ပြဝကံၚ်ဇြဳပၞာန် ထဍေၚ်ပ္တိတ် ကလုတ်တမာန်တဳမဝ်ဂှ်ဝွံ ကၠောန်သ္ပလဝ်ဟၟဲကဵုသၞောဝ်ရောၚ် NUG ပါ်ပါဲ

လ္ဂုၚ်၊ အဝ်ဂါတ် (၂၉)

ပြဝကံၚ်ဇြဳပၞာန် ထဍေၚ်ပ္တိတ် ကလုတ်တမာန်တဳမဝ် သွက်ဂွံတိတ်အာ နူကဵုဍုၚ်ဗၟာဂှ်ဝွံ ဒှ်ပွဟၟဲကဵုသၞောဝ် အတိုၚ်ကၠောန်သ္ပဒၟံၚ်လၟိုန်တံရောၚ်ဂှ် အလဵုအသဳညဳသၟဟ်ဂကူ (NUG) လလောၚ်ပ္တိတ်လဝ် နကဵုစၟတ်တ္ၚဲ ဂိတုအဝ်ဂါတ် (၂၈) ရ။

အတိုၚ်တၚ်လလောၚ်တြး NUG ဂှ်မ္ဂး နကဵုဂကောံဟွံလုပ်သၞောဝ် မပလံၚ်ကေတ်လဝ်အဝဵုကၟိန်ဍုၚ် နကဵုလွဟ်လက်နက် နူကဵုဗွိုၚ်မ္ၚးသၞောဝ်ဂှ် အခေါၚ်သ္ဂုတ်သွာတ် လ္တူကိစ္စပရေၚ်ဆက်ဆောံကလုတ်တမာန်ဍုၚ်သ္အာၚ်တံ ဟွံမွဲပုဟ်ဂှ် သ္ဂးရ။

ကံၚ်ဇြဳပၞာန်ဝွံ နဒဒှ်ဒစဵုဒစး ကုကၟိန်ဍုၚ်တဳမဝ်လက်တဳ မကၠောန်သ္ပလဝ် ပရေၚ်ဆက်ဆောံ ကု NUG ဗွဲမသ္ကာတ်မြဟ်ဂှ်တုဲ ကုညးဒုၚ်တာလျိုၚ်ရုၚ်ကလုတ်ယာယဳ နူကဵုရုၚ်ကလုတ်တဳမဝ်ဗၟံက် မၞုံဍုၚ်လ္ဂုၚ်ဂှ် ကၠာဂွိုအ်စိုပ်ဂိတုသေပ်တေမ်ဗာ ၁ တေံ သွက်ဂွံတိတ်ကဵုဂှ် ဌာနဝန်ဇၞော်ကာဍုၚ်သ္အာၚ် ကဵုလဝ်ပရိုၚ်ရ။

အကြာကံၚ်ဇြဳပၞာန် ကဵုဒၟံၚ်သတိ ကုအလဵုအသဳတဳမဝ် ညံၚ်ဂွိုအ်ဆက်ဆောံကဵု NUG အဆက်က်ဂှ် ကၠောန်သ္ပဆက်ဆောံဒၟံၚ်ဂှ်ဝွံ မ္ၚးနူသ္ကဵုဇီုကပိုက်တဴ ပရေၚ်ဆက်ဆောံၜါဍုၚ်ဂှ် စိုပ်အာသဘဴ ကဵုဒၟံၚ်ဇြဟတ် ညံၚ်ပွပကီုပရာပ် NUG မကလိလောန်ဒၟံၚ် ဂွံဂၠိုၚ်ကၠုၚ်ဏောၚ်ဂှ် သ္ဂးရ။

နကဵုအလဵုအသဳတဳမဝ် ဒစဵုဒစးလ္တူပြဝကံၚ်ဇြဳပၞာန်သာ်ဏံတုဲ သွက်ဂွံရှ်ေသှ်ေ အခေါၚ်အရာမၞိဟ်သၟးဟွံက သွက်ဂွံသောၚ်ကလး အကြေပ်အဂြတ်လၟုဟ်တံ ဗွဲမၜိုဟ်လလမ်ဂှ် ဖ္တိုက်ဖ္အောဝ်လဝ် ဒပ်ပၞာန်ဗၟာတုဲ ဆက်ဒတူလိုၚ်အာ ကရောံညးဍုၚ်ကွာန်ဍုၚ်ဗၟာတံရောၚ်ဂှ် ပ္ဍဲဂိတုအဝ်ဂါတ် ၂၆ တေံ လလောၚ်ပ္တိတ်လဝ်ရ။

ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဥူနေဖုၚ်လာတ်ဂှ် တၚ်လလောၚ်တြး တဳမဝ်လက်တဳဂှ်ဝွံ ဒှ်အရာထ္ၜးတဴ ဒဒှ်ရဂၠံသြိုဟ်တုပ်ကဵု ညးဍုၚ်ကွာန်ဍုၚ်ဗၟာ မပၠန်ဂတးဒၟံၚ် သၞောတ်တၠအဝဵုပၞာန်တံဏောၚ်ဂှ် သ္ဂးရ။

“ဣဏံဂှ် နဒဒှ်အလဵုအသဳ မမံက်ဂတဝ်ကၠုၚ် နူကဵုပၠန်ဂတးမွဲဂှ် တုပ်တဴညံၚ်ရဴ ထ္ၜးတဴအကာဲအရာ ဒဒှ်ရဂၠံသြိုဟ်တုပ် ကုညးဍုၚ်ကွာန်ဍုၚ်ဗၟာ မပၠန်ဂတးဒၟံၚ် ကုတၠအဝဵုပၞာန်လၟုဟ်တံဂှ်ရ။ အဂှ်ေတှ်ေ နကဵုညးဍုၚ်ကွာန်ပိုယ်တံဂှ်လေဝ် ပိုယ်တံဒးစၟတ်သမ္တီလဝ် ပရူပရာဏံ ပ္ဍဲဂၠံသြိုဟ်ပိုယ်တုဲ မွဲတ္ၚဲ ပၠန်ဂတးတုဲဒှ်အာမ္ဂး ဍုၚ်ဗၟာကဵု ဍုၚ်တဳမဝ်လက်တဳတံဝွံ ကိစ္စပရေၚ်ပရူ ဍုၚ်ဇကုမွဲဓဝ်သၟးဟွံက အပ္ဍဲဒေသကီု၊ အလုံဂၠးတိမွဲကီု သွက်ဂွံဂွံသၞောဝ်ဗ္ၜတ် ဒဳမဝ်ကရေဇြဳ ကေုာံ အခေါၚ်အရာမၞိဟ်ပေၚ်ၚ်၊ ညံၚ်သၞောတ်တၠအဝဵုပၞာန်တံ ဂွိုအ်မံက်ဂတဝ်ကၠုၚ် သွက်ဂွံပံၚ်တောဲရေၚ်တၠုၚ်အာမွဲစွံဂှ် ပတှ်ေစှ်ေစိုတ်တုဲ စၟဳဒၟံၚ်ရောၚ်” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ဂကောံပၠန်ဂတးဒစဵုဒစး NUG ကီု သီုကဵု CRPH, PDF တံဂှ် လလောၚ်တြးလဝ် နဒဒှ်ဂကောံပကီုပရာပ်တုဲ ကံၚ်ဇြဳပၞာန် မသီလဝ်အဝဵု နူကဵုဒပ်ပၞာန်သ္ကိုပ်သ္ကဂှ်လေဝ် NUG လလောၚ်တြးလဝ် နဒဒှ်ရဲပလီုပလာ်ပကီုပရာပ်တံကီုရ။

ပ္ဍဲသ္ဘၚ်ယဵုဒုၚ်သစ္စာ ဂကောံအလဵုအသဳတၟိ ဍုၚ်တဳမဝ်လက်တဳ မရနုက်ကဵု ၉ ဝါ မကၠောန်ဗဒှ်လဝ် ပ္ဍဲဂိတုဂျူလာၚ် ၁ တေံဂှ် သွက်ဂွံတိုန်စိုပ် စၞးဍုၚ်ဗၟာဂှ် သမ္မတတဳမဝ် ဘိက်ကၠုၚ်လဝ် NUG ဗွဲမလုပ်သၞောဝ်ရ။

ပ္ဍဲကဵုသ္ဘၚ်ယဵုဒုၚ်သစ္စာ မကၠောန်ဗဒှ်လဝ် ပ္ဍဲကဵုနန်သမ္မတဂှ် ဝန်ဇၞော်ကာဍုၚ်သ္အာၚ် NUG ဒဝ်ဇြေန်မာအံၚ် ကဵု ညးစၞးNUG စပ်ကဵုဍုၚ်သမ္မတချိတ် ဥူလေန်တတံ တိုန်စိုပ်လဝ်ရ။

လ္တူကိစ္စဏံဂှ်လေဝ် နူကဵုကံၚ်ဇြဳပၞာန် ဒဒှ်ရဒစဵုဒစးဂှ် လလောၚ်တြးလဝ်တုဲ နူကော်ကဵုသတိ ကုညးဒုၚ်တာလျိုၚ်ရုၚ်ကလုတ်တဳမဝ် မၞုံဍုၚ်လ္ဂုၚ် ဒဵုကဵုနေဗျဳဒဝ်ဂှ် က္တဵုဒှ်ကၠုၚ် စဵုကဵုထပိုတ်ထောံအဆက် ကုအလဵုအသဳတဳမဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် နကဵုဍုၚ်တဳမဝ် မပ္တိတ်ဒၟံၚ်ဇြဟတ် သွက်ဂွံဒှ်ကောန်ဂကောံအာဇြဳယာန်ဂှ် ကံၚ်ဇြဳပၞာန်ထပိုတ်ထောံအဆက် သာ်ဏံဂှ်ဝွံ အကြာပရေၚ်ကလုတ်တမာန်တံဂှ် ဒှ်အာကိစ္စဇၞော်ဇၞော်ရောၚ် သ္ၚဳဂၠိပ်လဝ်ရ။

“အလဵုအသဳတဳမဝ် အခိၚ်လၟုဟ် ဟွံဒှ်ဂကောံအာဇြဳယာန်ပေၚ်ၚ်ဏီပုဟ်။ ၜိုတ်အကာဲအရာ ထံက်ဂလာန်ကဵုဒၟံၚ် သွက်ဂွံဒှ်ကောန်ဂကောံညိကီု။ အပ္ဍဲအကာဲအရာသာ်ဏံဂှ် ထပိုတ်ထောံအဆက် ကုအလဵုအသဳတဳမဝ်ဂှ်ဝွံ ဒဒှ်ရထ္မံက်ထ္ၜးဏာ အလဵုအသဳကံၚ်ဇြဳပၞာန် ဟွံသ္ပစၟတ်သမ္တီ ကုအလဵုအသဳ မစၟတ်သမ္တီလဝ် NUG ဂှ်ရ။ ညအ်ဂှ် ပ္ဍဲအရာပရေၚ်ကလုတ်တမာန်တံဂှ် ဒှ်ကိစ္စဇၞော်ကွေံကွေံဂှ်ရ ဒှ်ဟွံထေက်ပုဟ်ဂှ် နူကဵုဗွိုၚ်ကလုတ်တမာန်တံကဵု ညးဂၠးတံ ဘိုၚ်ဒစဵုဒစးဒၟံၚ်အိုတ်ရ။ ဟိုတ်ဂှ်ရ အခေါၚ်တဳမဝ်ဂွံလုပ် အာဇြဳယာန်ဂှ် ဆုတ်ကလေၚ်အာမာန်ရောၚ်ဟီုဂှ် ၜိုတ်ထေက်ကြိုက် ဒးမံၚ်ရ “ သာ်ဝွံ ညးသ္ဂးရ။

ဍုၚ်တဳမဝ်ဝွံ ပ္ဍဲသၞာံ ၂၀၁၁ တေံ ပ္တိုန်လဝ်စရၚ် သွက်ဂွံလုပ်စိုပ် နဒဒှ်ဍုၚ်လုပ်ဂကောံအာဇြဳယာန်ဂှ်တုဲ နကဵုအာဇြဳယာန် သွက်ဂွံဒုၚ်တဲ ဍုၚ်တဳမဝ် နဒဒှ်ကောန်ဂကောံဂှ် ပ္ဍဲသၞာံတုဲကၠုၚ်တေံ ပ္ဍဲကဵုကောံဓရီုကဆံၚ်လ္တူအာဇြဳယာန်ဂှ် တုပ်လဝ်စိုတ် နဒဒှ်မူတုဲ မဒှ်ရ။

ဆ္ဂး လုကဴအာဇြဳယာန် သောၚ်ကလးအကြေပ်အဂြတ်ဍုၚ်ဗၟာ ဗွဲမစိုပ်တရဴဟွံမာန်ဏီမ္ဂး နကဵုတဳမဝ် ပါလုပ်အာ နဒဒှ်ဍုၚ်အာဇြဳယာန်ဟွံသေၚ်ပုဟ်ဂှ် သ္ကိုပ်ဝန်ဇၞော် ဇြာနာနာဂါသ်မဝ် (Xanana Gusmao ) ဟီုပ္တိတ်လဝ် ပ္ဍဲဂိတုအဝ်ဂါတ် ၃ တေံရ။

ပရိုၚ်−သြၚ်လောန်တိုၚ်(မ်)

ဗီု−Twitter