မုဟ်ဍုၚ်၊ အဝ်ဂါတ် (၂၉)
အခန်ကၞာတ္ၚဲပၠန်ဂတးမန် မရနုက်ကဵု(၇၆)ဝါ ကၠုၚ်စိုပ် ပ္ဍဲဂိတုအဝ်ဂါတ် စၟတ်တ္ၚဲ(၃၁)ဏံဂှ် ကၠောန်ဗဒှ်အာ ပ္ဍဲတွဵုရးဍုၚ်မန်၊ ပွိုၚ်ဍုၚ်မုဟ်ဍုၚ်၊ ပ္ဍဲကုန်အာဇာနယ်မန် မၞုံပ္ဍဲဖဠာတ်ပံက်ၜါ(ဗျိုၚ်းနှစ်ကောၚ်) ဝၚ်စိၚ်ဂှ်ဏောၚ်ဂှ် ဂွံတီကေတ် နူကဝ်မတဳ ပရေၚ်ကၠောန်ဗဒှ်အခန်ကၞာဂှ်ရ။
သ္ပတံနူ သၞာံကိုဝ်ဝေတ် က္တဵုဒှ်ဂှ်တုဲ ကြဴနူဒပ်ပၞာန်သီအဝဵုတုဲဂှ် အခန်ကၞာတ္ၚဲပၠန်ဂတးမန်ဂှ် ကၠောန်ဗဒှ်လဝ် လ္တူလပှ်ကျာတံတုဲ ပ္ဍဲသၞာံဏံဂှ်တှ်ေ သွက်ဂွံကလေၚ်ကၠောန်ဗဒှ်အာ ပ္ဍဲကုန်အာဇာနဲမန် မၞုံပ္ဍဲဖဠာတ်ဝၚ်စိၚ်ဂှ် ပလေဝ်ပလေတ်လဝ်ရ။
ရန်တၟအ်ကဵု သ္ပအဲပြဲ ဗှ်ဗၞုဟ်အသဝ်ဂုဏ် က္ဍိုပ်သ္ကိုပ်သ္ဂံၚ်ညးမဆာန်ဂကူဂမၠိုၚ် ပူဇဴဏာလဝ် လမျီုဆီပဠက် သွက်ဗၠးၜးဂကူ ပၠန်ဂတးကၠုၚ်လဝ်ကဵု တၠအဝဵုမဟာဝါဒဳခေတ်အဆက်က်ဂှ် ပိုဲတၞောဝ်ဒတောဝ်တၟိတံ သ္ဂောံရော်ဂုဏ် ပ္တိုန်ဂုဏ်စရာဲကီု၊ သီုသ္ဂောံထိၚ်ဒဝ်ဇၞော်ပၟဝ်အာ သတ်ပၟဝ်ဇဝ်ပ္ကဴပၠန်ဂတး စဵုကဵုကလိဂွံပေါဲအံၚ်ဇၞး ရုန်ဂ္စာန်အာရောၚ်ဂှ် ကဝ်မတဳပရေၚ်ကၠောန်ဗဒှ် တ္ၚဲပၠန်ဂတးမန်ဂှ် လလောၚ်တြးလဝ်ရ။
ဂတဵုမုက်တ္ၚဲပၠန်ဂတးမန် မကၠုၚ်စိုပ်ပ္ဍဲသၞာံဏံ ရမျာၚ်ဂမြဴ မသ္ဂး”ဇြဟတ်ပၠန်ဂတးဇၞော် အခေါၚ်အရာဂကူမံက်”ဂှ်ကဵု ဗီုရုပ်က္ဍိုပ်သ္ကိုပ်အာဇာနယ်တံပါလုပ်ဂှ် ပစူလဝ်ပ္ဍဲပါၚ်လုပ် ဖဠာတ်ဝၚ်စိၚ်ဂှ် မဒှ်ရ။
ပ္ဍဲတ္ၚဲအကြာတံဏံဂှ် နဒဒှ်စၟတ်သမ္တီ ဒစးဒုၚ်တ္ၚဲပၠန်ဂတးမန်တုဲ ပါလုပ်သီုလ္တူဍုၚ်မတ်မလီု၊ ကွာန်ပလိုင်ဂျပါန် မၞုံဒေသကျာ်ပိတံကဵု ဌာန်ဒတန်ဗဟဵုဗော်ဍုၚ်မန်တၟိ အပ္ဍဲဗ္ဒိုပ်ညဳသာတံဂှ် ပရေၚ်ကၠောန်ဗဒှ်ပေါဲပြိုၚ်မခ္ဍံကျာ စၟတ်သမ္တီတ္ၚဲပၠန်ဂတးမန်တံလေဝ် နွံမံၚ်ရ။
တ္ၚဲပၠန်ဂတးမန်ဂှ် ကြဴနူဂွံအခေါၚ်ဗၠးၜး ၁၉၄၈ တုဲဂှ် နကဵုကောန်ဂကူမန်တံ သွက်ကံကုသိုလ်ဇကုဇကုဂွံဖန်ဖက်ကေတ်မာန် သၟတ်မန်ခေတ်တၟိ ပ္ဍဲလက်ထက်အလဵုသဳ ဖဆပလတေံ လုပ်ဍိုက်သီလွဟ် ပ္ဍဲဗ္ဒိုပ်ဗၠာဲသၟိၚ် ကွာန်ထဝ်ပၠၚ်၊ တွဵုရးကရေၚ်တေံဂှ်တုဲ စကၠုၚ်လဝ်ရ။
သ္ပဟိုတ်ကဵု ပရေၚ်ပၠန်ဂတးရပ်လွဟ် စပ္တန်ကၠုၚ်လဝ် ပ္ဍဲကွာန်ထဝ်ပၠၚ်ဂှ်တုဲ ဂိတုခ္ဍဲသဳပေၚ်ဂှ် စၟတ်သမ္တီလဝ် နဒဒှ် တ္ၚဲပၠန်ဂတးရ။
အခန်ကၞာတ္ၚဲပၠန်ဂတးမန်ဂှ် ပ္ဍဲတိဍာ်ထိၚ်ဒဝ် ဂကောံရပ်လွဟ်ကောန်ဍုၚ်အရၚ် ဗော်ဍုၚ်မန်တၟိ ခရိုၚ်သဓီု၊ ခရိုၚ်မတ်မလီု၊ ခရိုၚ်ထဝါဲ၊ ဒေသကျာ်ပိတံကဵု ပ္ဍဲဌာန်ဂအုပ်ဗဟဵုတံဂှ်လေဝ် ကၠောန်သ္ပမံၚ်တံ နွံရ။
ပရိုၚ်-သြၚ်လောန်တိုၚ်မ်
ဗီု-MYF
sanlontai