နဒဒှ်စၟတ်သမ္တီတ္ၚဲပၠန်ဂတးမန် ဒပ်မဟာမိတ်တအ် ဗတိုက်ပန် ဌာန်ဂအုပ်ဒပ်ပၞာန် ပ္ဍဲဍုၚ်ရေဝ်

ရေဝ်၊ အဝ်ဂါတ်(၃၀)

ဌာန်ဂအုပ်ဌာနကောပ်ကာဲချဳဒရာၚ်ပၞာန် ကံၚ်ဇြဳပၞာန် စၟတ် (၁၉) စကခ -၁၉ ကေုာံ ခရလ -၆၁ ဖျေံသ္ဇိုၚ်ပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် တ္ၚဲဏံအခိၚ်နူဂယး အကြာၜိုတ် (၁၁)နာဍဳဂှ် ဂြာတ်ထောံဖျေံလဝ်ဗုမ် နက္ၜၚ်ကျာမသက္ကုမၞိဟ်ဒဳ အဇာဍောတ် SF-Z ရဂှ် ဂကောံဇြဟတ်ပၠန်ဂတးတအ် လလောၚ်တြးလဝ်ရ။

ကြဴနူဂြာတ်ထောံဖျေံဗုမ်တုဲဂှ် နူလ္ပာ်ကံၚ်ဇြဳပၞာန် ၜိုန်ရက္လေၚ်ပန်ပှော်လဝ်လွဟ်ဇၞော် (၈၁) မမ၊ (၁၂၀)မမ ဟွံအောန်နူ (၈)ဝါကီုလေဝ် ဒပ်ပံၚ်ကောံမဟာမိတ်တအ် ဆုတ်က္လေၚ်တိတ်လဝ် သီုဘဲအန္တရာယ်ဟၟဲမွဲသာ်မာန်လဝ်တုဲ ဃောလ္ၚတ်ဂၠိုက်ဂၠာဲဒၟံၚ် ပရေၚ်ဒပ်ပၞာန်ဇီုကပိုက်ဒးချိုတ်လဝ်ရဂှ် ဟီုလဝ်ရ။

ပ္ဍဲပရေၚ်ချဳဒရာၚ်ပၞာန်ဏံ အကြာဥတုရာသဳသ္ကာတ်မြဟ်ဒၟံၚ်ဂှ် ဒးပ္တိတ်ဇြဟတ်ကၠောန်ရေၚ်တၠုၚ်လဝ်တုဲ ဟိုတ်နူဘဲဒဏ်ဥတုရာသဳတုဲ လ္ပာ်ဂကောံဇြဟတ်ပၠန်ဂတးတအ် က္ၜၚ်ကျာ SF-Z မွဲဖ္ဍိုက် ဒးလီုလာ်ဆောံလေၚ်လဝ်ရဂှ် ဓမံက်ထ္ၜးလဝ်ရ။

ပရေၚ်ချဳဒရာၚ်ပၞာန်ဏံဂှ် နဒဒှ်ဒုၚ်တၠုၚ်ပ္တိုန်ဂုဏ်စရာဲ တ္ၚဲပၠန်ဂတးမန် မရနုက်ကဵု (၇၆)ဝါတုဲ ဂကောံဇြဟတ်မဟာမိတ်ပၠန်ဂတး ဖျေံသ္ဇိုၚ်တွဵုရးဍုၚ်မန်ကေုာံ ရးတၞၚ်သြဳတအ် ပံၚ်တောဲကၠောန်ရေၚ်တၠုၚ်လဝ်ရ။

ပ္ဍဲဂကောံဇြဟတ်မဟာမိတ်တအ်ဂှ် ဒပ်ပၠန်ဂတးဍုၚ်မန် MSRF၊ ဒပ်ပၞာန်ကျာ ရေဝ် YAF ၊ ဒပ်စဵုဒၞာဍုၚ်ရေဝ် YDF၊ တံဒပ်ခရိုၚ်ထဝါဲ စၟတ် (၂) (T-5)၊ ကရောၚ်ပၞာန်ဒဝ်န ကေုာံ ဒပ်စဵုဒၞာညးဍုၚ်ကွာန်ကာန်ပေါက် KBDF တအ်ပါလုပ်လဝ်ရ။

သ္အာၚ်နူဂှ်ပၠန် ပရေၚ်ချဳဒရာၚ်ပၞာန်ဏံဂှ် ဂကောံဒပ်ပၠန်ဂတးဖျေံသ္ဇိုၚ်တွဵုရးဍုၚ်မန် MSRO၊ ဒပ်စဵုဒၞာဍုၚ်ရေဝ် YDF ကေုာံ ဒပ်ပၞာန်ဒဳမဝ်ကရေတ်တေတ်ကွးဘာဆေၚ်ရာကဵုကၟိန်ဍုၚ်ဗၟာ ABSD (တံဒပ်-၁)၊ ဒပ်ပၞာန်ဗၠးၜးညးဍုၚ်ကွာန်ထဝါဲ (TPLF)တအ်လေဝ် ပါလုပ်ရေၚ်တၠုၚ်လဝ်ရ။

ပရိုၚ် – သြၚ်လောန်တိုၚ်(မ်)

Photo – MSRF