ယဝ်ရဍုၚ်ပလိုတ်တံ ရီုဗၚ်မ္ဂး အပ္ဍဲအခိၚ်ကာလပေါဲပၞာန်ဏံရဂှ် ဒဒှ်ရကၠောန်ဗဒှ်ပေါဲရုဲမာဲမာန်ဂှ် သမ္မတယူကရုၚ် ဟီု

ကျေပ်၊ အဝ်ဂါတ် (၂၉)

နဒဒှ်မိတ်ယူကရုၚ်ဂမၠိုၚ် ပါ်ပရအ်ခရိတ်အရပ်စပ်တံဂှ်တုဲ အမာတ်ပါလဳမာန်တံ သ္ပဒတန်တုဲ ယဝ်ရဇၟာပ်မၞိဟ် အခေါၚ်ကဵုမာဲနွံမ္ဂး ပရေၚ်ကဵုမာဲဂှ် ဒဒှ်ရကၠောန်ဗဒှ် အပ္ဍဲအခိၚ်ပေါဲပၞာန်ဏံမာန်ဂှ် သမ္မတယူကရုၚ် ဇြဳလာန်သကဳ ဟီုဂးလဝ်ရ။

နဒဒှ်ခၠေဝ်သှ် ကုတၚ်အာတ်မိက် အမာတ်ကၠတ်ထဝ်လ္တူ အမေရိကာန်မွဲတၠ သွက်ဂွံလလောၚ်တြး ပေါဲရုဲမာဲယူကရုၚ် သၞာံ ၂၀၂၄ ဂှ်တုဲ သမ္မတဇြဳလာန်သကဳ ဟီုဂးလဝ် ပ္ဍဲဂိတုအဝ်ဂါတ် (၂၈) တေံရ။

ဗွဲဓမ္မတာ ကၠာဂွိုအ်စိုပ်ပေါဲရုဲသမ္မတ မကၠောန်ဗဒှ်အာ ပ္ဍဲဂိတုမာတ်ချ် သၞာံ ၂၀၂၄ တေံဏီ ပ္ဍဲဂိတုအံက်တဝ်ဗာ မဒှ်စၟတ်တ္ၚဲကၠောန်ဗဒှ်ဒၟံၚ် သွက်ပေါဲရုဲမာဲပါလဳမာန်ဂှ် ပပဵုပ္တိုန်လဝ်အာယုက်ပေါဲရုဲမာဲ ၉၀ တ္ၚဲ မွဲဝါရ။ ဆ္ဂး ဒၟါနူသၞောဝ်ကာတၟေၚ်တုဲ ကၠောန်ဗဒှ်ဟွံမာန်ဏီ ဒှ်ဒၟံၚ်ရ။

ပ္ဍဲအရာခၠေဝ်ပလန် ကုပရေၚ်ဂၠါဲသၞ သမ္မတရုယှာ ဗလာဒဳမာပူတေန်ဂှ် ဂရေဟာမ် အမာတ်ကၠတ်ထဝ်လ္တူ မပ္တိုန်လဝ်ဂုဏ်စရာဲ ကုဍုၚ်ကျေပ်ဂှ် ပ္ဍဲဂိတုအဝ်ဂါတ် ၂၃ ဂှ် ကၠုၚ်စိုပ်ဂေတ်ဝေၚ်လဝ် ဍုၚ်ဇၞော်ဂှ်တုဲ ကၟိန်ဍုၚ်ဝွံ ပွမကၠောန်ဗဒှ်ပေါဲရုဲမာဲ အပ္ဍဲအခိၚ်ပၞာန်ဂှ်ဟေၚ် ဒဒှ်ရတၞဟ်ခြာဂှ် နွံပၟိက်သ္ဒးထ္ၜးပျးရောၚ် ဟီုဂးလဝ်ရ။

ဇြဳလာန်သကဳဂှ် ပ္ဍဲကဵုကဏ္ဍသၟာန်သွဟ် နူကဵုအစဳဇန်ဗလးရုပ်ရမျာၚ် နူကဵုချာန်နေဝ် 1+1 မွဲဂှ် နကဵုညး ဒဒှ်ရသဳကၠဳလဝ် ပရူပရာနွံပၟိက် သွက်ဂွံပြံၚ်လှာဲသၞောဝ် ကေုာံ တၚ်သၟာန်စပ်ကဵုသြန်ဗွဝ် ကုဂရေဟာမ်ဂှ် ဟီုဂးလဝ်ရ။

“’အဲ ကဵုလဝ်သွဟ်တပ်ပ်မွဲရ၊ လုကဴအမာတ်ကၠတ်ထဝ်တံ ဆန္ဒမၞုံ မိက်ဂွံကၠောန်မ္ဂး ညအ်ဂှ် ညးဒးဂၞပ်မံၚ်ရ” သာ်ဝွံ ဇြဳလာန်သကဳ ဟီုဂးလဝ်ရ။

သွက်ဂွံကၠောန်ဗဒှ် ပေါဲရုဲမာဲ ပ္ဍဲအခိၚ်ကာလ မၜိုဟ်သြိုဟ်ဒၟံၚ်ဂှ် အိုတ်အာလဝ် ဒဝ်ဠာ (၁၃၅) ပြကောဋိကိုဋ်ရောၚ် ညးသ္ဂးရ။

“ပ္ဍဲအခိၚ်ပေါဲပၞာန်ဏံဂှ် နွံပၟိက်ဂလိုၚ်လဵုရောဟီုဂှ် ဟွံတီပုဟ်၊ ဟိုတ်ဂှ်ရ ယဝ်ရယူအေသ် ကေုာံ ယူရောပ်တံ ထံက်ပၚ်ကဵုသြန်မ္ဂး ဒှ်မာန်ဏောၚ် ဟီုလဝ် ကုညးရ” သာ်ဝွံ ဆက်ဟီုလဝ်ရ။

ကေတ်လှုဲ နူကဵုလွဟ်လက်နက်တံတုဲ ကၠောန်အာပေါဲရုဲမာဲဟွံသေၚ်ပုဟ်၊ ဣဏံဂှ် စၞောန်ပျးလဝ် ပ္ဍဲသၞောဝ်ဏောၚ်ဂှ်လေဝ် ဟီုဂးလဝ်ဏီရ။

ဒးဗလးဏာ ညးမၚ်လ္ၚတ်ပေါဲရုဲမာဲတံ ပ္ဍဲကဵုဂဒုက်ပၞာန် တဝ်စၞေဟ်သၞတံဏောၚ် ဒဒှ်ရဟီုလဝ်ကဵု ကုဂရေဟာမ်ဂှ် ထ္မံက်ထ္ၜးလဝ် ပ္ဍဲချာန်နေဝ်ဂှ်ရ။

ဂရေဟာမ် မဒှ်ရဳပါပလေတ်ကာန်ဂှ် “အဲ ဒးဟီုကဵုညးဂှ် သီုၜါဂှ် ဒးကၠောန်မွဲတဲဓဝ်ဏောၚ်။ သၞာံဂတဏံ ပ္ဍဲယူကရုၚ် နွံပၟိက်ဒၟံၚ် ပေါဲရုဲမာဲမွဲဏောၚ်။ ၜိုန်ရပရေၚ်ဗ္တိုက်တံ နွံဒၟံၚ်ကီုလေဝ် ပ္ဍဲဍုၚ်ဏံ ပေါဲရုဲမာဲဗၠးၜးဗဗွဲဓဝ် ညံၚ်ဂွံနွံဂှ် မိက်ဂွံညာတ်တဴရ” သာ်ဝွံ သ္ဂးလဝ်ရ။

Ref: Reuters