ဗဒိုပ်ဒပ်ပုၚ်နေဝ်တဝ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်သဓီု ဒးဒုၚ်ဗတိုက်လဝ်

သဓီု၊ အဝ်ဂါတ် (၃၀)

တွဵုရးဍုၚ်မန်၊ ပွိုၚ်ဍုၚ်သဓီု၊ ဗဒိုပ်ဒပ်ကံၚ်ဇြဳပၞာန်ဖျေံသ္ဇိုၚ် ပ္ဍဲကွာန်ပုၚ်နေဝ်တဝ်ဂှ် ဟိုတ်နူဒးဒုၚ်ဗတိုက်လဝ်ကဵုဒရုမ် ၜါအလန်တုဲ ကောန်ဒပ်ကံၚ်ဇြဳပၞာန်တအ် ဇီုကပိုက်ဒးချိုတ်လဝ် နွံဒၟံၚ်ရဂှ် ဂွံတီကေတ်နူဒပ်ပံၚ်ကောံ ဂကောံဇြဟတ်ပၠန်ဂတးတအ်ရ။

ဗဒိုပ်ဒပ်ပုၚ်နေဝ်တဝ်ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ်စၟတ်တ္ၚဲ (၂၈) အခိၚ်နူဂယးဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် ထောံဖျေံလဝ်ဗုမ်ကဵုဒရုမ် (၉)မတုဲ ဗတိုက်လဝ်ရ။

ပ္ဍဲပရေၚ်ထောံဖျေံဗုမ် ဗတိုက်ပန်လဝ်ဏံ ဟိုတ်နူမဗုမ် ဒတုံစှ်ေပါ်ခတိုဟ်လဝ် ပ္ဍဲကၚ်ဗဟဵု မၞုံဗဒိုပ်ဒပ်ပုၚ်နေဝ်တဝ်၊ ဗ္ဒမ်သ္ၚိသၞာဲဒဴကောန်ဒပ်တအ် မံၚ်ဒၟံၚ်ဂှ်တုဲ ပါ်ခတိုဟ်လဝ်ဂှ်ရ စမြိုၚ်လ္ၚဵု ဇီုကပိုက်လီုလာ်အာလဝ်ရ။

ဟိုတ်နူဒးဒုၚ်ဗတိုက်လဝ်ကဵုဒရုမ်တုဲ ကောန်ဒပ်ကံၚ်ဇြဳပၞာန် ဗ္ဒာဲ (၅)တၠ ဇီုကပိုက်ဒးချိုတ်လဝ်နွံရဂှ် ၜိုန်ဂွံမိက်ကေတ်လဝ်ကီုလေဝ် ဆက်လ္ၚတ်ဂၠိုက်ဂၠာဲဒၟံၚ် အကာဲအရာဗလးမုက်တိရဂှ် ညးတာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကြဴနူဒးဒုၚ်ဗတိုက်လဝ်ကဵုဒရုမ်တုဲ နူလ္ပာ်ကံၚ်ဇြဳပၞာန် ၜိုန်ရက္လေၚ်ပန်ပှော်နၚ်လဝ် လွဟ်ဇၞော်ဍောတ်ကီုလေဝ် ပရေၚ်ဇီုကပိုက်ဒး လ္ပာ်ဒပ်ပံၚ်ကောံတအ် ဟၟဲမွဲသာ်တုဲ ဆုတ်က္လေၚ်တိတ်ကၠုၚ်မာန်လဝ်ရဂှ် ဟီုလဝ်ရ။

ဗဒိုပ်ဒပ်ပုၚ်နေဝ်တဝ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်ညးဍုၚ်ကွာန်တအ် မံၚ်တန်တဴဒၟံၚ် ခြာဟွံလအ်ဟွံလအ်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒပ်ပံၚ်ကောံ KNLA တအ် အာစိုပ်ဗတိုက်လဝ် ဟွံအောန်နူ (၈)အလန်နွံရ။

ဗဒိုပ်ဒပ်ပုၚ်နေဝ်တဝ် ဒးဒုၚ်ဗတိုက်လဝ်ဂှ် ယဝ်ရဒပ်ပံၚ်ကောံ KNLA တအ် ကၠုၚ်ပန်ပှော်ဒပ်ဍေံတအ်မ္ဂး စံၚ်ပလီုထောံကွာန်ဏောၚ်ဂှ် ပ္ဍဲသၞာံတုဲကၠုၚ်တေံမံက်ဂှ် ကော်ဘပဠလဝ် သ္ကိုပ်အုပ်ဓုပ်ကွာန်တအ်ရဂှ် ဂွံတီကေတ် အတိုၚ်လဟီုညးဒေသတအ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -KNU