သွက်ဂွံထ္မံက်ရုပ်ရဴမုက်ပၞာန် နကဵုမဟာဗျူဟာစှ်ေစှ်ေမာန်ဂှ် သမ္မတယာယဳ NUG ကဵုသတိ

လ္ဂုၚ်၊ အဝ်ဂါတ် (၃၀)

ပ္ဍဲကဵုမုက်ပၞာန်အိုဿီု ရေၚ်တၠုၚ်နကဵုမဟာဗျူဟာစှ်ေစှ်ေမာန်မှဟေၚ် သွက်ညးဍုၚ်ကွာန်တံဂှ် ဖန်ဗဒှ်ကဵု ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မၞုံကဵုဒဳမဝ်ကရေဇြဳ ကေုာံ သၞောဝ်ဗ္ၜတ်အခေါၚ်အရာမၞိဟ်တံပေၚ်ၚ်မာန်ဏောၚ်ဂှ် သမ္မတယာယဳ NUG ဒူဝါလယှဳလ ကဵုသတိဟီုဂးလဝ်ရ။

ပ္ဍဲကဵုကောံဓရီုအလဵုအသဳညဳသၟဟ်ဂကူ NUG မရနုက်ကဵု ၂၉ ဝါ မကၠောန်ဗဒှ်လဝ် ပ္ဍဲဂိတုအဝ်ဂါတ် ၂၉ တေံဂှ် သမ္မတယာယဳ NUG ဒူဝါလယှဳလ ကဵုသတိဟီုဂးလဝ်သာ်ဏံရ။

သမ္မတယာယဳ ဒူဝါလယှဳလဂှ် ကံၚ်ဇြဳပၞာန် မဒးဂိဒၟံၚ် ပ္ဍဲကဵုပေါဲဗ္တိုက်ဗလးတိတံဂှ်ဝွံ သုၚ်စောဲဇြဟတ်တရဴကျာတုဲ ဟွံပါ်ပါဲကောန်အရာပ်၊ ကောန်ပၞာန်မွဲသာ် ဗ္တိုက်ဒၟံၚ်တုဲ ဆက်ကလိလောန်ဒၟံၚ် ပရေၚ်စံၚ်ပလီုပလာ်ကွာန်၊ သ္ၚိဒၟံၚ်တံ အဆက်က်ရောၚ်ဂှ် သ္ဂးရ။

ပ္ဍဲကဵုအကာဲအရာသာ်ဏံဂှ် ညံၚ်သၞဂွံဒးဂိဂၠိုၚ်ဂှ်မ္ဂး ပရေၚ်ပၞာန်မွဲဓဝ်သၟးဟွံက ပံက်မုက်ပၞာန်နာနာတုဲ ဒးလုပ်ပေါဲဗ္တိုက်ဏောၚ်တုဲ အခန်ကဏ္ဍ ပရေၚ်ဆက်ဆောံဍုၚ်သ္အာၚ် ကေုာံ ပရေၚ်ဘဏ္ဍာတံဝွံ ဒှ်မုက်ပၞာန်ပၟိက်ဇၞော် သွက်ပၠန်ဂတးတံရောၚ်ဂှ် ကဵုလဝ်သတိရ။

သ္အာၚ်နူဂှ်ပၠန် စပ်ကဵုပရေၚ်ကေတ်ဒုဟ်ကၟာတ်လဒဵု အလဵုအသဳအမေရိကာန် လ္တူကဏ္ဍကၠေၚ်စၞပၟတ်၊ ပရေၚ်ဘဏ္ဍာတံဂှ်တုဲ သွက်ကံၚ်ဇြဳပၞာန်ဂှ် စိုပ်ဒၟံၚ်အကာဲအရာ ကြေပ်ဂြတ်ဒၟံၚ် တီတီကၠးကၠးယျဂှ် သမ္မတယာယဳ ဒူဝါလယှဳလ ဟီုလဝ်ရ။

အပ္ဍဲကဵုကောံဓရီုဏံဂှ် သမ္မတယာယဳဂှ် ပြဝထဍေၚ်ပ္တိတ် အမာတ်ကလုတ်တဳမဝ်ဗၟံက် ကေုာံ ကောန်သ္ၚိကၟိန်ညးဂှ်ဝွံ သွက်ကံၚ်ဇြဳပၞာန် ဒှ်အရာသ္ဇက်ဒးဂွ အကြာညးဂၠးတံတုဲ ဒဒှ်ရဒှ်ပြဝ ဂုဏ်သိက္ခာဟွံမွဲတံဂှ်ကီု၊ ဒဒှ်ရစိုတ်ဟွံမိပ် သွက်အမာတ်ကလုတ်တဳမဝ်ဗၟံက် ကေုာံ ဂြောဝ်ဂတာညး မဒးထဍေၚ်ပ္တိတ်ကဵု ဂကောံပၞာန်တံဂှ် ဟီုလဝ် ဇြိုဟ်ဟ်နက်က်ရ။

ပ္ဍဲကဵုကောံဓရီု ဂကောံအလဵုအသဳ NUG ဂှ် ပ္ဍဲအရာပ္တိတ်ကဵုစၟတ်တဲဒှ်မၞိဟ် သွက်ညးစိုပ်ဒၟံၚ်ဍုၚ်သ္အာၚ်တံ နူကဵုဌာနဝန်ဇၞော်ကာအပ္ဍဲဍုၚ် ကေုာံ ပရေၚ်ကောပ်ကာဲပရေၚ်မၞိဟ်လုပ် မရေၚ်တၠုၚ်ဒၟံၚ်ဂှ် ပွမသ္ဒးကဵုၚုဟ်ရေၚ်တၠုၚ် မကံက်ဒၟံၚ် အမေရိကာန်ဒဝ်ဠာ ၁၀ ဟွံသေၚ်မ္ဂး သြန်ဒ္ကေဝ် ၚုဟ်မးတုပ်ကဵု ပမာဏဏံဂှ် သွက်ဂွံဖအောန်ဖျေံကဵုမာန် ပ္တိုန်ထ္ၜးလဝ်ကီု၊ ဌာနဝန်ဇၞော်ပံၚ်တောဲရေၚ်တၠုၚ် စပ်ကဵုဍုၚ်သ္အာၚ် သဳကၠဳလဝ် ကိစ္စပ္တိုန်ထ္ၜး Federal Democracy Charter Promotion တံရောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−NUG