ပံၚ် – အဝ်ဂါတ် (၃၀)
တွဵုရးဍုၚ်မန်၊ ပွိုၚ်ဍုၚ်ပံၚ် ပ္ဍဲဂၠံၚ်ကွဳစက် လဂုၚ်-မတ်မလီု ဗ္ဒာဲသၠာတ်မခၞံကျာ ကွာန်ယေန်ညုၚ်မျောက်ဂှ် သ္ကိုပ်အုပ်ဓုပ် ကွာန်ခလံက်ခပြု ဒးဒုၚ်ပန်လဝ်တုဲ ဒးလဝ်ဘဲဝပ် ဒးဒှ်ဓဝိၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုအဝ်ဂါတ် တုဲကၠုၚ် စၟတ်တ္ၚဲ (၂၈) အခိၚ်ဇိုၚ်သဝ်တ္ၚဲဂှ် သ္ကိုပ်အုပ်ဓုပ်ကွာန်ခလံက်ခပြု မၞုံယၟုနိုၚ်ၚိုဲထောန်ဂှ် နူသ္ၚိဒၟံၚ်ညး ဃောအာလ္ပာ်ကွာန်ယေန်ညုၚ်မျောက် နကဵုကွဳလိုန်ဓာတ်ဂှ် ဒးဒုၚ်ပန်လဝ်ကြပ်ပ်ရ။
“ဗက်ပန်လဝ်ကဵု ကွဳလိုန်ဓာတ်ရဂှ် ဂွံမိၚ်လဝ်ရ။ ညးဂှ် ဒှ်ကၠုၚ်သ္ကိုပ်အုပ်ဓုပ်ကွာန် ဟွံလအ်ဏီပုဟ်”ဂှ် ညးဒေသမွဲတၠဂှ် ဟီုရ။
ဟိုတ်နူသၟာလွဟ်တအ် ပန်ပှော်စုတ်လဝ်တုဲ ပ္ဍဲသ္ကိုပ်အုပ်ဓုပ်ဂှ် မကမ်ကၠိုဟ်လုပ် ဒးလဝ်ဘဲဝပ်ပ္ဍဲဗုၚ် သီုပ္ဍဲဒဳတုဲ ဒးဆေၚ်ဒၟံၚ်မုက်ကဵု အကာဲအရာဒးဒှ်ဓဝိၚ်ရဂှ် ညးဟီုလဝ်ဏီရ။
သ္ကိုပ်အုပ်ဓုပ်ဒးလဝ်ဘဲဝပ် ဒးဒှ်ဓဝိၚ်ဂှ်မ္ဂး ဂကောံရီုဗၚ်ဟံၚ်ပြာ်ပရေၚ်မၞိဟ်ဒေသဂှ် ပလံၚ်ဗစိုပ်ပ္တိုန်လဝ် ပ္ဍဲရုၚ်ဂဥုဲပွိုၚ်တိုက်ယေန်ညုၚ်တုဲ နူဂှ်မွဲကဆံၚ်ပြံၚ်စၠောံလဝ် ရုၚ်ဂဥုဲပွိုၚ်ဍုၚ်ပံၚ်ရဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲဂိတုမေ စၟတ်တ္ၚဲ (၂၆)တုဲကၠုၚ်တေံလေဝ် သ္ကိုပ်အုပ်ဓုပ်ကွာန်အေန်ဗျောၚ် ဒၟံၚ်ကွာန်တခေါန်ဒေၚ် ပွိုၚ်ဍုၚ်ပံၚ် မၞုံယၟုဥူသိုဝ်မိဂှ် ဟိုတ်နူသၟာလွဟ်တအ် လုပ်စိုပ်ပန်ပှော်လဝ် ပ္ဍဲသ္ၚိဒၟံၚ်ညး ဒးလဝ်ဘဲလွဟ်တုဲမကမ်တုဲ ဒးချိုတ်လဝ်ဏီရ။
ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ ပ္ဍဲဒၞာဲဒပ်ပၞာန်ဖျေံလဝ်ဗဒိုပ် ဗဒိုပ်ဗၠာဲသၟိၚ်၊ ရုၚ်အုပ်ဓုပ်နာနာ ကေုာံ ရုၚ်အရာပ်ကွာန် ပ္ဍဲပွိုၚ်ဍုၚ် မၞုံတွဵုရးဍုၚ်မန် ပၞာန်ဒစဵုဒစးပၠန်ဂတးရပ်လွဟ် ဇြဟတ်ခိုဟ်ဒၟံၚ်လ္ၚဵုတအ်ဂှ် ဂကောံဇြဟတ်ပၠန်ဂတးတအ် ကၠောန်သ္ပကၠုၚ်ဒၟံၚ် ပရေၚ်ဗတိုက်ပန်ပှော် ခြာဟွံလအ်ဟွံလအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai