ပ္ဍဲညံၚ်လေဝ်ပေန် လွဟ်ဇၞော်ဒတုံစှ်ေတုဲ ကောန်အရာပ် ၄ တၠ ကလိဂွံဝပ်

ညံၚ်လေဝ်ပေန်၊ အဝ်ဂါတ် (၂၉)

ဟိုတ်နူဒပ်ကံၚ်ဇြဳပၞာန် ပန်ပှော်စုတ်လွဟ်ဇၞော် အပ္ဍဲခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ်တုဲ ညးဍုၚ်ကွာန်ကောန်အရာပ် ၄ တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်လ္ၚဵုတံလေဝ် ဇီုကပိုက်လီုလာ်အာလဝ်ရောၚ် KNU ဗဟဵု လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုအဝ်ဂါတ် ၂၅ အခိၚ်လဒေါဝ်တ္ၚဲ ၜိုတ် ၁၁ နာဍဳ နူကဵုတမ်ဒပ်ကံၚ်ဇြဳပၞာန် ခမရ (၄၃၉) ဖျေံသ္ဇိုၚ်ပွိုၚ်ဍုၚ်မုၚ်ဂှ် ပန်ပှော်စုတ်လဝ် လွဟ်ဇၞော် ၆ မတုဲ ဒးအာလဝ်သ္ၚိဒၟံၚ် ညးဒေသမၞုံကွာန်ၚါမျေတ်ချေန်တံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲကဵုတ္ၚဲဂှ် အခိၚ်နူဂယး ၜိုတ် ၉ နာဍဳဂှ်လေဝ် တမ်ဒပ်ကံၚ်ဇြဳပၞာန် ခလရ (၂၆၄) နူအပ္ဍဲပွိုၚ်ဍုၚ်ယှိုဲကျေန် KNU ဂှ် ဖျေံသ္ဇိုၚ် ပ္ဍဲ (ပိန်းဇလုပ်) တုဲ ပန်ပှော်စုတ်လဝ် လွဟ်ဇၞော် အပ္ဍဲကွာန်ချမ်အေန်ဂှ်ရ သ္ၚိဒၟံၚ်မွဲမ ဇီုကပိုက်လီုလာ်အာလဝ်တုဲ ပ္ဍဲကဵုပရေၚ်ဒတုံဗ္တိုဟ်ထ္ကးအာ ပ္ဍဲကွာန်ဝါန်ချိုၚ်ဂှ် အရာမဇီုကပိုက်လီုလာ်တံ နွံဟွံမွဲဂှ် ဂၠိုက်ဂၠါဲဒၟံၚ်ဖိုဟ်ရောၚ် KNU သ္ဂးရ။

သ္အာၚ်နူဂှ်ပၠန် ပ္ဍဲကဵုဂိတုအဝ်ဂါတ် (၂၆) အခိၚ်လဒေါဝ်တ္ၚဲ ၜိုတ် ၁ နာဍဳဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကဵုကွာန်ကျိုဝ်ကျဳ၊ တိဍာ်အုပ်ဓုပ် ပွိုၚ်ဍုၚ်ကျံက်ကျဳ KNU ဂှ်တုဲ ညးဒေသ ၄ တၠ ဇီုကပိုက်ကလိဂွံလဝ်ဝပ်တုဲ သ္ၚိ ၅ မ၊ တာဲအှော် ၁ မ၊ ဂအုံချံက် ၁ လီုလာ်လဝ်တုဲ ဂၠဴမွဲလေဝ် ဇီုကပိုက်ကလိဂွံအာလဝ်ဝပ်ကီုရ။

ပ္ဍဲကဵုတိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် စွံပွန်လ္တူညးဍုၚ်ကွာန်ကောန်အရာပ်တံတုဲ ဒပ်ကံၚ်ဇြဳပၞာန် ဟိုတ်နူဗ္တိုက်ပန်ပှော် နကဵုလွဟ်ဇၞော် ကေုာံ တရဴကျာတံဂှ်တုဲ ညးဍုၚ်ကွာန်ကောန်အရာပ်ဂမၠိုၚ် ဇီုကပိုက်ချိုတ် ကလိဂွံလဝ်ဝပ်တံ နွံဒၟံၚ်တုဲ ညးဍုၚ်ကွာန်ဒေသ ဂၠိုၚ်ကဵုဠက် ဒးဂြိပ်ဒဴပါဲဒလေတ်ဒၟံၚ်ရောၚ် KNU လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU