မတ်မလီု၊ အဝ်ဂါတ်(၃၀)
ပ္ဍဲဗွဝ်ဖျာဂဥုဲတွဵုရးဍုၚ်မန် ကြဴနူၚုဟ်ဂဥုဲ ဒးပၠုပ်ပ္တိုန်မံၚ်နူဍုၚ်သ္အာၚ်တံ သၠုၚ်တိုန်ကၠုၚ်ဂၠိုၚ်ကဵုဆတုဲဂှ် ဂဥုဲဇဗဗွဲမဂၠိုၚ် ဒးဂဗမံၚ်ကဵု ပရေၚ်ပိုတ်အိုတ်တံရောၚ်ဂှ် တၠကမၠောန်ဆေၚ်ဂဥုဲတံကဵု အ္စာဂဥုဲတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂဥုဲဇဗ ဒးပၠုပ်ပ္တိုန်မံၚ်နူဍုၚ်သေံတံဂှ် ဟိုတ်နူပရေၚ်တက်တြးပ္တိတ် သြန်တၞး(၂၀၀၀၀)ကံၚ်ဇြဳပၞာန်တံတုဲ ၚုဟ်ဒဝ်ဠာက္ဍၚ်တိုန်ကၠုၚ်ကီု၊ ဟိုတ်နူအခက်ခုဲအခေါၚ်ပၠုပ်ပ္တိုန်ဂဥုဲဇဗတံတုဲ ကြဴနူၚုဟ်နှေန်သၠုၚ်တိုန်ကၠုၚ်ဂၠိုၚ်ကဵုဆတုဲဂှ် က္တဵုဒှ်ကၠုၚ် စဵုကဵုကပေါတ်ပိုတ်အိုတ်တံရ။
ကပေါတ်ဂဥုဲတံဂှ် ပ္ဍဲဂိတုအဝ်ဂါတ်ဂှ် ကပေါတ်ဂဥုဲမွဲဂကူမ္ဂး စဵုကဵုဗ္ဒါဲ (၃၅)တၟံကၠံ ၚုဟ်ထပ်သၠုၚ်တိုန်ကၠုၚ်နူကၠာတေံတုဲ ကုမ္ပဏဳဂဥုဲလ္ၚဵုတံဂှ်လေဝ် ကၟာတ်ကၠုၚ် ပရေၚ်သွံတံမဒှ်ရ။
တၠကမၠောန်ဆေၚ်ဂဥုဲမွဲတၠဂှ်တှ်ေ ဟိုတ်နူတၚ်သၞောတ်ဗ္ၜတ် ပၠုပ်ပ္တိုန်ဂဥုဲတံတုဲ ပ္ဍဲဗွဝ်ဖျာဂှ် မ္ၚးနူဂဥုဲဇြဟတ်တုဲ ကပေါတ်ဂဥုဲသှ်ေသၟေဟ်မံၚ်တံဗ္ဒါဲသီုဖအိုတ်တံ ဒးဂဗမံၚ်ကဵုပရေၚ်ပိုတ်အိုတ်ရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲကလိုက်ကၟဵု သြန်တၞး(၂၀၀၀၀)ဂှ် ၚုဟ်လှုဲတံတိုန်ရ။ စဵုကဵုအခိၚ်ဂှ်ဂှ် စဵုကဵုၜိုတ်သတ္တဟပထမဂှ် ညိၚ်မံၚ်ဏီ။ ၚုဟ်လှုဲဂှ် ဟလဵုပလေဝ် ဟွံကလေၚ်စှ်ေတုဲ အခိၚ်တိုန်ကၠုၚ်မံၚ်အဆက်က်ဂှ် တၟံကၠံဂဥုဲတံဂှ် တိုန်ကၠုၚ်ရ။ နူကဵု (၅)တၟံကၠံ တိုန်မံၚ် ၜိုတ်(၂၀)တၟံကၠံဂှ် လၟုဟ်မ္ဂးတှ်ေ တိုန်အာ ၜိုတ်(၃၅)တၟံကၠံရ။ ကပေါတ်တံဂှ် ပိုတ်မံၚ်လးလးရ။ ဟွံဖျေံကပေါတ် ကုဆေၚ်ဂဥုဲတံရ။ ဂှ်တှ်ေ သာတုဲပရေံရ။ ဂဥုဲဇြဟတ်ပိုဲသုၚ်မံၚ် လၟေၚ်ဍာံဂှ်ရ။ ပါဲနူဂဥုဲဇြဟတ်တုဲ ပိုတ်မံၚ်သီုဖအိုတ်ရ။ ကပေါတ်သှ်ေအောန်မံၚ်ဖအိုတ်ရ။ ဒှ်မံၚ်ကြပ်အလုံသီုဖအိုတ်ရ။ ဟိုတ်နူၚုဟ်လှုဲတိုန်ဂှ်လေဝ်ပါကီု၊ ဟိုတ်နူရေၚ်ပၠုပ်ပ္တိုန်ဗၞိက်တံလေဝ်ပါကီု၊ ဟိုတ်နူအခက်အခုဲ ၜါတၚ်ဏံရ” သာ်ဝွံ ညးသ္ဂးရ။
သ္အာၚ်နူဂှ်ပၠန် အပ္ဍဲဗွဝ်ဖျာဂှ်လေဝ် ကုမ္ပဏဳတံဂှ် ဟိုတ်နူအခက်ခုဲ ပရေၚ်ပၠုပ်ပ္တိုန်တံတုဲ ဂဥုဲဇဗတံဂှ် ၜိုတ်နွံပၟိက် သွံတြးကဵုတံဟၟဲတုဲ သွံတြးမံၚ်ကဵုဆေၚ်ဂဥုဲတံ နကဵုအရေၚ်ရဂှ်ရ တၚ်နွံပၟိက်ဂဥုဲဇဗတံ သၠုၚ်တိုန်ကၠုၚ်ရဂှ် ညးဆက်ဟီုရ။
အ္စာဂဥုဲမွဲတၠဂှ်လေဝ် ဟိုတ်နူကပေါတ်ဂဥုဲဗွဲမဂၠိုၚ် ပိုတ်အိုတ်မံၚ်ဂှ်ရ ရုဲဂကူဂဥုဲတံဟွံဂွံရတုဲ နကဵုဂဥုဲနွံဂှ်ရဟေၚ် ဒးလွဳလွတ်ကဵုမံၚ်တုဲ ပရေၚ်ဂဥုဲဇဗပိုတ်အိုတ်တံ ဆက်က္တဵုဒှ်မံၚ်မ္ဂး သွက်ညးယဲတံဂှ် ဒးဂွိၚ်ကဵုအန္တရာယ်လမျီုရဂှ် ဟီုရ။
“ဂဥုဲဂှ်တှ်ေ ပိုတ်ကွေံကွေံရ။ လၟုဟ် သာတုဲပရေံကၠုၚ်ရ။ ပိုဲဂှ် အကာဲအရာ ရုဲဂကူဂဥုဲဟွံသေၚ်ရပုဟ်၊ ဒှ်ကၠုၚ်အကာဲအရာ ဂဥုဲနွံတှ်ေ မုဒှ်ဒှ်ဒးသုၚ်စောဲဖအိုတ်ရ။ ဂဥုဲဂှ် အောန်မံၚ်စဵုကဵုဟၟဲရ။ ဂဥုဲပၟိက်ဇၞော်တံဂှ် ဒှ်မံၚ်စဵုကဵုဟွံမွဲတှ်ေ ယဝ်ရဗ္ကန်လ္ပာ်ပယျဵုတံတှ်ေလေဝ် အကာဲအရာဂၠံၚ်ဍာန် ဟွံခိုဟ်တုဲ ဒှ်မံၚ်ကြပ်ပိုတ်အိုတ်ရ။ မ္ၚးနူတိုန်အာ ဗ္ဒါဲ(၂)ဆဂှ် ဒှ်မံၚ်အကာဲအရာ ဂဥုဲကြပ်ဟွံမွဲရ။ ဂဥုဲပၟိက်ဇၞော်ဗွဲမဂၠိုၚ်ပိုတ်မံၚ်ရ။ ပိုဲတံဂှ် ပြဟ်ဟ်ဏံတှ်ေ ၜိုတ်နွံဂှ်နွံဂှ် ချိၚ်ဆတုဲ ဒးလွဳမံၚ်ရ။ ၚုဟ်က္ဍၚ်လေဝ်ဗီုက္ဍၚ်ဂှ် ဒှ်ချိၚ်လွဳမံၚ်ရ။ ပၟိက်ဟွံဇၞော်ကွေံကွေံတှ်ေ ပိုဲတံ နကဵုဂဥုဲဓမ္မတာဏံရ ညံၚ်သ္ဂောံဂွံဂှ် ၜိုတ်သ္ပမာန် ဒးလွဳရ။ သွက်ညးပၟိက်ဇၞော်ကွေံကွေံဂှ် ဟွံဒေါံဟွံဂွံ ဒးစွံလဝ်ဂဥုဲတံရ။ ပရေၚ်ဂဥုဲဇဗပိုတ်အိုတ် ဂၠိုၚ်မံၚ်အတိုၚ်ဏံတှ်ေ ဍေံဂှ် နကဵုညးယဲဍာ်ဇမၠိၚ် သုၚ်မံၚ်လၟိုန်ဂှ်တှ်ေ ယဲတံသာတုဲက္ဍၚ်ကၠုၚ်မာန်ရ။ ဇီုကပိုက်ကၠုၚ် ကုအန္တရာယ်လမျီု တီတီဒှ်ဒှ်မာန်မံၚ်ရ” သာ်ဝွံ သ္ဂးရ။
ဂဥုဲဇဗပၠုပ်ပ္တိုန်နူဍုၚ်သ္အာၚ် သုၚ်စောဲမံၚ် ပ္ဍဲတွဵုရးဍုၚ်မန်တံဂှ် နူလ္ဂုၚ်မွဲကဆံၚ် ကုမ္ပဏဳတံ သွံတြးမံၚ်ပ္ဍဲဗွဝ်ဖျာတံနွံမံၚ်တုဲ ၜိုန်ရ ပွရာန်ပၠုပ် နူလ္ပာ်ဍုၚ်သေံတံ နွံမံၚ်ကီုလေဝ် ဟိုတ်နူအခက်ခုဲပရေၚ်ဂၠံၚ်ဍာန်ကဵု တၚ်သၞောတ်ဗ္ၜတ်တံတုဲ သွက်ဂွံပၠုပ်ပ္တိုန်ဂဥုဲဇဗဂှ် ဒးဂဗမံၚ်အခက်ရ။
ဟိုတ်နူအကာဲအရာတံဏံတုဲ ကပေါတ်ဂဥုဲဇဗဗွဲမဂၠိုၚ်တံဂှ် ပ္ဍဲကုမ္ပဏဳတံ သှ်ေသၟေဟ်အောန်ကၠုၚ်တုဲ ဟိုတ်နူလ္ပာ်ကံၚ်ဇြဳပၞာန်တံ ပတေၚ်ဓရတ်လဝ် အခေါၚ်ပၠုပ်ပ္တိုန်ဂဥုဲဇဗတံဂှ်ရ ပွဇီုကပိုက် လ္တူဗွဝ်ဖျာဂဥုဲဇဗတံ ဇၞော်ကၠုၚ်မာန်ရဂှ် တၠကမၠောန်ပၠုပ်ပ္တိုန်မံၚ် ဂဥုဲဇဗတံ သ္ၚဳဂၠိပ်လဝ်ရ။
ဍုၚ်ဗၟာဂှ် ကပေါတ်ဆက်စပ်ကဵုဂဥုဲဇဗတံဂှ် အဓိကပၠုပ်ပ္တိုန်မံၚ် နူဍုၚ်သေံ၊ ကြုက် ကေုာံ အိန္ဒိယတံတုဲ ပ္ဍဲကာလဒပ်ပၞာန်သီအဝဵုဏံ ဒးဆေၚ်မံၚ်မုက်ကဵု ပရေၚ်ဂဥုဲဇဗပိုတ်အိုတ်တံ မွဲခဏမွဲခဏရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai