ပ္ဍဲပေါဲဗ္တိုက်ရေဝ်ဂှ် လ္ပာ်ကံၚ်ဇြဳပၞာန် ချိုတ်အာ (၇) တၠရောၚ် ဂကောံဒပ်ပံၚ်ကောံတံ ဟီု

ရေဝ်၊ အဝ်ဂါတ် (၃၀)

အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်ကၞေၚ်တၟအ်ကဵု ကွာန်(သံကတိုက်) ပွိုၚ်ဍုၚ်ရေဝ် တွဵုရးဍုၚ်မန်ဂှ် လ္ပာ်ကံၚ်ဇြဳပၞာန် ၇ တၠ ချိုတ်တုဲ ၈ တၠ ကလိဂွံလဝ်ဝပ်ရောၚ် ပ္ဍဲဂိတုအဝ်ဂါတ် ၂၉ တေံ နူကဵုဒေသပၞာန်ပါ် စၟတ် (၃) ရးသ္ကုတ်သၠုၚ်ကျာဂှ် လလောၚ်ပ္တိတ်လဝ်ရ။

ပ္ဍဲဂိတုအဝ်ဂါတ် ၂၉ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် ဒပ်ကံၚ်ဇြဳပၞာန် ဇြဟတ်ဒပ် ဗ္ဒါဲ ၁၅၀ ပြၚ် ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ အကြာဒပ်ပၞာန်ဗၠးၜးကောန်ဂကူကရေၚ် KNLA ၊ ကရောၚ်ပၞာန်ပံၚ်တောဲကၠဗုတံ က္တဵုဒှ်လဝ်ပေါဲဗ္တိုက်ဆေၚ်မုက်ရ။

အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲပွိုၚ် ၄၅ မိနေတ်ဂှ် နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ် ဘိုၚ်ပန်ကဵုလဝ် လွဟ်ဇၞော် ဟွံပိုတ်သ္ကုတ်ရောၚ် သာ်ဝွံ ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ဂကောံဒပ်ပံၚ်ကောံ KNLA ဂှ် ကောန်သ္ဂံၚ်မွဲတၠ ကလိဂွံအာဝပ် ဟွံဒးဂွိၚ်ဂှ် ကဵုလဝ်သမ္တီတုဲ အကာဲအရာပေါဲဗ္တိုက်ဗွဲကြဴဏံဂှ် လလောၚ်ပ္တိတ်လဝ် ဟွံမွဲဏီရ။

စပ်ကဵုလၟေၚ်ဒဒှ်ပေါဲဗ္တိုက်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဒေသပၞာန်ပါ် စၟတ် (၃) သ္ကုတ်သၠုၚ်ကျာတံဂှ်ကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီရ။

ဟိုတ်နူပေါဲဗ္တိုက်ဏံတုဲ ညးဒေသနူကဵုကွာန်(သံကတိုက်) ၊ ပုၚ်နေဝ်ကုန်၊ အံၚ်သာယာ၊ ကၞေၚ်ကၟအ်၊ ဝါပသဲ၊ ဘဲလဗုတံ ဗ္ဒါဲ ၁၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။

အပ္ဍဲကဵုပေါဲဗ္တိုက်ၜါလ္ပာ်ဂှ် ညးဒေသ နူကဵုကွာန် (သံကတိုက်) မွဲတၠ ချိုတ်တုဲ မွဲတၠ ကလိဂွံလဝ်ဝပ်ရောၚ် ဂွံတီကေတ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာမာန်ဟွံမွဲဏီရ။

ပ္ဍဲကဵုပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်တံ က္တဵုဒှ်ဒၟံၚ်မွဲဏှမွဲဏှတုဲ ဒပ်ပံၚ်ကောံပၠန်ဂတးတံလေဝ် သွက်ဂွံထိၚ်ဒဝ်တိဍာ်မာန်ဂှ်တုဲ လ္တူဂၠံၚ်ကာမတ်မလီု−ထဝါဲတံဂှ် ကၠောန်သ္ပဒၟံၚ်ပရေၚ်စၟဳတ်ဂၠိုက်ဂၠါဲတံအိုတ်ရ။

ပရိုၚ်−သြၚ်လောန်တိုၚ်(မ်)

ဗီု−ဒေသပၞာန်ပါ် စၟတ် (၃) ရးသ္ကုတ်သၠုၚ်ကျာ