ဟိုတ်နူဒပ်ပၞာန် ဒးဒုၚ်ဗတိုက်လဝ် ပ္ဍဲကျာ်ထဝ်ဂှ် ပန်ပှော်ဏာ အကြာဂၠံၚ်ကြာန်န်တုဲ ကောန်အရာပ် (၃)တၠ ဒးလဝ်ဘဲဝပ်

ကျာ်ထဝ်၊ အဝ်ဂါတ်(၂၉)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဟိုတ်နူဒပ်ကံၚ်ဇြဳပၞာန် ဒးဒုၚ်ဗတိုက်လဝ် ပ္ဍဲဂၠံၚ်ကွဳစက်လဂုၚ် – မတ်မလီု ကွာန်ဒေါၚ်တောၚ်ဂှ် ပန်ပှော်ဏာလဝ် မွဲဒမြိပ်ဂၠံၚ်ကြာန်န်တုဲ ကောန်အရာပ် (၃)တၠ ဒးလဝ်ဘဲဝပ်ရဂှ် ဂွံတီကေတ် နူညးဒေသတအ်ရ။

​ရေၚ်ယာဉ်ကွဳစက်ကံၚ်ဇြဳပၞာန် ကွဳစက်ပါလုပ် (၆)ဖ္ဍိုက် နူကဵုကျာ်ထဝ် ဒဳလုပ်ကၠုၚ် ပ္ဍဲရးဗဂေါဂှ် ဒပ်ပၞာန်ဗၠးၜးကောန်ဂကူကရေၚ် KNLA သီုဒပ်ဂကောံဇြဟတ်ပၠန်ဂတးတအ် ကြတ်ဗတိုက်လဝ်ကဵု လွဟ်ဍောတ်ဇၞော်ရ။

ကံၚ်ဇြဳပၞာန်ဒးဂိလဝ် ပ္ဍဲပရေၚ်ပန်ဗတိုက်ဏံဂှ် ပန်ပှော်ဏာလွဟ်စက် မွဲဒမြိပ်ဂၠံၚ်ကွဳစက် လဂုၚ်-မတ်မလီုဂှ် တောဲကဵုတောဲ ကြာန်န်ဒမာန်ဒမာန်ရ။

ဟိုတ်နူဒပ်ကံၚ်ဇြဳပၞာန် ပန်ပှော်လဝ်တုဲ မ္ၚးနူကိုဝ်အောၚ်လေ ကိုဝ်ထောန်နိုၚ် ဒၟံၚ်ကွာန်အၚ်္ဂဘိုဝ်တအ်တုဲ သၟာဒဳကွဳစက်ပ္ဍိုက်ဗၞိက် ဒေါံဒၟံၚ်သ္ကဲဂၠံၚ်မွဲတၠဂှ်လေဝ် တေက်ဒးလဝ်လွဟ်မကမ် ဒးလဝ်ဘဲဝပ်ညးသ္ကအ်ရဂှ် ညးဒေသတအ်ဟီုရ။

ဟိုတ်နူပရေၚ်ကြတ်ဗတိုက်တုဲ လ္ပာ်ကံၚ်ဇြဳပၞာန် အောန်အိုတ် ဟွံအောန်နူ (၁၀)တၠ ဇီုကပိုက် ဒးချိုတ်လဝ်နွံမာန်ကီုလေဝ် ဆက်လ္ၚတ်ဂၠိုက်ဂၠာဲဒၟံၚ် အကာဲအရာဗလးမုက်တိ သောဲသောဲဗြောဲဗြောဲရဂှ် ညးတာလျိုၚ်ဒပ်ပံၚ်ကောံ ဂကောံဇြဟတ်ပၠန်ဂတးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲပရေၚ်ကြတ်ဗတိုက်ဏံ ကွဳစက်ကံၚ်ဇြဳပၞာန် ဒးလဝ်လွဟ်ဇၞော်မွဲဖ္ဍိုက်ဂှ် ကၠဟ်စွံလဝ် ဗ္ဒာဲကွာန်မယာန်ချောၚ်တုဲ ကောန်ဒပ်ကံၚ်ဇြဳပၞာန် ဒးလဝ်ဘဲဝပ်တအ်ဂှ် ပလံၚ်ဗစိုပ်လဝ် ရုၚ်ဂဥုဲမတ်မလီု နကဵုကွဳစက်ကၟာတ်ဒ္ၚောဝ်ရဂှ် ဂွံတီကေတ် အတိုၚ်လဟီု ကောန်ဒပ်စဵုဒၞာဒေသတအ်ရ။

ပ္ဍဲပရေၚ်ပန်ပှော်ဏံ ကွဳစက်အာန်ဇြာတုံမွဲဖ္ဍိုက်လေဝ် ဇီုကပိုက်ဒးလဝ်နွံတုဲ ညးအာတရဴပါဗက်ကၠုၚ်ကွဳစက်ဂှ် (၂)တၠ ဒးလဝ်ဘဲဝပ်ရဂှ် ၜိုန်ဂွံမိၚ်လဝ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ဏီရ။

ပ္ဍဲဂိတုအဝ်ဂါတ် စၟတ်တ္ၚဲ (၁၅)တုဲကၠုၚ်တေံလေဝ် ပွိုၚ်ဍုၚ်ကျာ်ထဝ်၊ ဗ္ဒာဲကွာန်တယျေက်ကုမ်ဂှ် ဟိုတ်နူရေၚ်ကွဳစက်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၅)တၠ ဒးလဝ်ဘဲဝပ်ရဂှ် ဂွံတီကေတ် နူဇရေၚ်ခရိုၚ်သဓီု KNU ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ