ညံၚ်ဒပ်ပၞာန်ဗၠးၜးကောန်ဂကူမန် ဂွံတန်ကြန်ခိုၚ်ဗိုန်အာ ဘိုၚ်ထိၚ်ဒဝ်မၚ်မွဲထိၚ်ဒဝ်ညိ နာဲဟံသာဗတိုက်ဖ္အောဝ်

ရေဝ်၊ အဝ်ဂါတ်(၃၀)

သွက်ဒပ်ပၞာန်ဗၠးၜးကောန်ဂကူမန် (MNLA) သၟဝ်တဲဗော်ဍုၚ်မန်တၟိ ဂွံတန်တဴအာဍာ်ဇမၠိၚ်မာန် အလုံကောန်ဂကူမန် သွက်ဂွံရေၚ်တၠုၚ်ဘိုၚ်ထိၚ်ဒဝ်မၚ်မွဲအာညးသ္ကအ်ဂှ် ဥက္ကဋ္ဌဗော်ဍုၚ်မန်တၟိ နာဲဟံသာ ဟီုဗတိုက်ဖ္အောဝ်လဝ်ရ။

ဓမံက်ထ္ၜးလဝ် ပ္ဍဲလိက်သဝဏ်နာဲဟံသာ ပလံၚ်ဗစိုပ်လဝ် သွက်တ္ၚဲဒက်ပ္တန်ဒပ်ပၞာန်ဗၠးၜးကောန်ဂကူမန် (MNLA) မဒှ်ဂကောံရပ်လွဟ်ကောန်ဍုၚ်အရၚ်မန် ဝှ်ကြံၚ်မွဲဂကောံ ပေၚ် (၅၂) သၞာံ မကၠုၚ်စိုပ် ပ္ဍဲဂိတုအဝ်ဂါတ် စၟတ်တ္ၚဲ (၂၉)ဂှ်ရ။

နာဲဟံသာဂှ် “အဝဵုပရေၚ်ဍုၚ်ကွာန်ဂှ် တိတ်ကၠုၚ်နူပၠံၚ်လွဟ်(သေနာတ်)ရောၚ်”ဟီုဂှ် ဂလာန်ဏံ ဒးဂိုၚ်သမ္တီလဝ်တုဲ အခါဒပ်ပၞာန်မန်တအ်ဟၟဲတေံဂှ် အာတ်မိက်လဝ် သွက်အခေါၚ်အရာဂကူမန် မုလေဝ်ဟွံဂွံရဂှ် ဟီုသ္ဂးလဝ်ရ။

မန်ကဵုဗၟာတုပ်ပ်ရဂးတုဲ ဒးဒုၚ်ပါဲတးလဝ်တုဲ အခိၚ်ဒပ်ပၞာန်ပိုဲမံက်တိတ်ကၠုၚ်ဟေၚ် ဂွံက္လိဂွံကၠုၚ် အခေါၚ်အရာကောန်ဂကူဇကု ညိညဇြိုၚ်သာတုဲ အခိၚ်ဇြဟတ်ဒပ်ဇၞော် ဇြဟတ်လွဟ်ပေၚ်ကၠုၚ်ဂှ် နကဵုဒပ်ပံၚ်ကောံ ပရေၚ်ဓမံက်ပေါဲဗတိုက်စိုပ်ကၠုၚ်တရဴဂှ်ဟေၚ်မှ တွဵုရးဍုၚ်မန် ဂွံမံက်တိတ်ကၠုၚ်ရဂှ် ညးဟီုလဝ်ရ။

သ္အာၚ်နူဂှ်ပၠန် ကောန်ဂကူမန်ပိုဲဂှ် အာရီုဇၞော်ဒၟံၚ် သွက်ဂွံကၠောန်ပရေၚ်ပိုန်ဒြပ်သၟးဟေၚ်ဂၠိုၚ်တုဲ တိဍာ်အာဲကၟာဲ ပရေၚ်ပိုၚ်ပြဳဇကုဇကုတအ်ဂှ် ဒးဆောံလေၚ်လဝ်ဗွဲမဂၠိုၚ်ဂှ်လေဝ် ပိုဲဒးကလေၚ်သ္ၚဳဂၠိပ် စွံသတိဂှ်လေဝ် နာဲဟံသာ ဗတိုက်ဖ္အောဝ်လဝ်ရ။

ဟိုတ်ဂှ်ရ ဒပ်ပၞာန်ဗၠးၜးကောန်ဂကူမန်ပိုဲ ( MNLA )ဂှ် ထေက်ကဵုဒးဘိုၚ်ရီုဗၚ်ကဵုဇြဟတ်ထေက်တုဲ တြုံ၊ ဗြဴဟွံရုဲ သွက်ဂွံလုပ်ယိုက်ဂၠေၚ် ကေတ်တာလျိုၚ်ဂကူ ပ္ဍဲဒပ်ကောန်ဂကူဇကု နကဵုအပိုၚ်ခြာကာလဂှ်လေဝ် ဆဝ်ပ္ၚုဟ်လဝ် ပ္ဍဲလိက်သဝဏ်ဂှ်ရ။

ဗော်ဍုၚ်မန်တၟိဂှ် ပ္ဍဲအရာသောၚ်ကလးပြဒ္ဒညာပရေၚ်ဍုၚ်ကွာန်ဂှ် ဂိုၚ်ရပ်လဝ်မူဆဵုဂဗသဳကၠဳဖိုဟ်ရဂှ် ဟီုလဝ်ဗွဲမလုပ်သၞောဝ်တုဲ ပ္ဍဲလိက်သဝဏ်နာဲဟံသာဂှ် ပရေၚ်ပၠန်ဂတးက္တဵုဒှ်ကၠုၚ် ဟိုတ်နူပရေၚ်သီအဝဵုဂှ်မ္ဂး ဟီုဂးလဝ် ဟွံဂွံညာတ်ကေတ်ရ။

ပ္ဍဲသက္ကရာဇ် ၁၉၇၀ ဂှ် ဗော်ဍုၚ်မန်တၟိကီု KNU ကေုာံ ဗော်ပါလဳမာန်ဒဳမဝ်ကရေဇြဳ သ္ကိုပ်ဝန်ဇၞော်တြေံဥနုတအ် ပံၚ်တောဲတုဲ ဒက်ပ္တန်ကၠုၚ်လဝ် ဒပ်ဗၠးၜးကောန်ဂကူကောန်ဍုၚ်အရၚ် ကေုာံဒပ်ပံၚ်ကောံပရေၚ်ဗၠးၜး(တိုင်းရင်းသားလူမျိုးပေါင်းစုံလွတ်လပ်ရေးနဲ့ လွတ်မြောက်ရေးတပ်ပေါင်းစု)(တညလ)ရ။

ကြဴနူဂှ် ဇြဟတ်ကောန်ဒပ် လုပ်စိုပ်ကၠုၚ် ပ္ဍဲဗော်ဍုၚ်မန်တၟိ ဇြဟတ်ခိုဟ်တိုန်ကၠုၚ်တုဲ ပ္ဍဲဂိတုအဝ်ဂါတ် စၟတ်တ္ၚဲ ၂၉ သၞာံ ၁၉၇၁ ဂှ် ဒက်ပ္တန်ကၠုၚ်လဝ် ဒပ်ပၞာန်ဗၠးၜးကောန်ဂကူမန် (MNLA)ရ။

ပ္ဍဲကဵုလက်ထက်အလဵုအသဳ ဒဝ်အံၚ်သာန်သုကျဳက္ဍိုက်လဝ်က္ဍိုပ်ဂှ် ဗော်ဍုၚ်မန်တၟိ ဒှ်ကၠုၚ် ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ လိက်ကသုက်ဒေါံပန်ပှော်အလုံကၟိန်ဍုၚ် (NCA)မွဲဂကောံရ။

ကြဴနူဒပ်ပၞာန် ဂအုပ်သ္ကိုပ်ဗိုလ်ဇၞော် မေန်အံၚ်လှာၚ်က္လေၚ်ထပ်သီကေတ်အဝဵုကၟိန်ဍုၚ် မွဲအလန်ပၠန် သ္ကုတ်လကြဴဏံ ကဝ်မတဳပ္ညဳပ္ညပ်ပရေၚ်ၜိုဟ်လလံကံၚ်ဇြဳပၞာန် (NSPNC) ကေုာံ ဗော်ဍုၚ်မန်တၟိတအ် ဆဵုဂဗသဳကၠဳလဝ် ပ္ဍဲနေပျဳဒဝ် ဟွံအောန်နူ ၆ ဝါရ။

ပရိုၚ် – သြၚ်လောန်တိုၚ်(မ်)

ဗီုရုပ် – NMSP