် အခေါၚ်ကၠောန်ဖျေံသ္ဂုတ်သွာတ် ဟၟဲပုဟ်ဂှ်လေဝ် ဓမံက်လဝ် ပ္ဍဲတၚ်လလောၚ်တြး NUG ရ။

တၚ်ဒတူလာၚ်ကၟိန်ဍုၚ်တဳမဝ်လေတ်စတေ နဒဒှ်မိဿဟာဲခိုၚ်ဗိုန်ဂှ် သှ်ေၜက်ဂွံဒၟံၚ်သတိ ပ္ဍဲဂၠံသြိုဟ် လဵုအသဳပရေၚ်ညဳသၟဟ်ကောန်ဂကူ ကေုာံ ညးဍုၚ်ကွာန်ကၟိန်ဍုၚ်ဗၟာတအ် ဇြိုဟ်ဟ်နက်နက်တုဲ တၚ်ဂုဏ်ချူကှ်ေလဝ်စွံလဝ် စၟတ်သမ္တီ ခိုၚ်ၚ်ဗိုန်န်ရောၚ်ဂှ်လေဝ် ဟီုသ္ဂးလဝ်ရ။

ပ္ဍဲကဵုပရိုၚ်ကံၚ်ဇြဳပၞာန် ဟီုဂးလဝ် သွက်ကလုတ်ကၟိန်ဍုၚ်တဳမဝ် ဂွံစ္ဍးတိတ်နူကၟိန်ဍုၚ် ပ္ဍဲဂိတုသေပ်တေမ်ဗာ စၟတ်တ္ၚဲ (၁)ဂှ် သြန်လောန်တိုၚ် (မ်)ဓမံက်ထ္ၜးလဝ်ဂှ်လေဝ် အခိၚ်အလဵုအသဳညးဍုၚ်ကွာန်တိုန်ကၠုၚ်မ္ဂး ထေက်ကဵု ဒးကဵုအခေါၚ် ကၟိန်ဍုၚ်တဳမဝ် တိတ်ဗၠးနူအကံက်အခေါန်တုဲ ဒးကဵုအခေါၚ်ကၠောန်ပရေၚ်ပိုန်ဒြပ်ပ္ဍဲဍုၚ် ထေက်ရောၚ်ဂှ် ညးဍုၚ်ကွာန်လ္ၚဵု ချူလဝ်တၚ်သမ္တီနွံရ။

ပရိုၚ် – သြၚ်လောန်တိုၚ်(မ်)

ဗီုရုပ် – NUG