ပ္ဍဲကျံက်ကျဳ ဟိုတ်နူလွဟ်ဇၞော်တုဲ ပါလုပ်သီုကောန်ၚာ်မွဲတၠဂှ် ၄ တၠ ကလိဂွံအာဝပ်

ကျံက်ကျဳ၊ အဝ်ဂါတ် (၃၀)

ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကဵုပွိုၚ်ဍုၚ်ကျံက်ကျဳ၊ ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တံဂှ်တုဲ ကောန်ၚာ်အယဲ ၄ သၞာံမွဲတၠပါလုပ်ဂှ် ညးဍုၚ်ကွာန်ကောန်အရာပ် ၄ တၠ ဇီုကပိုက်ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုအဝ်ဂါတ် ၂၇ အခိၚ်နူဂယး ၜိုတ် ၇ နာဍဳဂှ် နူကဵုတမ်ဒပ် ခလရ (၂၆၄) ကံၚ်ဇြဳပၞာန် ဟိုတ်နူပန်ပှော်လဝ်လွဟ်ဇၞော် အပ္ဍဲကဵုကွာန်ကညေန်တိုဝ် ပွိုၚ်ဍုၚ်ကျံက်ကျဳဂှ်ရ ကောန်ၚာ်သၟတ် အာယုက် ၄ သၞာံမွဲတၠ ကေုာံ ညးဗြဴ ၃ တၠ နူကဵုကွာန်ကညေန်ကျိုဝ်တံ အပံၚ် (၄) တၠ ဇီုကပိုက်ကလိဂွံလဝ်ဝပ်ရ။

အပ္ဍဲကဵုပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် သ္ၚိဒၟံၚ်ညးဍုၚ်ကွာန်ဒေသ မၞုံအပ္ဍဲကွာန်ကညေန်ကျိုဝ် ၅ မဂှ်လေဝ် ဒးဇီုကပိုက်လီုလာ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲကဵုပွိုၚ်ဍုၚ်ကျံက်ကျဳဂှ် ဒပ်ကံၚ်ဇြဳပၞာန် စွံပွန်ပ္တဝ်က္ဍိုပ် လ္တူညးဍုၚ်ကွာန်ကောန်အရာပ်တံဂှ်တုဲ ပွမပန်ပှော်ဗ္တိုက်လွဟ်ဇၞော် အပ္ဍဲကွာန်တံဂှ် ကၠောန်ဒၟံၚ်အရိုဟ်ဒဒှ်တ္ၚဲရ။ ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန် သာ်ဏံဂှ်တုဲ ကောန်အရာပ်တံ ဒးဇီုကပိုက်ဆောံလေၚ်လဝ် တၟာဂလိုၚ်ရ။

တုဲကၠုၚ် ပ္ဍဲဂိတုအဝ်ဂါတ် ၂၅ တေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန် နူကဵုကွာန် မၞုံပ္ဍဲပွိုၚ်ဍုၚ်ကျံက်ကျဳ၊ ပွိုၚ်ဍုၚ်ယှိုဲကျေန်၊ ပွိုၚ်ဍုၚ်မုၚ် KNU ဂှ် ၄ တၠ ကလိဂွံလဝ်ဝပ်တုဲ သ္ၚိဒၟံၚ် (၇) မလေဝ် ဇီုကပိုက်လီုလာ်လဝ်ရ။

ဒၟါနူဒပ်ကံၚ်ဇြဳပၞာန် ကၠောန်သ္ပပန်ပှော်ဒၟံၚ်လွဟ်ဇၞော် အပ္ဍဲကဵုကွာန် မၞုံတိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU တံ ဟွံပိုတ်သ္ကုတ်ဂှ်ရ ကောန်ကွာန်ဒေသဂမၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။

သ္အာၚ်နူဂှ်ပၠန် ညံၚ်သ္ဂောံဂွံ ပရေၚ်စသုၚ်ဗိုက်လ္တက် ကောန်ကွာန်တံကဵု ပရေၚ်လွဳလွတ်ယဲတံ ရုမ်မ်ဂပ်ပ်ဂှ် ဒးဆေၚ်ဒၟံၚ်မုက် တၚ်ကော်ဆဴတၟာဂလိုၚ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံအခေါၚ်အရာမၞိဟ်ကရေၚ် KHRG ရ။

ပရိုၚ်−သြၚ်လောန်တိုၚ်(မ်)

ဗီု−KNU