နေဗျဳဒဝ်၊ အဝ်ဂါတ် (၂၉)
သ္ပပ္တံနူဂိတုသေပ်တေမ်ဗာ ၁ ကၠုၚ်စိုပ်ဏံတုဲ စကံက်အာအခေါန် လ္တူသြန်လုပ် ညးယိုက်ဝန်ပရေၚ်ထတ်ယုက် သွာၚ်ပုဂ္ဂလိကတံ ၂ တၟံကၠံဏောၚ်ဂှ် ဌာနဝန်ဇၞော်ပရေၚ်ဘဏ္ဍာ ကေုာံ ကိုန်စဳမာန် ကံၚ်ဇြဳပၞာန် လလောၚ်ပ္တိတ်ကၠုၚ်ရ။
ပ္ဍဲကဵုလိက်စၞောန် မလလောၚ်ပ္တိတ်လဝ် နကဵုစၟတ်တ္ၚဲ ဂိတုအဝ်ဂါတ် (၂၅) ဂှ် ပ္ဍဲအရာကဵုသြန်ဂိတု ကုညးမၚ်မွဲရံၚ်စံၚ်ပရေၚ်ထတ်ယုက် ပ္ဍဲကဵုကမၠောန်ပရေၚ်ထတ်ယုက် ပုဂ္ဂလိကတံဂှ် နူကဵုကမၠောန်ပရေၚ်ထတ်ယုက်၊ ရုၚ်ဂဥုဲ ကေုာံ ဗ္ဒိုပ်ဂဥုဲတံ သွက်ဂွံနုက်ကေတ်လဝ် အကံက်ခေါန် ၂ တၟံကၠံဂှ် ပါလုပ်ရ။
အကံက်ခေါန်သြန်လုပ် မနုက်ကေတ်လဝ် ၂ တၟံကၠံဂှ် စနူတ္ၚဲနုက်ကေတ်ဂှ်တုဲ အပ္ဍဲပွိုၚ် ၁၅ တ္ၚဲ မၞိဟ်ကလိဂွံလဝ်သြန် ဟွံသေၚ်မ္ဂး နကဵုယၟု မၞိဟ်မၚ်မွဲကဵုပရေၚ်ထတ်ယုက်တံဂှ် ဒးပၠောပ်ကဵု ပ္ဍဲစရၚ်သြန်ဗာန် ရုၚ်အကံက်ခေါန် စပ်ကဵုညးရေၚ်တၠုၚ်အကံက်ခေါန် အဇာလဒေါဝ်၊ အဇာဇၞော် ကေုာံ ရုၚ်ဌာနသ္ကိုပ်က္ဍိုက်ပ်အကံက်ခေါန်ပွိုၚ်ဍုၚ် မဆေၚ်စပ်တံရောၚ်ဂှ် သ္ဂးရ။
အ္စာဂဥုဲပုဂ္ဂလိကမွဲတၠဂှ် ဟိုတ်နူပရေၚ်ကံက်အခေါန်သြန်လုပ် ကံၚ်ဇြဳပၞာန်တံဂှ်တုဲ ခရိတ်လွဳယဲ မၞိဟ်ဂိယဲတံ သာတုဲသၠုၚ်တိုန်ကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ရဲဂ္ဇအ်ဗ္ဒမ်ဂဥုဲ ဇကုဇကုမ္ၚးတံဏံဂှ်တှ်ေ မွဲသၞာံမွဲဝါ သွက်ဂွံပၠောပ်အခေါန်ဂးတုဲ သွက်ဂွံကဵုအခေါန်ဂှ် ပလံၚ်ကၠုၚ်လိက်။ တုဲမ္ဂး ဒးအာပၠောပ် ပ္ဍဲကဵုရုၚ်အကံက်ခေါန်တံရ။ ဒးအာဒၟံၚ် ဗီုပြၚ်ဏံရ။ အ္စာဂဥုဲဓမ္မတာတှ်ေ မွဲဗီု၊ အ္စာဂဥုဲ (အထူးကု) တှ်ေ မွဲဗီု။ တုဲပၠန် ပ္ဍဲကဵုရုၚ်ဂဥုဲ၊ ဗ္ဒမ်ဂဥုဲတံဂှ် ကာတ်စုတ်လဝ်သာၚ်ဗတ်နွံမ္ဂး စုတ်လဝ်သာၚ်ဗတ်တံဂှ် နွံမူစိရော၊ ဗ္ဒမ်ဂဥုဲလဵုဂှ် စုတ်လဝ်သာ်လဵုရော မပ္တံကဵုသာ်ဏံရ။ ညအ်ဂှ်လေဝ် ဟွံကၠိုဟ်လဝ် လိက်တၞးဏံ ချိုတ်တ်ပၠိုတ်တ်ဏီပုဟ်။ ကံက်အခေါန်ဏောၚ်ဟီုဂှ် ပိုယ်တံဂှ် ကဵုဒၟံၚ်အခေါန် လၟေၚ်ၚ်ရဏောၚ်လေဝ်။ လၟေၚ်သၞာံ မွဲသၞာံမွဲဝါ ကၠုၚ်မ္ဂး ကဵုဒၟံၚ်ရလေဝ်။ အခေါန်ဏံဂှ် ကၠုၚ်ဗီုလဵုဟွံတီဏီပုဟ်။ ဒးကဵုအခေါန်ဏောၚ်ဟီုတှ်ေ အခိၚ်ထ္ၜးရုၚ်ဂဥုဲမ္ဂး သာအိုတ်ဂၠိုၚ်ဏောၚ်။ ကၞောတ်တဲ မၞိဟ်အိုတ်ဂှ်တှ်ေ မၞိဟ်ယဲတံရဏောၚ်။ အ္စာဂဥုဲဂှ် ပ္တိတ်တုဲဂွံကဵုအခေါန်ဂှ် ဟွံမွဲပုဟ်လေဝ်။ အတိုၚ်ဒးကဵုအခေါန်တုပ်ပ်ရတှ်ေ ကေတ်ပပဵုပ္တိုန်ဏောၚ်။ ညအ်ရနွံ၊ ကံက်အခေါန်ဏောၚ်ဟီုတှ်ေ လှုဲညးဍုၚ်ကွာန်တံ သာအိုတ်ဏောၚ် “ သာ်ဝွံ သ္ဂးရ။
ကံၚ်ဇြဳပၞာန်ဂှ် ပ္ဍဲကဵုညးယိုက်ဝန်ပရေၚ်ထတ်ယုက် သွာၚ်ပုဂ္ဂလိက မကံက်အာအခေါန်သြန်လုပ်တံဂှ် အ္စာဂဥုဲ၊ အ္စာၝောံပြုပြေၚ်မၞိဟ်ယဲ၊ မၞိဟ်ကလိဂွံလဝ်လာၚ်ဇြေန်သလးဂဝ် နူကဵုကံၚ်ဇြဳဂဥုဲဍုၚ်ဗၟာ၊ ကံၚ်ဇြဳဆေၚ်စပ်ကဵုၚက်၊ ကံၚ်ဇြဳပြုပြေၚ်မၞိဟ်ယဲ ကေုာံ သလးဂဝ်တံ မပ္တိတ်ကဵုလဝ်လာၚ်ဇြေန်လွဳယဲ ကေုာံ စၟတ်တဲလွဳယဲတံကဵု ညးစိုန်သ္ကီုကွတ်နဲပညာတံ ပါလုပ်ရ။
အကံက်ခေါန်သြန်လုပ်ဏံဂှ် နူကဵုသ္ကိုပ်ဌာနက္ဍိုက်ပ်အကံက်ခေါန်ပွိုၚ်ဍုၚ် ကြဴနူသၞာံသြန်လုပ်အိုတ်တုဲမ္ဂး ပ္ဍဲအရာရေၚ်တၠုၚ်ပကောံပ္ကေဝ်အခေါန်တံဂှ် အခေါန်ဖလှာမဂွံနၚ် နူကဵုရုၚ်ဂဥုဲ၊ ဗ္ဒမ်ဂဥုဲ ကေုာံ ကမၠောန်ပရေၚ်ထတ်ယုက်တံဂှ် ဒးနုက်ကေတ် နူကဵုအခေါန်သြန်လုပ် မ္ဒးကဵုဂှ်ဏောၚ်ဂှ် ကံၚ်ဇြဳပၞာန် သ္ဂးလဝ်ရ။
ပရေၚ်ကံက်အခေါန်သြန်လုပ် ကံၚ်ဇြဳပၞာန်ဂှ် သ္ပတမ်ကဵု မိက်ဂွံစၟဳတ် သြန်လုပ်အ္စာဂဥုဲဂမၠိုၚ်ဂှ်ကီု၊ အပ္ဍဲဍုၚ် ဟိုတ်နူဂွံအခေါန် အောန်ဒၟံၚ်တုဲ ဂၠါဲဒၟံၚ်အခေါန် နူကဵုကဏ္ဍပရေၚ်ထတ်ယုက်ပုဂ္ဂလိကရောၚ်ဂှ် သ္ၚဳဂၠိပ်လဝ်ရ။
ပ္ဍဲဍုၚ်ဗၟာဂှ် နူကဵုကမၠောန်ပရေၚ်ထတ်ယုက်ပုဂ္ဂလိကဂှ် မၞိဟ်မၚ်မွဲကဵုဒၟံၚ်ပရေၚ်ထတ်ယုက်ဂှ် ဂၠိုၚ်ကဵုကိုဋ် နွံဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ဌာနဝန်ဇၞော်ပရေၚ်ထတ်ယုက် ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−Twitter
sanlontai